Search form

KEJADIN 29

Jakup seh i rumah Laban

1Iterusken Jakup perdalanenna, lawes ia kempak negeri Timur. 2Rempet idahna sada sumur i bas mbalmbal i keleweti telu terpuk biri-biri si sangana gempang i je ibere minem i bas sumur e nari, janah i bas lubang sumur lit sada batu galang man tutupna. 3Sanga pulung asuh-asuhen e ku je kerina, igulingken permakan batu e, jenari ibere minemna asuh-asuhen e. Kenca dung minem e maka iulihkenna ka batu ndai ku inganna.

4Nungkun Jakup man permakan ndai nina, “O teman-temanku, i ja nari kam kerina?”

“I Haran nari,” nina kalak ndai njabapsa.

5Nungkun ka Jakup, “Itandaindu kang Laban kempu Nahor?”

“Tandai kami,” nina kalak ndai njabapsa.

6“Ma sehat-sehat nge ia?” nina nungkun. “Sehat,” nina kalak enda njabapsa. “Ah kap anakna Rahel reh ku jenda nggera asuh-asuhen bapana.”

7Nina Jakup, “Adi langa bo ben, janah langa bo pekarangken ngkai maka la ibere minemndu lebe asuh-asuhenndu, kenca bage igera ka mulihken ku mbalmbal?”

8Nina kalak enda njabapsa, “La banci bage adi langa pulung kerina asuh-asuhen e i jenda; kenca e kari maka banci igulingken batu e, jenari asuh-asuhen e enggo banci ibere minem kami.”

9Sanga ngerana denga Jakup ras permakan e, seh Rahel i je ras asuh-asuhen bapana. 10Kenca iidah Jakup si Rahel ras biri-biri mamana Laban, lawes Jakup ku sumur e, igulingkenna batu, ibere minemna biri-biri ndai. 11Kenca bage iemana Rahel, janah tangis perban riahna ukurna. 12Iturikenna man Rahel, “Aku kap anak Ribka, turang bapandu.”

E maka kiam Rahel ngatakenca man bapana. 13Kenca ibegi Laban kerna beberena Jakup, kiam ia njumpaisa, idakepna, iemaina, jenari ibabana ku rumah. Ituriken Jakup kerina kai si enggo jadi. 14Kenca si e nina Laban, “Payo, kam tuhu-tuhu nge sada dareh ras aku.” Tading me Jakup i je sada bulan dekahna.

Jakup erdahin jadi suruh-suruhen Laban ndatken Rahel ras Lea

15Nina Laban man Jakup, “Situhuna la patut kam erdahin nampati aku adi la kam dat kai pe, aminna gia kam keluargangku. E maka, kai atendu upahndu?” 16Lit dua kalak anak Laban diberu; sintua Lea gelarna, singuda Rahel. 17Mata Lea tuhu mejile; tapi potongen badan Rahel seh kal jilena.

18Jakup ngena atena Rahel, e maka nina man mamana, “Nggit aku pitu tahun erdahin ras kam, gelah iberendu aku erjabu ras anakndu si nguda Rahel.”

19Nina Laban njabapsa, “Ulin kuakap merekenca man bandu asang man ise pe. E maka jenda me kita ras.” 20E maka erdahin me Jakup pitu tahun dekahna lako ndatken Rahel, tapi bagi piga-piga wari ngenca akapna sipitu tahun e, perban ngenana atena ngenen Rahel.

21Kenca seh paksana nina Jakup man mamana Laban, “Enggo seh pitu tahun; erjabu me kami ras anakndu.” 22Erkiteken si e ikataken Laban me kerina si man katanken ku kerja erdemu bayu anakna. 23Tapi i bas berngi e labo Rahel si ibereken Laban man Jakup, tapi Lea, e maka ras ia medem bagi arusna kalak erjabu.

24(Ibereken Laban budakna si diberu, e me Silpa jadi budak Lea.) 25Pepagina maka enggo ieteh Jakup maka Lea nge kepeken si iempoina e. E maka idahina Laban nina, “Uga perbahanenndu e bangku? Aku erdahin gelah Rahel bangku. Engkai maka itipundu aku?”

26Nina Laban njabapsa, “Rikutken adat si i jenda la banci anak si nguda leben erjabu asang kakana. 27Timai seminggu nari dekahna seh enggo dung adat kerja enda; kenca bage banci kubereken man bandu Rahel, adi nggit kam erdahin pitu tahun nari ras aku.”

28Jakup setuju, janah kenca enggo lepas kerja erdemu bayu e, iberekenna ka anakna Rahel man Jakup jadi ndeharana. ( 29Ibereken Laban budakna si diberu Bilha jadi budak Rahel, anakna.) 30Dagina erjabu Jakub ras Rahel, janah ngenan atena man Rahel asang Lea. Pitu tahun nari ka ia erdahin ras Laban.

Anak-anak Jakup

31Perban idah TUHAN maka ngenan ate Jakup nandangi Rahel asangken man Lea e maka ibere TUHAN maka Lea banci mupus, tapi Rahel lang. 32Mehuli kula Lea, ipupusna sada anak dilaki. Nina, “Enggo idah TUHAN kiniseranku, genduari tentu ikelengi perbulangenku aku.” E maka Ruben ibahanna gelar anakna. 33Mehuli ka kulana, tubuh ka sada anakna dilaki e maka nina, “Enggo ka ibereken TUHAN anak dilaki erkiteken ibegiNa aku la ikelengi.” E maka Simeon ibahanna gelarna.

34Sekali nari mehuli ka kulana, tubuh ka anakna dilaki nina, “Genduari la banci lang erpelcikna perbulangenku teriket man bangku perban enggo kupupus man bana telu anak dilaki.” E maka ibahanna gelar anakna e Lewi.

35Kenca bage mehuli ka kulana; tubuh ka anakna dilaki si deban nina, “Genduari kupuji TUHAN.” E maka ibahanna gelar anak e Juda. Kenca bage ngadi ia mupus.

Pustaka Si Badia

Pustaka Si Badia, Today's Batak Karo Version © 2003, Indonesian Bible Society – Lembaga Alkitab Indonesia More Info | Version Index