Search form

KEJADIN 17

Sunat, e me tanda perpadanen

1Sanga umur Abram 99 tahun, icidahken TUHAN baNa man Abram, janah nina, “Aku kap Dibata si Mada Kuasa. Erkemalangenlah man bangKu, janah bahanlah lalap rikutken ateKu ngena. 2Kubahan perpadanen ras kam, janah Kubereken man bandu kesusuren si lanai lang-lang teremna.” 3Nembah mungkuk Abram, ayona seh ku taneh, janah nina Dibata, 4“Kupadanken bandu: maka kam jadi nini nterem bangsa-bangsa. 5Gelarndu lanai Abram tapi Abraham, sabap Kubahan kam jadi nini melala bangsa. 6Nterem kubahan sinursurndu, janah lit i bas sinursurndu e nari jadi raja. Perban teremna denggo sinursurndu, dungna jadi piga-piga bangsa ia.

7Aku tetap nginget padanKu man bandu ras man kerina kesusurenndu ersundut-sundut janah perpadanen e tetap rasa lalap. Aku jadi Dibatandu ras jadi Dibata sinursurndu. 8Kubereken man bandu ras man sinursurndu taneh enda, aminna genduari jadi kalak pertandang gia kam i je. Kerina taneh Kanaan jadi sikerajangen sinursurndu rasa lalap, janah aku jadi Dibatana.”

9Nina Dibata kempak Abraham, “Kam pe arus erpadan, matuhi perpadanen enda, subuk kam, bage pe sinursurndu ersundut-sundut. 10Kam ras kerina kesusurenndu arus isunatken. 11-12Mulai genduari nari, la banci lang isunatkenndu kerina anak dilaki si umurna enggo waluh wari, subuk anak budak si tubuh i bas rumahndu, bage pe anak budak si itukurndu i bas kalak si deban nari. Sunat e me tandana maka lit perpadanenKu ras kam.

13Tep-tep kalak arus isunatken, janah enda me tanda si teridah i bas kulandu si encidahken maka perpadanenKu ras kam tetap rasa lalap.

14Kerina dilaki si la isunat, la ikira jadi bangsangKu, erkiteken la icikepna perpadanen e.”

15Nina Dibata man Abraham, “Olanai Sarai ban gelar ndeharandu tapi menaken genduari Sara gelarna. 16Kupasu-pasu ia, Kubereken ia mupus anak dilaki man bandu; ia jadi nande bangsa-bangsa janah i bas sinursurna nari lit pagi si jadi raja.”

17Abraham nembah janah ayona seh ku taneh, tapi tawa ia sanga ia rukur, “Banci kin kalak si umurna enggo 100 tahun dat anak denga? Banci kin Sara mupus denga adi umurna enggo 90 tahun?” 18E maka isungkunna Dibata, “Uga maka la Ismael saja jadi si ngalo tading-tadingenku?”

19Nina Dibata, “Lang! Ndeharandu Sara nge pagi mupus anak dilaki, janah ibanndulah gelarna Isak. Aku tetap nginget perpadanenKu ras kam bage pe ras sinursurna seh rasa lalap. 20Enggo Kubegi pemindonndu kerna Ismael. Dage Kupasu-pasu ia, Kubereken man bana melala anak ras kempu. Ia jadi bapa sepuluh dua raja, janah Kubahan sada bangsa si mbelin arah ia. 21Tapi perpadanenKu Kubahan ras Isak, anak si ipupus Sara i bas tahun si reh, bagi paksa si genduari ka.” 22Kenca Dibata enggo dung ngerana man Abraham lawes Dibata nadingken ia.

23I bas wari si e minter ipatuhi Abraham kai si ikataken Dibata. E maka isunatkenna anakna Ismael ras kerina dilaki si lit i bas rumahna subuk anak budak si tubuh i bas rumahna bage pe si itukurna i bas kalak si deban nari. 24Enggo 99 tahun umur Abraham asum ia isunatken, 25janah umur anakna Ismael 13 tahun. 26Duana ia isunatken i bas sada wari, 27ikut pe ras kerina budak-budakna.

Pustaka Si Badia

Pustaka Si Badia, Today's Batak Karo Version © 2003, Indonesian Bible Society – Lembaga Alkitab Indonesia More Info | Version Index