Search form

KEJADIN 23

Sara mate. Itukur Abraham taneh ingan kuburen

1Dekahna Sara nggeluh lit 127 tahun. 2Ia mate i Hebron i taneh Kanaan, janah megogo kal ate Abraham erkiteken kematen Sara. 3Itadingkenna ingan mait ndeharana, lawes ia ku bangsa Heti, janah nina, 4“Aku kalak tandang i jenda; e maka kutukur ateku tanehndu, ingan ngkuburken ndeharangku.”

5Ijabap kalak ndai, 6“Begiken lebe Tuan. Kam iakap kami kalak si mbelin, e maka kuburkenlah ndeharandu e i bas kuburen si mejilena kal si lit i bas kami. Meriah kal ukur kami kerina mereken kuburen man bandu, gelah banci i je ikuburkenndu ndeharandu.”

7Kenca bage erjimpuh Abraham i lebe-lebe kalak enda, 8nina, “Adi senang atendu, kukuburken ateku ndeharangku i jenda. E maka pindondu sitik man Epron anak Sohar, 9maka kutukur min Gua Mahpela, si ndeher ras tepi jumana. Sungkun ia ntah banci idayakenna e bangku. Asa kai ergana banci kugalari i jenda i lebe-lebendu, gelah banci kubahan e jadi taneh kuburen sikerajangenku.”

10Tupung si e Epron sangana kundul ras kalak Heti si deban i bas ingan runggu i gerbang kuta e; asum kerina kalak megisa erjabap ia nina, 11“Begiken Tuan; kubereken man bandu kerina juma e ras gua si lit i je. I jenda i lebe-lebe bangsangku jine, kubereken man bandu ingan e gelah banci ikuburkenndu ndeharandu i je.”

12E maka erjimpuh Abraham i lebe-lebe kalak Heti e, 13jenari nina man Epron, “Ngarap aku gelah megi-megi kam kerina. Kutukur me dage juma e. Aloken lah tukurna i bas aku nari, gelah kukuburken ndeharangku ije.”

14Erjabap Epron nina, 15“Tuan, erga juma e 400 duit pirak ngenca kai lah e ertina i bas kita duana? Kuburkenlah ndeharandu i je.” 16Payo akap Abraham, e maka ibeligaina duit pirak e asa pemindon Epron si ibelaskenna i adep-adepen jelma si nterem, e me 400 duit pirak, sue ras timbangen si ipake perbinaga.

17Bage me turi-turinna, maka taneh Epron si i Mahpela, arah matawari pultak Mamre, enggo jadi sikerajangen Abraham. Si itukurna e, e me kap juma, gua si lit i bas juma e, ras kerina batang kayu si i bas juma e seh ku tepi taneh e. 18Kerina kalak Heti si ikut i bas perjumpan e, enggo jadi saksi maka taneh e genduari Abraham empuna.

19Kenca bage ikuburken Abraham ndeharana Sara i bas gua e i taneh Kanaan. 20Erkiteken si e maka juma si nai kalak Heti empuna, ras gua si lit i je, genduari enggo jadi sikerajangen Abraham si ibahanna jadi taneh kuburen.

Pustaka Si Badia

Pustaka Si Badia, Today's Batak Karo Version © 2003, Indonesian Bible Society – Lembaga Alkitab Indonesia More Info | Version Index