Search form

KELUAREN 8

Katak

1Jenari nina TUHAN man Musa, “Laweslah ndahi raja janah kataken man bana katangKu enda, ‘Berelah bangsangKu lawes, gelah banci Aku isembahna. 2Adi la kam nggit, Kuukum negerindu arah namburisa alu katak. 3Perbahan bage demna pagi katak i Lau Nil, e maka itadingkenna lau belin e janah lawes ia ku bas istanandu, ku bas kamarndu, ku bas ingan medemndu, ku bas rumah-rumah pegawaindu ras rumah-rumah rayatndu, seh pe ku dapurndu ras kudin-kudinndu. 4Ilompatina kam, rayatndu, bage pe kerina pegawai-pegawaindu.’ ”

5Nina TUHAN man Musa, “Suruh Harun natang cikenna i babo lau belin saluren-saluren lau, kolam-kolam, gelah rehen katak ibahanna namburi negeri Mesir.” 6E maka itatang Harun cikenna i babo kerina lau, kenca bage ndaraten melala katak i bas lau e nari, itamburina negeri Mesir. 7Tapi ipergunaken tukang-tukang sihir ka pemetehna, janah ia pe rehen ibahanna katak ndemi negeri Mesir.

8Jenari idilo raja si Musa ras Harun, e maka nina, “Ertotolah man TUHAN gelah ipelawesna katak enda kerina, kenca e kubere kari bangsandu lawes, maka banci isehkenna persembahen-persembahen man TUHAN.”

9Nina Musa njabapsa, “Meriah ukurku ertoto guna kam. Tentuken saja ndigan atendu aku ertoto guna kam, guna pegawai-pegawaindu ras rayatndu, gelah katak e keri kerina seakatan i Lau Nil.”

10Erjabap raja nina, “Ertotolah kerna aku pepagi.”

Nina Musa, “Tentu kubahan bagi si ipindondu, gelah itehndu maka labo lit Dibata bagi TUHAN, Dibata kami. 11Katak e la banci la keri i bas kam nari, i bas pegawai-pegawaindu nari ras i bas rayatndu nari. Sada pe pagi lanai lit tading, seakatan i bas Lau Nil.” 12Kenca bage lawes Musa ras Harun nadingken raja, e maka ertoto Musa man TUHAN kerna katak si enggo itamakenNa man raja. 13Ilakoken TUHAN bagi si ipindo Musa, e maka mate kerina katak e, subuk si i bas rumah-rumah, i bas kesain-kesain ras si i juma pe. 14Ipepulung kalak Mesir bangke katak e, ergun-gun, seh mbau kerina negeri e ibahanna. 15Tapi kenca idah raja maka katak e enggo mate kerina, mekeng ka ia mulihken; la ia nggit megiken kata Musa ras Harun, bagi si enggo ikataken TUHAN.

Rengit

16Nina TUHAN man Musa, “Suruh Harun mekpekken cikenna ku taneh, gelah abu i belang-belang negeri Mesir salih jadi rengit.” 17E maka ipalu Harun taneh alu cikenna, janah kerina abu i Mesir salih jadi rengit. Icinepina jelma ras rubia-rubia. 18Icubaken tukang-tukang sihir ka makeken pemeteh sihirna gelah rehen rengit, tapi la ia ngasup. Rengitlah kerina i japa pe i belang-belang taneh Mesir, 19e maka nina tukang-tukang sihir e man raja, “Dibata kap si erbahanca enda!” Tapi raja tetap mekeng, payo bagi si ikataken TUHAN, maka raja la nggit megiken Musa ras Harun.

Laneng ratah

20Nina TUHAN man Musa, “Lampas pagi erpagi-pagi e, jumpailah raja tupung ia lawes ku lau, janah kataken man bana katangKu enda, ‘Berelah bangsangKu lawes, gelah banci isembahna Aku. 21Kupersingeti man bandu, maka adi la iberendu, la banci lang Kuukum kam alu nuruh laneng ratah ncinepi kam, pegawai-pegawaindu, ras rayatndu kerina. Rumah-rumah kalak Mesir dem alu laneng ratah janah taneh pe itamburina. 22Tapi daerah Gosen, i ja bangsangKu ringan, la Kukenai, e maka la lit i je sada pe laneng ratah. Enda Kubahan gelah itehndu maka Aku nge TUHAN, si ngaturken negeri enda. 23Lit Kubahan lainna man bangsangKu ras man bangsandu. Tanda kuasa enda pagi me ibenaken.’ ” 24Isuruh TUHAN me laneng ratah si lanai kal lang-lang buena ku bas istana raja, ras ku bas rumah-rumah pegawaina. Kerina negeri Mesir icedaken laneng ratah e.

25Jenari idilo raja si Musa ras Harun nina, “To persembahkenlah persembahen-persembahen man Dibatandu i bas negeri enda.”

26“La payo adi ibahan kami bage,” nina Musa erjabap. “Sabap tentu nembeh ate kalak Mesir adi ipersembahken kami asuh-asuhen persembahen man TUHAN, Dibata kami. Adi ipake kami asuh-asuhen e jadi persembahen, tentu nembeh ate kalak Mesir man kami. E maka ibenterina kami alu batu seh mate, sabap idahna denga kami erbahan persembahen e. 27Arus maka kami erdalan telu wari dekahna ku gurun pasir nehken persembahen-persembahen man TUHAN, Dibata kami bagi si iperentahkenNa man kami.”

28Nina raja, “Kubere kam lawes nehken persembahen man TUHAN, Dibatandu ku gurun pasir, adi la kam ndauhsa lawes. Ertotolah guna aku.”

29Nina Musa njabapsa, “Kenca aku lawes, minter aku ertoto man TUHAN maka pagi itadingken laneng ratah e kam, pegawai-pegawaindu ras rayatndu. Tapi ola pagi itipundu ka kami mulihken kenca bage la ka iberendu bangsa e lawes nehken persembahen man TUHAN.”

30E maka lawes Musa nadingken raja jenari ertoto ia man TUHAN. 31Janah ibahan TUHAN bagi si ipindo Musa. Itadingken laneng ratah e raja, pegawai-pegawaina ras rayatna; sada laneng ratah pe lanai lit tading. 32Tapi sekali enda pe raja mekeng ka nge, e maka la ka bo iberena bangsa e lawes.

Pustaka Si Badia

Pustaka Si Badia, Today's Batak Karo Version © 2003, Indonesian Bible Society – Lembaga Alkitab Indonesia More Info | Version Index