Search form

KEJADIN 33

Ijumpai Jakup si Esau

1Idah Jakup si Esau reh ras 400 anak buahna, e maka ibagi Jakup anak-anak si Lea, Rahel, ras anak-anak suruh-suruhenna duana si enggo jadi ndeharana e. 2Ipelebena suruh-suruhen si enggo jadi ndeharana ras anakna arah lebe kal, jenari Lea ras anakna, janah si arah pudina e me Rahel ras Jusup. 3Jakup erdalan ngelebei kerina, jenari nembah mungkuk ia pitu kali seh ku taneh ndeheri seninana. 4Tapi kiam Esau njumpai ia, idakepina Jakup ras iemaina. Tangis ia duana. 5Asum ipernehen Esau sekelewetna janah idahna diberu-diberu ras anak-anak, nungkun ia, “Ise enda kerina si ras kam e?”

“Kalak enda kerina, o Tuan, e me anak-anak si enggo ibereken Dibata man bangku erkiteken lias ateNa,” nina Jakup njabapsa. 6E maka reh suruh-suruhen si enggo jadi ndeharana ras anak-anakna erjimpuh nembah. 7Kenca bage reh Lea ras anak-anakna, janah si perpudina kal reh Rahel ras Jusup; erjimpuh ia kerina nembah.

8Nungkun Esau, “Uga kerna terpuk si sada nari si aku jumpa ndai? Kai ertina e?”

Nina Jakup njabapsa, “E mindo perkuah atendu, Tuanku.”

9Tapi nina Esau, “Bas aku pe enggo bias agingku, la padah iberekenndu bangku.” 10Nina Jakup, “Lang, la banci bage; adi payo kin mekuah atendu, alokenlah pemerengku e. Ngidah ayondu saja bali kuakap bagi natap ayo Dibata, perban ulina perbahanenndu man bangku. 11E maka alokenlah pemere enda, si enggo kubaba man bandu. Enggo seh kal ulina perbahanen Dibata man bangku, enggo iberekenNa bangku kerina keperlunku.” Mesek-sek ipindona man Esau e maka ialokenna dungna.

12Nina Esau, “Ersikaplah kita gelah sitadingken ingan enda. Aku erdalin i lebendu.”

13Nina Jakup njabapsa, “Ietehndu nge kap anak-anak enda la megegeh. Janah aku arus ngukuri biri-biri, bage pe lembu ras anakna denga. Adi terus erdalan sada wari, mate me asuh-asuhen e kerina. 14Lebe lah kam, reh aku arah pudi manjar-anjar asa ngasup kami rikut ras lembu bage pe anak-anak enda. I Edom kita jumpa.”

15Nina Esau, “Adi bage kin kutadingken saja deba anak buahku ras kam.” Tapi nina Jakup, “Adi la akapndu dalih, labo padah tadingken anak buahndu e.”

16Bage me i bas wari e mulih me Esau ku Edom. 17Tapi Jakup lawes ku Sukot. Ipajekkenna rumahna i je bage pe sapo-sapo man ingan cicio asuh-asuhenna. Em sabapna maka gelarna ingan e Sukot.

18I bas perdalanenna mulih i Mesopotami nari, seh ia alu mejuah-juah i Sikem i taneh Kanaan. Ipajekkenna kemahna i bas sada mbalmbal deher kuta e. 19Itukurna juma e i bas keturunen Hamor bapa Sikem, ergana 100 duit pirak. 20Ipajekkenna sada batar-batar ingan ersembah i je, janah ibahanna gelarna: El, Dibata kalak Israel.

Pustaka Si Badia

Pustaka Si Badia, Today's Batak Karo Version © 2003, Indonesian Bible Society – Lembaga Alkitab Indonesia More Info | Version Index