Search form

KEJADIN 46

Jakup ras keluargana lawes ku Mesir

1Isikapken Jakup kerina ertana, e maka lawes ia ku Berseba, guna erbahan persembahen man Dibata bapana Isak. 2Ngerana Dibata man bana i bas sada pengenehenen sanga berngi nina erlebuh, “Jakup, Jakup!”

“Kai, enda aku,” nina ngaloi.

3“Aku kap Dibata bapandu,” niNa. “Ola kam mbiar lawes ku Mesir. Aku erbahanca maka kesusurenndu jadi bangsa si mbelin i jah. 4Aku nemani kam lawes ku Mesir, janah aku ka denggo maba si nursurndu mulih ku taneh enda. Jusup pagi si ngadep-ngadep kam asum kam mate.”

5Berkat Jakup i Berseba nari. Itamaken anak-anakna ia ku datas gereta si ikirem raja Mesir, danak-danak si kitik denga, ras diberu itamaken kerina ku datas gereta e. 6Ibuat kalak enda asuh-asuhenna ras kerina erta-ertana si idatca i Kanaan, e maka lawes ia ku Mesir. Ibaba Jakup kerina kesusurenna, e me 7anakna si dilaki ras si diberu, kempuna si dilaki ras si diberu.

8Enda me keluarga Jakup si lawes ras ia ku Mesir, 9anakna sintua, e me Ruben, anak Ruben si dilaki e me: Enoh, Palu, Hesron, ras Karmi. 10Simeon ras anakna si dilaki: Jemuel, Jamin, Ohad, Jakin, Sohar, ras Saul nandena kalak Kanaan. 11Lewi ras anak-anakna e si dilaki: Gerson, Kohat, ras Merari. 12Juda ras anak-anakna si dilaki: Sela, Peres, Serah. (Anak-anak dilaki Juda si deban e me Er, ras Onan, enggo mate i Kanaan.) Anak Peres si dilaki e me: Hesron, ras Hamul. 13Isakar ras anak-anakna si dilaki e me: Tola, Pua, Jasup ras Simron. 14Sebulon ras anak-anakna si dilaki: Sered, Elon, Jahleel. 15Enda me anak-anak dilaki si tubuh arah Lea man Jakup i Mesopotami, tambah sekalak anakna diberu, Dina gelarna. Kerina kesusuren Jakup arah si Lea lit telu puluh telu kalak teremna.

16Gat ras anak-anakna si dilaki e me: Sipion, Hagi, Suni, Esbon, Eri, Arodi, ras Areli. 17Aser ras anak-anakna si dilaki e me: Jimna, Ispa, Ispi, Beria ras turangna si Sera. Anak Beria e me Heber ras Malkiel. 18Si sepuluh enem kalak enda e me kesusuren Jakup arah si Silpa. Silpa e me budak diberu si ibereken Laban man anakna Lea.

19Rahel, ndehara Jakup, mupus dua anak dilaki e me: Jusup ras Benyamin. 20I Mesir, enggo lit dua anak Jusup dilaki e me: Manase ras Eperaim, si ipupus ndeharana Asnat, anak si Potipera, sekalak imam i Heliopolis. 21Anak Benyamin si dilaki e me: Bela, Beker, Asbel, Gera, Naaman, Ehi, Ros, Mupim, Hupim, ras Ared. 22Si sepuluh empat kalak enda e me kesusuren Jakup arah si Rahel.

23Dan ras anakna Husim. 24Naptali ras anak-anakna si dilaki e me: Jahseel, Guni, Jeser, ras Silem.

25Si pitu kalak enda e me kesusuren Jakup arah si Bilha. Bilha e me budak diberu si ibereken Laban man anakna Rahel.

26Teremna kesusuren Jakup si lawes ku Mesir lit enem puluh enem kalak, la ibeligai ndehara anak-anakna. 27Dua anak Jusup si dilaki tubuh i Mesir, e maka lit pitu puluh kalak kerina keluarga Jakup lawes ku Mesir.

Jakup ras keluargana i Mesir

28Ipelebe Jakup si Juda gelah ialo-alo Jusup kalak enda i Gosen. Kenca kalak enda seh, 29inangkihi Jusup geretana, lawes ku Gosen ngalo-ngalo bapana. Kenca jumpa, idakepina kerahung bapana, janah ndekah kal ia tangis. 30Nina Jakup man Jusup, “Genduari enggo sikap aku bicara mate pe, sabap enggo kuidah kam, janah kueteh maka nggeluh denga kam.”

31E maka nina Jusup man senina-seninana bage pe man kerina keluarga bapana, “Arus aku lawes erkata man raja, maka senina-seninangku ras kerina keluarga bapangku si gelgel nari tading i Kanaan reh ndahi aku. 32Kukataken man raja maka kam kerina kalak permakan, ngasuhi asuh-asuhen, janah enggo ibabandu biri-biri ras lembu bage pe kerina ertandu. 33Sanga ilebuh raja kam kari, adi isungkunna kai pendahinndu, 34katakenlah maka gedang-gedang geluhndu, dahinndu e me ermakan bali ras nini-ninindu. Alu bage tentu iberena kam kerina ringan i Gosen.” Ikataken Jusup bage erkiteken kalak Mesir la nggit sitik pe campur ras kalak permakan.

Pustaka Si Badia

Pustaka Si Badia, Today's Batak Karo Version © 2003, Indonesian Bible Society – Lembaga Alkitab Indonesia More Info | Version Index