Search form

KEJADIN 2

1Bage me, enggo dung ijadiken Dibata kerina si nasa lit. 2I bas wari si pepituken enggo idungi Dibata dahinNa. 3Ipasu-pasuNa wari si pepituken, iserapkenNa jadi sada wari si badia erkiteken i bas wari e enggo dung kerina si ijadikenNa, janah ngadi Ia. 4Bage me turi-turinna kerna kejadin si nasa lit enda.

Peken Eden

Sanga Dibata njadiken kerina si nasa lit, 5langa lit kai pe turah i doni. Langa lit benih ersuli, erkiteken langa ipesusur Dibata udan, janah langa lit ise pe ngusahai taneh e. 6Tapi mulai me turah ulu lau i bas taneh, janah e me erbahanca maka enggo litap kerina taneh e ibahanna. 7Ibuat TUHAN Dibata sitik abu taneh ijadikenNa jelma; iembuskenNa kesah kegeluhen ku bas igungna, e maka mulai me jelma ndai nggeluh.

8Kenca bage ibahan TUHAN Dibata sada peken i Eden, arah Timur, janah i je me itamakenNa manusia si enggo ijadikenNa e. 9IjadikenNa erbage-bage batang kayu si mehuli turah i je janah buahna pe mehuli. I tengah-tengah peken e, lit turah sada batang kayu si mereken kegeluhen ras sada batang kayu si mereken pemeteh kerna si bujur ras si jahat.

10I Eden lit sada lau belin, janah ipalerina peken e. Kenca ngepari Eden, lau ndai erbelah empat. 11Si pemena Pisun gelarna, maler ngkeleweti negeri Hawila. (12I je lit emas, si merim-merim, ras batu permata si meherga.) 13Si peduaken Gihon gelarna, maler ngkeleweti negeri Kus. 14Si peteluken, Tigris, maler arah Timur negeri Assur, janah si peempatken Eprat.

15Kenca bage, itamaken TUHAN Dibata manusia ndai i Peken Eden, guna ngusahai ras njagaisa. 16Nina Dibata man manusia, “Kerina buah batang kayu si lit i bas peken enda banci ipanndu, 17seakatan buah batang kayu si mereken pemeteh kerna si bujur ras si jahat. Buah batang kayu e la banci ipanndu; adi ipanndu, la banci lang mate kam i bas wari e.”

18Kenca bage nina ka TUHAN Dibata, “La mehuli adi manusia nggeluh sisada-sisada. Kubahanlah teman si cocok man bana, guna nampati ia.” 19E maka ibuatNa sitik abu i bas taneh nari, jenari ijadikenNa kerina rubia-rubia ras perik-perik. Kenca bage ibabaNa man manusia ndai gelah idahNa kai ibahan manusia gelar kerina rubia-rubia ras perik-perik e. Bagenda me dalanna kerina rubia-rubia e ndatken gelarna. 20Ibahan manusia e gelar kerina perik-perik ras rubia-rubia ndai, tapi sada pe la lit jadi teman si cocok nampati ia.

21Kenca bage ibahan TUHAN Dibata maka entabeh pertunduh manusia ndai, janah sanga bage, ibuatNa sada tulan rang-rangna, jenari itutupNa ka alu jukut. 22IjadikenNa sekalak diberu i bas tulan rang-rang e nari kenca bage itaruhkenNa man manusia ndai.

23Nina manusia e, “Enda nge maka enggo payo; Tulanna i bas tulanku nari, janah jukutna i bas jukutku nari. ‘Diberu’ gelarna perbahan ia ibuat i bas dilaki nari.” 24Em sabapna dilaki nadingken nande bapana, gelah ersada ia ras ndeharana, maka duana enggo jadi sada.

25Dilaki ras diberu ndai manjang-anjang duana, tapi la ia mela.

Pustaka Si Badia

Pustaka Si Badia, Today's Batak Karo Version © 2003, Indonesian Bible Society – Lembaga Alkitab Indonesia More Info | Version Index