Search form

KELUAREN 9

Asuh-asuhen mate kerina

1Nina TUHAN man Musa, “To dahi raja, kataken man bana maka TUHAN, Dibata bangsa Heber enggo ngataken, ‘Berelah bangsangKu lawes, gelah banci isembahna Aku. 2Adi la ka bo iberendu ia lawes, 3Kuukum kam alu mereken penakit bernung man kerina asuh-asuhenndu, kudandu, keledendu, untandu, lembundu, biri-birindu ras kambingndu. 4Tapi lit Kubahan lainna man asuh-asuhen bangsa Israel ras man asuh-asuhen bangsa Mesir, janah la lit sada pe asuh-asuhen bangsa Israel mate. 5Aku, TUHAN, enggo netapken, maka pagi me Kulakoken si enda kerina.’ ”

6Pepagina ibahan TUHAN bagi si enggo ikatakenNa. E maka kerina asuh-asuhen bangsa Mesir mate, tapi asuh-asuhen bangsa Israel sada pe lang. 7Isungkun raja kai si enggo jadi janah ituriken kalak man bana maka la lit sada pe mate asuh-asuhen bangsa Israel. Tapi ukur raja lalap mekeng, e maka la iberena bangsa e lawes.

Bareh

8Kenca bage ikataken TUHAN man Musa ras Harun nina, “Buatlah piga-piga ngkerauk abu dapur. Abu e arus icaburken Musa ku das i lebe-lebe raja. 9Abu simelumat e minter merap ku belang-belang negeri Mesir, janah i japa pe ipeturahna bareh, subuk i bas jelma, bage pe i bas asuh-asuhen, jenari pultak jadi ugah.” 10E maka ibuat Musa ras Harun abu e, kenca bage tedis ia i lebe-lebe raja. Icaburken Musa abu ndai ku das, janah minter turah ibahanna bareh i bas jelma ras asuh-asuhen, jenari pultak jadi ugah. 11Tukang-tukang sihir la ngasup tedis i lebe-lebe Musa, sabap ia pe barehen bage pe kerina bangsa Mesir si deban. 12Tapi mekeng ibahan TUHAN ukur raja, janah payo bagi si ikataken TUHAN, raja la nggit megiken Musa ras Harun.

Udan baho

13Kenca bage, ngerana TUHAN man Musa, “Pagi lampas erpagi-pagi, jumpai raja jenari kataken man bana maka TUHAN, Dibata bangsa Heber enggo ngataken, ‘Berelah bangsangKu lawes, gelah banci isembahna Aku. 14Sekali enda labo saja pegawai-pegawaindu ras rayatndu ngenca Kuukum, tapi kam pe, gelah itehndu maka la lit si deban bagi Aku i belang-belang doni enda. 15Bicara mbarenda nari Kuawatken tanKu mekpek kam ras rayatndu alu penakit, tentu ndekah me kam min ndai mate. 16Tapi guna encidahken kuasangKu man bandu, Kupelepas kam nggeluh, gelah gelarKu ipuji i belang-belang doni enda. 17Bage pe tetap ka nge ipeganjangndu bandu i lebe-lebe bangsangKu, e maka la iberendu ia lawes. 18I bas paksa si genduari e ka pagi, Kudabuhken udan baho si mesangat si la enggo pernah jadi bage i bas sejarah Mesir. 19Dagina perentahkenlah maka asuh-asuhenndu ras kerina jelma ras asuh-asuhen i mbalmbal, si la lit inganna cio la banci lang idabuhi udan baho seh mate.’ ” 20Piga-piga kalak pegawai raja mbiar erkiteken kai si ikataken TUHAN, e maka ibabana budak-budakna ras asuh-asuhenna ku rumah. 21Tapi si debanna la diatena pe kata persinget TUHAN, ipelepasna saja budak-budakna ras asuh-asuhenna i darat.

22Jenari erkata TUHAN man Musa nina, “Pepinterlah tanndu ku langit, maka ndabuh udan baho ku kerina negeri Mesir ngkenai jelma, asuh-asuhen, ras kerina sinuan-sinuan i juma.” 23E maka iangkat Musa cikenna kempak langit. Kenca e minter ipesusur TUHAN lenggur ras udan baho, ras perkas ndumpang taneh. Ipesusur TUHAN 24udan baho si meder ras perkas erndilap ku jah ku je. I bas gedang-gedang sejarah Mesir la enggo pernah lit bage. 25I belang-belang taneh Mesir, iripukken udan baho e kerina si la lit inganna cio, subuk jelma bage pe asuh-asuhen. Kerina sinuan-sinuan i juma mbulaken, janah batang-batang kayu penggelen. 26I daerah Gosen ngenca, e me ingan kalak Israel tading, udan baho e sitik pe la lit.

27E maka iperentahken raja ngelegi Musa ras Harun. Nina raja man bana, “Sekali enda tuhu-tuhu aku enggo erdosa. TUHAN nge kepe si benar, aku ras rayatku nge si salah. 28Ertotolah man TUHAN! Enggo cukup man kami sora lenggur ras udan baho e! Erpadan aku maka kubere kam lawes; lanai padah terdekahen kam ringan i jenda.”

29Nina Musa man raja, “Kenca aku ndarat i bas kuta enda nari, kuangkat minter tanku ertoto man TUHAN. E maka minter kari lenggur e ngadi, janah udan baho lanai lit, gelah banci itehndu maka doni enda TUHAN empuna. 30Tapi kueteh nge maka kam ras pegawai-pegawaindu langa ka bo mbiar man TUHAN Dibata.”

31Sinuan-sinuan si sangana erbunga ras sargum si enggo metua kerina icedaken. 32Tapi page ras dawa sada pe la ceda sabap langa luar ruhina tupung si e.

33Itadingken Musa me raja, jenari lawes ia ku darat kuta. Iangkatna tanna ertoto man TUHAN, e maka minter ngadi lenggur, baho ras udan e. 34Kenca idah raja kai si enggo jadi, erdosa denga ka nge ia. Ia ras pegawai-pegawaina tetap nge mekeng ukurna. 35Janah payo bagi si enggo ituriken TUHAN arah Musa, maka la ka bo ibere raja bangsa Israel lawes.

Pustaka Si Badia

Pustaka Si Badia, Today's Batak Karo Version © 2003, Indonesian Bible Society – Lembaga Alkitab Indonesia More Info | Version Index