Search form

KEJADIN 19

Dosa kuta Sodom

1Kenca ben wari seh me malekat si dua ndai i Sodom. Paksa e si Lut sangana kundul i pintu gerbang kuta. Kenca idahna ia duana minter keke Lut ngalo-ngalosa. Nembah ia i lebe-lebe kalak ndai janah nina, 2“O Tuan, mari ku rumahku kita lebe. Bere maka banci kam kulayani. Banci iburihindu nahendu janah i jenda kita erberngi. Pagi lampas erpagi-pagi banci kam medak jenari nerusken perdalanenndu.”

Tapi nina kalak ndai njabapsa, “Bujur, i kesain enda me kami erberngi.”

3Erkiteken lalap meseksek pemindon Lut man bana, dungna ras ia ku rumah. Isuruh Lut suruh-suruhenna nasakken roti janah isikapkenna pangan si entabeh man temuena e. Kenca enggo sikap kerina, man me kalak enda.

4Ope denga temue ndai lawes medem, dilaki anak kuta Sodom reh ngkeleweti rumah e. Kerina dilaki si lit i bas kuta e subuk nguda tah metua reh ku je. 5Ilebuhken jelma si nterem ndai Lut nina, “I ja kalak si reh erberngi ku rumahndu enda ndai? Baba ndarat man kami!” Ilakoken dilaki anak kuta Sodom atena man kalak ndai bali ras man diberu.

6Ndarat Lut, tapi minter i pintukenna pintun arah pudina. 7Nina, “O teman, mindo kal aku man bandu, ola ibahanndu perbahanen si jahat e. 8Bagenda sajalah; ma idahndu lit dua kalak anakku si nguda-nguda denga. Banci kubaba ia duana ndarat man bandu; kuga atendu ia ibahanndu bage. Tapi kalak enda ola ugapa pe ban; temuengku ia, e maka arus kujaga maka la kena kai pe ia.”

9Tapi nina jelma si nterem, “Ola ko je! Ia pe kalak tandang-tandang nge, ngajari ka atena! Jahaten kari ibahan kami man bam asang man kalak si dua e!” Ionjumkenna si Lut, ideherina pintun, ipecahkenna atena. 10Tapi minter irintakken si dua kalak ndai si Lut mulihken ku bas rumah, jenari itutupna pintun. 11Kenca bage ipepentangna kerina mata dilaki si i darat ndai, e maka lanai idahna i ja pintun.

Lut nadingken Sodom

12Nina temue si dua kalak ndai man Lut, “Adi lit denga i jenda anakndu dilaki ntah anakndu diberu, kelandu, ntah sima-simandu si deban, babalah ia ndarat i jenda nari, 13sabap ikernepken kami ate kami kuta enda. Pengadun si mesangat kerna anak kuta enda enggo seh man TUHAN, janah kami me isuruhNa ngkernepken kuta Sodom enda.”

14E maka lawes Lut njumpai dua kalak calon kelana nina, “Pedas-pedas kam ndarat i bas ingan enda nari, sabap ikernepken TUHAN atena kuta enda.” Tapi iakap kalak ndai Lut erguro-guro saja.

15Nandangi siang erpagi-pagi duana malekat ndai ngiahken Lut gelah pedas-pedas berkat nina, “Pedasken laweslah ras ndeharandu ras duana anakndu si diberu e, gelah ola kam mate tupung kuta enda ikernepken.”

16Langa tetap ukur Lut. Tapi mekuah ate TUHAN man Lut. Erkiteken si e temuena si dua ndai negu ia ras ndeharana, bage pe duana anakna ndai ndarat i bas kuta e nari. 17Kenca bage nina sekalak malekat e, “Kiamken kelini kesahndu! Ola nulih ku pudi dingen ola ngadi i berneh. Kiamken ku das uruk-uruk gelah ola kam mate!”

18Erjabap Lut nina, “O Tuan ola min kami suruhndu kiam ku das uruk-uruk. 19Tuhu enggo isampatindu kal aku janah enggo ikelinindu kesahku. Tapi uruk-uruk ah ndauh kal, itunduk cilaka e me aku jenari mate aku ope seh i jah. 20Ma idahndu kin kuta si kitik ah? La ndauhsa. Pelepas min aku kiam ku jah gelah terkelin aku.”

21Erjabap malekat e nina, “Labo dalih. Kuta si kitik ah la kukernepken. 22Pedas dage kiamken! Sabap langa banci kubahan kai pe adi langa kam seh i jah.” Erkiteken ikataken Lut kuta e kitik, e maka ibahanna gelarna Soar.

Kuta Sodom ras Gomora ikernepken

23Matawari enggo pultak sanga Lut seh i Soar. 24Rempet idabuhken TUHAN udan kertah ras api ku kuta Sodom ras Gomora. 25Radas kernep ibahanNa kuta e, berneh-bernehna kerina, penduduk ras kasakai si turah i bas taneh e. 26Tapi ndehara Lut nulih ku pudi, e maka salih ia jadi binangun sira.

27Lampas pepagina lawes Abraham pedas-pedas ku inganna tedis i lebe-lebe TUHAN nderbih. 28Itatapna kempak kuta Sodom ras Gomora bage pe kempak berneh-berneh e kerina, janah idahna cimber i bas taneh e nari bali ras cimber api i bas ginuhur si galang nari. 29Tapi sanga Dibata ngkernepken kuta-kuta si lit i bas baluren e, e me ingan Lut, iinget Dibata si Abraham, e maka ipulahina Lut i je nari gelah selamat.

Asal kalak Moap ras Amon

30Erkiteken mbiar Lut tading i Soar, e maka miser ia ras anakna si dua e ku das uruk-uruk, janah ringan ia i bas sada gua. 31Nina anakna sintua man agina, “Bapanta enggo metua. I bas ingan enda la lit sekalak pe dilaki si banci ngempoi kita gelah banci lit anakta. 32Ota sibahan gelah mabuk bapanta, gelah banci kita medem ras, jenari lit anakta i bas ia nari.” 33I bas berngi e, ibere kalak enda bapana minem anggur, e maka anak Lut sintua ersada kula ras ia. Tapi la ieteh Lut e, erkiteken ia mabuk.

34Pepagina nina ka anakna sintua man agina, “Nderbinai aku enggo medem ras bapa; e maka si ban ka mabuk ia berngi enda, janah kenca bage medem kam ras ia gelah duana kita dat anak ibas bapanta nari.” 35E maka iberena minem bapana seh mabuk, jenari ersada kula me anak Lut si nguda ras ia. Tapi perbahan ia mabuk la ka bo ietehna kejadin e. 36Alu bage duana anak Lut ndai mehuli kulana ibahan bapana jine. 37Sintua mupus anak dilaki, janah ibahanna gelarna Moap. Ia me nini kalak Moap si genduari e. 38Singuda pe mupus sada anak dilaki ka, Benammi gelarna. Ia me nini kalak Amon si genduari e.

Pustaka Si Badia

Pustaka Si Badia, Today's Batak Karo Version © 2003, Indonesian Bible Society – Lembaga Alkitab Indonesia More Info | Version Index