Search form

KEJADIN 27

Ipasu-pasu Isak si Jakup

1Tupung si e Isak enggo metua, janah enggo seleng matana. Idilona anakna sintua Esau nina man bana, “O anakku.”

“Kai, Bapa,” nina Esau ngaloi.

2Nina Isak, “Idahndu nge kap maka aku enggo metua. Tah lanai bo ndekah aku nggeluh. 3Buat dage panah ras anak panahndu. To ku kerangen kam erburu, buat sada rubia-rubia man bangku. 4Tasakken man bangku pangan si entabeh kuakap, jenari baba man bangku. Kenca kupan, kupasu-pasu ateku kam ope aku mate.”

5Tapi sanga ercakap-cakap Esau ras Isak kepeken ibegiken Ribka. E maka kenca lawes Esau erburu, 6nina Ribka man Jakup, “Enda denga nge kubegi ikataken bapandu man Esau, 7‘To buat sada rubia-rubia, tasakken e bangku. Kenca kupan, kupasu-pasu kam i lebe-lebe TUHAN ope denga aku mate.’ ”

8“E maka anakku,” nina Ribka tole, “Begiken ras ikutken kai si kukataken. 9To pilihi dua kambing si mburna, gelah kutasakken sitik pangan si ntabehna kal akap bapandu. 10Kenca bage ibabandu kari man bana gelah ipanna, maka ipasu-pasuna kam ope ia mate.”

11Tapi nina Jakup man nandena, “Ietehndu nge Esau kalak si ermbulu badanna, tapi aku lang. 12Ntah idadap bapa kari aku, ma ietehna kutipu ia? Alu bage sumpah nge dat aku, labo pasu-pasu.”

13Nina nandena, “Aku nanggungsa sumpah si seh man bandu anakku. Bahanlah bagi si kukataken, to lah buat kambing e man bangku.”

14E maka lawes Jakup muatca, ibabana man nandena, itasakkenna kuga akap Isak entabeh. 15Kenca bage ibuat Ribka me baju Esau si mejilena kal, si ibunikenna i bas rumah e, jenari isuruhna ipake Jakup. 16Itamakenna kulit kambing e i bas tan Jakup, ras bage pe i bas kerahungna si la lit mbuluna. 17Iberekenna pangan si entabeh e man Jakup, rikut pe ras roti si enggo itasakkenna.

18Kenca bage lawes me Jakup ku bapana nina, “O, Bapa!”

“Kai,” nina bapana ngaloi, “Ise kin kam?”

19“Aku kap Esau, anakndu sintua; enggo kulakoken bagi si isuruhndu. Kundul kam bapa, gelah ipanndu sitik pangan si kubaba enda, gelah ipasu-pasundu aku,” nina Jakup njabapsa.

20Nina Isak, “Uga maka bage pedasna dat kam, anakku?”

Erjabap Jakup, “TUHAN Dibatandu kap si nampati aku ndatkenca.”

21Nina Isak man Jakup, “Mari terdeheren ku jenda gelah banci kam kudadap. Tuhu kin lah kam Esau?” 22Ideheri Jakup bapana. Icikep bapana ia nina, “Sorandu bali ras sora Jakup, tanndu bali ras tan Esau. 23La itandai Isak si Jakup sabap tanna ermbulu bagi tan Esau. Menam ipasu-pasuna Jakup,” 24tapi isungkunna ka nina, “Tuhu kam Esau?”

“Tuhu Bapa,” nina Jakup.

25Nina Isak, “Baba dage sitik pangan e bangku, gelah kenca kupan, kupasu-pasu kam.” Ibaba Jakup pangan e man bapana, bage pe ibabana ka anggur man inemenna. 26Kenca bage nina bapana man bana, “Mari terdeheren, emma aku anakku.” 27Sanga iemana bapana, ianggeh Isak bau uis anakna, e maka ipasu-pasuna anakna Jakup. Nina Isak, “Bau anakku si merim bali ras bau juma si enggo ipasu-pasu TUHAN. 28Dibata mereken embun man bandu i langit nari si mahan jumandu mehumur. Ia lah si mereken man bandu mbue gandum ras anggur. 29Bangsa-bangsa jadi suruh-suruhenndu gelah, janah nembah ia kerina man bandu. Kam lah si merentah senina-seninandu, sinursur nandendu pe nembahlah man bandu. Kalak si numpahi kam, kena sumpah, kalak si masu-masu kam dat pasu-pasu.”

Esau mindo pasu-pasu man si Isak

30Kenca enggo dung Isak mereken pasu-pasuna, minter kenca Jakup lawes, reh seninana Esau i bas perburun nari. 31Ia pe nasakken pangan si entabeh, jenari ibabana ku bapana nina, “O Bapa, kekeken, pan dage pangan si kubaba enda, gelah banci aku ipasu-pasundu.”

32“Ise kin kam?” nina Isak nungkun.

“Anakndu sintua, Esau,” nina njabapsa.

33Sengget Isak, nggirgir kerina dagingna, e maka isungkunna, “Adi bage, ise dage ndai si enggo enggeleh rubia-rubia, janah si enggo mabasa bangku? Ope denga kam reh enggo kupan, enggo kupasu-pasu ia alu pemasu-masunku si pengkeri-kerinna, janah erkiteken si e enggo jadi sikerajangenna seh rasa lalap.”

34Kenca ibegi Esau e, serko ia alu sora megang. Ngilas kal akapna, janah nina, “Aku pe pasu-pasu min, Pa!”

35Nina Isak njabapsa, “Enggo ndai reh agindu, itipuna aku. Enggo ibuatna pasu-pasundu.”

36Nina Esau, “Enda me pedua kaliken aku itipuna. Payo me gelarna Jakup. Enggo ibuatna hakku selaku anak sintua, genduari pasu-pasungku ka ibuatna. Lanai nge lit pasu-pasundu si man bangku?”

37Nina Isak njabapsa, “Enggo kubahan ia jadi tuanndu, enggo kubahan maka kerina senina-seninana jadi suruh-suruhenna. Enggo kubereken man bana gandum ras anggur. Genduari kai kal pe lanai banci kubahan man bandu anakku!”

38Isekseki Esau lalap bapana nina, “Sada kin ngenca pasu-pasundu, Bapa? Aku pe pasu-pasu min!” E maka mulai ia tangis.

39E maka nina Isak man bana,

“Lanai lit embun i langit nari man bandu,

lanai lit juma si mehumur man bandu.

40Kam nggeluh arah pedangndu,

tapi kam suruh-suruhen seninandu.

Tapi bage pe, adi la kam nggit,

kam banci nangtang i bas kuasana nari.”

41Erkiteken si e nembeh ate Esau man Jakup, perban bapana enggo mereken pasu-pasuna man Jakup. Rukur ia, “Bapangku lanai bo kap ndekah nggeluh, kenca e pagi kubunuh Jakup.”

42Tapi ieteh Ribka sura-sura Esau, e maka isuruhna kalak ndilo Jakup, janah nina, “Begiken, kakandu Esau erbalas atena man bandu janah ibunuhna atena kam. 43E maka genduari o anakku, bahanlah bagi si kukataken e. Minterlah kam lawes ndahi turangku Laban i Haran. 44Ras ia me kam lebe, nimai ngadi nembeh ate kakandu, 45seh ngayak lupa ia perbahanenndu man bana. Kenca bage kusuruh denggo si ngalo-ngalo kam mulih. Sabap la ateku bene anakku duana i bas sada wari.”

Isuruh Isak si Jakup ndahi Laban

46Nina Ribka man Isak, “Ngelabuh aku erkiteken diberu bangsa Heti, ndehara Esau ah. Adi si Jakup pe muat singuda-nguda bangsa Heti jadi ndeharana, kai nari gunana aku nggeluh?”

Pustaka Si Badia

Pustaka Si Badia, Today's Batak Karo Version © 2003, Indonesian Bible Society – Lembaga Alkitab Indonesia More Info | Version Index