Search form

KEJADIN 44

Calung si bene

1Iperentahken Jusup man suruh-suruhen si ngurus rumahna, “Asak guni kalak enda alu pangan asa terbabasa, janah tamaken senna e i bas gunina sekalak-sekalak. 2Tamaken calung ingan minemku, calung pirak e, i bas guni agina si nguda radu ras sen penukur gandum e.” Ilakoken suruh-suruhen bagi si iperentahken Jusup. 3Pagina lampas erpagi-pagi ipeberkat me kalak enda ras keledena kerina. 4Langa ndauhsa kalak enda nadingken kuta e nina Jusup man suruh-suruhenna, “Pedasken ayaki kalak ndai. Kenca enggo tundukndu kalak e sungkun ia, ‘Engkai maka ibalasndu perbahanen si mehuli alu perbahanen si jahat? 5Engkai maka itangkondu calung pirak tuanku? E kap ingan minemna, si ipakena guna meteh kejadin si reh alu ertendung. Jahat kal perbahanenndu e!’ ”

6Kenca itunduksa kalak e iulihina ka ngatakenca bagi si ndai man kalak e. 7Nina kalak enda njabap suruh-suruhen e, “Kai tujunna cakapndu e, Tuan? Ersumpah kami maka la lit ibahan kami si bage. 8Ietehndu ibaba kami mulih i taneh Kanaan nari duit si idat kami i bas guni kami. I ja nge kami nggit nangko pirak tah emas i bas rumah tuanndu nari? 9Tuan, adi lit sekalak i bas kami terdat i bassa, ukum mate ia, janah kami kerina jadi budakndu.”

10Nina suruh-suruhen e, “Payo kuakap; tapi kalak si muniken calung e saja ngenca jadi budakku, si debanna banci mulih alu bebas.” 11E maka pedas ipesusur kalak enda gunina, janah tep-tep kalak nalangi karungna. 12Alu megermet ipepayo suruh-suruhen ndai guni kalak e, menaken i bas sintua nari seh ku si nguda; dungna terdat calung e i bas karung Benyamin. 13E maka iamparkenna barang-barangna ku das keledena, mulihken ia kerina ku kuta e.

14Kenca Juda ras senina-seninana seh i rumah Jusup, idapetina Jusup i je. Erjimpuh kalak enda i lebe-lebena. 15Nina Jusup, “Uga nge perbahanenndu e? La kin ietehndu maka kalak si erkuasa bagi aku enda banci meteh ukur alu ertendung?”

16Nina Juda njabapsa, “Uga denga nge ningkami man bandu Tuan? Uga nari ningkami pebujur diri kami? Enggo icidahken Dibata kesalahen kami. Genduari kerina kami jadi budakndu, la saja kalak si i bas ia terdat calung e.”

17Nina Jusup, “E, lang! La aku nggit erban bage. Kalak si muat calung e saja nge ngenca jadi budakku. Si debanna banci mulih alu mejuah-juah ndahi bapandu.”

Pemindon Juda man Jusup kerna Benyamin

18Reh Juda ndeheri Jusup nina, “Sentabi, Tuan, ngarap aku maka iberendu min aku ngerana man bandu alu bebas. Ola kam nembeh; sabap iakap kami bali nge kam ras raja negeri enda. 19O, Tuan, isungkunndu kami, ‘Lit denga nge bapandu tah seninandu si deban?’ 20Ngaloi kami, ‘Lit denga bapa kami si enggo metua, bage pe agi kami si nguda; ia tubuh kenca bapa kami enggo metua. Seninana sada nande sada bapa enggo mate, e maka ia naring tading anak nandena. Lanai kal lang-lang kelengna ate bapana man bana.’ 21Tuan, isuruhndu kami maba ia ku jenda, gelah banci idahndu ia. 22Ningkami njabap kam, ‘La banci itadingken anak e bapana; adi itadingkenna, mate me bapana.’ 23E maka nindu, ‘La banci kam reh ngadap man bangku adi la ras agindu si nguda.’

24Sanga kami mulih ku bapa kami ituriken kami man bana kai si enggo ikatakenndu. 25Asum isuruhna ka kami mulihken ku jenda nukur pangan man kami, 26ningkami njabapsa, ‘La banci kami lawes; labo kami ibere ngadap wakil raja e pala ikut agi kami si nguda. Banci kami lawes adi agi kami si nguda pe ikut ras kami.’ 27Nina bapa man kami, ‘Ietehndu nge maka ndeharangku si Rahel dua ngenca anakna. 28Sekalak i bas ia enggo nadingken aku. Ugapa pe enggo me ia icaing-caing rubia-rubia si merawa, sabap lanai pernah ia kuidah kenca ia lawes. 29Adi si sada enda pe ibuatndu ka genduari i bas aku nari, janah kune kenca kai-kai jadi man bana, ugapa pe mate naring aku erkiteken ceda ate si ibahanndu e, sabap aku enggo metua.’ ”

30-31“E maka genduari Tuan,” nina Juda nerusken cakapna, “adi mulihken aku ndahi bapa la ras anak e, kenca idahna anak e la ras aku, mate me ia. Kesahna tergantung man kesah anak enda, janah erkiteken enggo bage ia tuana, ugapa pe mate naring ia erkiteken ceda-ate si ibahan kami man bana. 32Lang pe, enggo aku erpadan man bana maka kuasamken kesahku guna keselamaten anak e. Kukataken man bana, adi la kubaba anak e mulihken man bana, kupersan kesalahen e kidekah geluhku. 33E maka genduari Tuan, aku me tading i jenda jadi budakndu gancih anak e; pelepas ia mulih ras senina-seninana. 34Uga nge ningku mulih njumpai bapangku adi anak e la ras aku? La aku ngasup ngidah mara si bage jadi man bapangku.”

Pustaka Si Badia

Pustaka Si Badia, Today's Batak Karo Version © 2003, Indonesian Bible Society – Lembaga Alkitab Indonesia More Info | Version Index