Search form

KEJADIN 31

Jakup kiam nadingken Laban

1Jakup megi anak Laban si dilaki ngerana, “Enggo ibuat Jakup kerina sikerajangen bapanta. Kerina kebayakenna rehna i bas sikerajangen bapanta nari.” 2Idah Jakup pe maka Laban lanai bagi si gelgel e ulina. 3E maka nina TUHAN bana, “Mulihlah kam ku taneh bapandu, ku keluargandu. Aku ras kam.”

4Erkiteken si e itenahken Jakup si Rahel ras Lea njumpai ia i mbalmbal ingan asuh-asuhen e. 5Nina man bana duana, “Enggo kuperdiateken maka bapandu lanai bagi si gelgel e ulina man bangku; tapi Dibata bapangku tetap ras aku. 6Itehndu duana, aku enggo erdahin ras bapandu asa gegehku. 7E pe i tebu-tebuna kang aku. Enggo sepuluh kali iubah-ubahna upahku. Tapi la ipelepas Dibata aku bene ibahan kejahatenna. 8Adi ikataken Laban kenca, ‘Kasa kai kambing si meruntik jadi upahndu,’ e maka kerina ka asuh-asuhen e meruntik anakna. Kenca ikataken Laban, ‘Kasa kai si mekambing jadi upahndu,’ e maka kerina ka asuh-asuhen e mekambing anakna. 9Enggo ibuat Dibata asuh-asuhen bapandu janah iberekenNa man bangku.

10Sanga asuh-asuhen paksa si ikut-ikuten, ernipi aku maka kuidah kerina kambing bajar si kawin ras beruna e, rupana ergaris-garis, mekambing ras meruntik. 11Ngerana malekat Dibata man bangku i bas nipi e nina, ‘O Jakup!’ ‘Kai,’ ningku. 12‘Nen,’ nina, ‘Bajar si kawin ras beruna e, kerina ergaris-garis, mekambing, ras meruntik rupana. Enda Kubahan erkiteken enggo Kuidah kerina perbahanen Laban man bandu. 13Aku kap Dibata si teridah bandu i Betel. Tupung si e ipajekkenndu sada batu jadi peringet-ingeten, janah iamburkenndu minak saitun i babona tandana maka batu e enggo ipersembahkenndu, janah i je enggo kam erpadan man bangKu. Genduari ersikaplah kam mulih ku taneh inganndu tubuh ndube!’ ”

14Nina Rahel ras Lea ngaloi Jakup, “Lanai kap lit kai pe tading-tadingen man kami i bas bapa kami nari. 15Enggo seri akapna kami ras kalak tandang-tandang. Idayakenna kami, janah genduari enggo ikerikenna kerina tukur kami e. 16Kerina kebayaken enda si enggo ibuat Dibata i bas bapa kami nari e me sikerajangen kami ras anak-anak kami. Bahan lah kai si enggo ikataken Dibata man bandu.”

17-18E maka ersikap Jakup mulih ndahi bapana i taneh Kanaan. Itamakenna anak-anakna ras duana ndeharana ku das unta, jenari igerana kerina asuh-asuhenna leben asa ia ras kasa si idatna i Mesopotami. 19Sanga si e Laban enggo lawes nggunting mbulu biri-birina. Tupung si e me ibabaken Rahel gana-gana si ni pajuh keluarga bapana.

20Iakali Jakup si Laban, e maka la ikatakenna perberkatna. 21Ibuatna kerina sikerajangenna, pedas-pedas ia lawes. Ikeparina Lau Eprat, jenari erdalan ia kempak deleng Gileat.

Iayaki Laban si Jakup

22Kenca telu wari maka tereteh man Laban maka Jakup enggo kiam. 23E maka ibuatna anak buahna, ras ia lawes ngayaki Jakup. Kenca pitu wari, itundukna Jakup i deleng Gileat. 24Berngi e reh Dibata ndahi Laban i bas nipina nina, “Ola sitik pe belaskenndu kata-kata si la mehuli man Jakup.” 25Tupung itunduk Laban si Jakup, Jakup enggo majekken kemahna i datas sada deleng, janah Laban ras anak buahna pe erbahan kemahna ka i datas deleng-deleng Gileat.

26Nina Laban man Jakup, “Engkai maka itipundu aku, janah ibabakenndu anakku ena duana bali ras tahanen perang? 27Engkai maka itipundu aku, janah kiam kam alu erbuni-buni dingen la ngata bangku? Adi ngata min ndai kam, tentu kutaruhken kam alu meriah ukur, rende, ralep-alep, alu gendang ras kulcapi. 28La ipelepasndu pe kuema kempungku ras anakku ena duana lako ngataken mejuah-juah i bas dalan. Bodoh perbahanenndu. 29Lit kuasangku erbahan atendu mesui, tapi berngi rebih nai Dibata bapandu ngataken man bangku gelah ola sitik pe kubelasken kata-kata si la mehuli man bandu. 30Kueteh nge maka kam lawes perbahan tedeh atendu mulih, tapi engkai ka maka itangkondu gana-gana pajuh-pajuhen keluargangku?”

31Nina Jakup njabapsa, “La aku ngata lawes erkiteken mbiar aku ibuatndu mulihi anakndu e duana. 32Tapi adi i bas ise kari i jenda datndu gana-ganandu e, bunuh ia. Kalak enda kerina jadi saksi i jenda, e maka daramilah kai i je barangndu, janah buat kai sikerajangenndu.” La ieteh Jakup maka Rahel nge si muat gana-gana Laban e.

33Lawes Laban nggargari kemah Jakup. Kenca e lawes ia ku kemah Lea, terus ku kemah budak diberu e duana, tapi la datca gana-ganana e. E maka lawes ia ku kemah Rahel. 34Sanga si e ibuat Rahel gana-gana, jenari itamakenna i bas tas pelana untana, janah kundul ia i babona. Igargari Laban kerina kemah e, tapi la idatca. 35Nina Rahel man bapana, “Ola kam nembeh man bangku bapa; la aku banci tedis i lebe-lebendu erkiteken sangana reh bulanku.” Igargari Laban kerina tapi la idatca gana-gana si nipajuh keluargana e. 36Kenca bage enggo bene kesabaren Jakup, “Kejahaten kai kin si enggo kubahan?” nina nungkun alu merawa. “Undang-undang kai kin nge enggo kulanggar, maka iayakindu aku? 37Genduari enggo igargarindu kerina barang-barang; lit dage i je dat kam sikerajangenndu? Amparken i jenda gelah banci idah anak buahndu ras anak buahku. Kalak enda kari metehsa ise kita si bujur. 38Enggo dua puluh tahun aku ras kam. Biri-biri ras kambingndu la pernah molas. La pernah kupan sada pe bajar biri-biri asuh-asuhenndu. 39Adi lit kenca biri-biri si mate ipan rubia-rubia si merawa aku saja ngenca rusur nggengkenca. La kukataken pe man bandu maka labo e salahku. Ipindondu maka kuganti kerina si bene subuk suari ntah pe berngi. 40Megati mesui ateku iparpari las suari, ras bergehen sanga berngi. Megati pe aku la banci tunduh. 41Bagem rusur kecibalku kidekah dua puluh tahun aku erdahin ras kam. Sepuluh empat tahun dekahna aku erdahin ras kam lako ndatken duana anakndu; enem tahun aku erdahin ngasuhi asuh-asuhenndu. Amin bage pe isambarindu kang upahku sepuluh kali. 42Adi la kin erkiteken iarak-arak Dibata bapangku aku, e me Dibata si isembah Abraham ras Isak, enggo me aku ipelawesndu pe ngambe-ngambe. Tapi iidah Dibata kiniseranku ras kelatihenku, e maka iberekenNa keputusenNa.”

Perpadanen Jakup ras Laban

43Ijabap Laban Jakup nina, “Diberundu enda duana anakku; anakna pe sikerajangenku, asuh-asuhen enda pe aku empuna. Situhuna kal, kerina siidahndu i jenda ajangku kerina. Tapi erkiteken la tertagangi aku anakku enda duana, bage pe ras anak-anak e, 44nggit aku erbahan perpadanen ras kam. Mari sipegun-gun batu lako ngingetken kita kerna perpadanenta.”

45E maka ibuat Jakup sada batu, ipajekkenna jadi batu peringet-ingeten. 46Isuruhna anak buahna pepulung batu, jenari ipegun-gunna. E maka man kalak enda i deher pinugun batu e. 47Iban Laban gelar pinugun batu ndai, “Jegar Sahaduta”, tapi Jakup nggelarisa “Galet”. 48Nina Laban man Jakup, “Pinugun batu jadi peringet-ingeten man banta duana.” Em sabapna maka ibahan gelar ingan e Galet. 49Nina ka Laban tole, “Dibatalah singarak-ngarak kita amin gia kita sirang pedauh.” Enda ka pe sabapna maka ingan e igelari Mispa. 50Iterusken Laban cakapna nina, “Adi igasgasindu anakku enda duana, ntah empo ka kam ras diberu si deban, aminna pe la kueteh, ingetlah maka Dibata si mperdiateken kita. 51Enda me batu si enggo kupegun-gun jadi baleng i bas kita duana, janah enda me batu peringet-ingeten e. 52Duana pinugun batu e jadi tanda persinget man banta. Ndigan pe la kulewati pinugun batu enda merang kam, janah kam pe la banci ngelewati batu peringet-ingeten enda ngelawan aku. 53Dibata si Abraham ras Dibata Nahor pagi singadili kita.” E maka i bas gelar Dibata sinisembah bapana Isak, ersumpah Jakup matuhi perarihen e.

54Igelehna sada rubia-rubia, ipersembahkenna jadi kurban persembahen i das deleng ndai. Jenari idilona anak buahna gelah man ras-ras. Kenca elah man, i das deleng e kalak enda erberngi. 55Pepagina erpagi-pagi iema Laban kempuna ras duana anakna ngataken mejuah-juah i bas perdalanen, e maka lawes ia mulih ku kutana.

Pustaka Si Badia

Pustaka Si Badia, Today's Batak Karo Version © 2003, Indonesian Bible Society – Lembaga Alkitab Indonesia More Info | Version Index