Search form

KEJADIN 14

Abram mbebasken Lut

1Lit me empat kalak raja, e me Amrapel raja Babilon, Ariuk raja Elasar, Kedorlaomer raja Elam, Tidal raja Goyim. 2Empatna raja enda erperang ngelawan lima raja si deban e me: Bera raja Sodom, Birsa raja Gomora, Sinah raja Adma, Semeber raja Seboim ras raja Bela (tah Soar). 3Limana raja-raja enda ipersadana arihna ras gegehna i Baluren Sidim, e me Lawit Mate si genduari. 4Enggo sepuluh dua tahun raja-raja enda ndai limana lit i teruh kuasa Kedorlaomer, tapi i bas tahun si pesepuluh teluken ngelawan ia kerina. 5I bas tahun si pesepuluh empatken, Raja Kedorlaomer ras teman-temanna reh ras tenterana janah italukenna kalak Repaim i Asterot Karnaim, kalak Susim i Ham, kalak Emim i kendit Kiryataim, 6ras kalak Hori i deleng Edom, janah iayakna kalak enda ndai seh ku Elparan, i tepi gurun pasir. 7Kenca mulihken ia, seh ia i Kades (sanga si e igelari Enmispat). Ikuasaina kerina taneh kalak Amalek ras italukenna kalak Amori si ringan i Hasason Tamar.

8Kenca bage raja Sodom, Gomora, Adma, Seboim, ras Bela ipepulungna tenterana guna erperang i Baluren Sidim, jenari erperang ia 9ngelawan raja Elam, Goyim, Babilon ras Elasar, empat raja ngelawan lima raja. 10I bas Baluren Sidim, melala kal lubang-lubang si isin ter. E maka sanga raja Sodom ras Gomora kiam atena i bas peperangen e nari ndabuh ia ku bas lubang-lubang ndai. Tapi telu raja si deban sempat selamat kiam ku deleng-deleng. 11Empat raja si menang ndai muat kai si banci ibuatna i Sodom ras Gomora, termasuk pe barang si banci ipan, jenari lawes ia. 12Lut, anak senina Abram ringan i Sodom, e maka ia pe ras barangna ikut ibaba kalak enda.

13Tapi lit sekalak si la ikut tertangkap. E maka iturikenna kejadin e man Abram, kalak Heber e. Tupung si e Abram sangana ringan deher sada batang kayu sikerajangen Mamre, kalak Amori. Mamre ras senina-seninana, e me kap Eskol ras Aner, duana teman Abram. 14Kenca enggo ieteh Abram maka anak seninana tertaban, iaturkenna anak buahna si beluh erperang, 318 kalak teremna. Iayakina raja-raja si empat ndai terus ku Dan. 15I je ibagi Abram kalak enda jadi piga-piga terpuk, e maka sanga berngi, iserangna musuh e. Italukenna kerina. Iayak-ayakna seh ku Hobah arah Utara Damaskus.

16Kerina barang rampasen e idatsa mulihken. Lut, anak seninana bage pe erta-ertana ras kerina diberu-diberu ras tabanen si deban ibaba Abram mulihken.

Malkisedek masu-masu Abram

17Sanga Abram mulih i bas naluken Raja Kedorlaomer ras raja-raja si deban, ndarat raja Sodom ngalo-ngalo ia ku berneh Sawe (si igelari Baluren Raja). 18Bage pe, Malkisedek raja Salem, imam Dibata si Meganjangna, maba roti ras anggur man Abram. 19Ipasu-pasuna Abram janah nina, “Dibata si Meganjangna, si enggo njadiken langit ras doni masu-masu Abram! 20Terpujilah Dibata si Meganjangna si enggo mereken kemenangen man bandu naluken musuh-musuhndu!” E maka ibereken Abram sepersepuluh i bas kerina barang-barang rampasen si idatsa ndai man Malkisedek.

21Nina raja Sodom kempak Abram, “Man bandulah kerina barang-barang rampasen e, tapi iulihken min bangku rayatku.”

22Nina Abram ngaloi, “Ersumpah aku i lebe-lebe TUHAN Dibata si Meganjangna, si njadiken langit ras doni, 23maka la kai pe ateku bangku i bas sikerajangenndu e, selambar benang ntah sada nali sepatu pe lang, gelah ola pagi ikatakenndu maka perbanndu maka aku bayak.

24Sada pe la ateku kubuat jadi sikerajangenku, seakatan si enggo ipake anak buahku. Tapi berekenlah temanku Aner, Eskol, Mamre, muat baginna.”

Pustaka Si Badia

Pustaka Si Badia, Today's Batak Karo Version © 2003, Indonesian Bible Society – Lembaga Alkitab Indonesia More Info | Version Index