Search form

KEJADIN 47

1E maka ibaba Jusup lima kalak seninana ngadap man raja. Ikatakenna man raja, “Bapangku ras seninangku enggo reh i Kanaan nari rikut ras biri-birina, lembuna ras erta-ertana kerina. Genduari ia sangana i daerah Gosen.” 2Kenca bage ipetandakenna senina-senina e man raja. 3Isungkun raja kalak enda nina, “Kai pendahinndu?”

Nina kalak enda njabapsa, “Kami kalak permakan, Tuan, bali ras nini-nini kami. 4Kami enggo reh ku jenda ate kami tading i bas negeri enda, sabap kelihen i taneh Kanaan seh kelekna, seh maka lanai lit dukut pe man gagaten asuh-asuhen kami. Adi banci i daerah Gosen min kami ringan.” 5Nina raja man Jusup, “Erkiteken bapa ras seninandu enggo seh, 6taneh Mesir enda jadi si kerajangenna. Bereken daerah Gosen man inganna sabap daerah e kap si mejilena i bas negeri enda. Adi lit ia si ngasup, suruh lah ermakan asuh-asuhenku pe.”

7Kenca si e ibabana bapana ngadap man raja. Ipasu-pasu Jakup raja e. 8Isungkun raja ia nina, “Piga tahun enggo umurndu?”

9“Dekahna aku nggeluh erpindah-pindah lit seratus telu puluh tahun. Tahun-tahun geluhku e la kap ndekah, dem alu kiniseran, la seh asa umur nini-niningku asum ia nggeluh erpindah-pindah,” nina Jakup njabapsa. 10Ibereken Jakup tole pasu-pasuna man raja jenari lawes ia.

11Kenca bage ipetetap Jusup me bapa ras senina-seninana ringan i taneh Mesir. Iberekenna man kalak enda taneh arah ingan si mejilena i negeri e, ndeher ras kuta Ramses, sue ras si iperentahken raja. 12Isikapken Jusup nakan man bapana, senina-seninana kerina ras keluarga bapana si deban, seh ku bas anak si ngudana kal pe.

Kelihen

13Kelihen si jadi e lanai teralang serana seh maka ijapa pe lanai lit pangan. Kerina rayat Mesir ras Kanaan enggo kote erkiteken kelihen e.

14Penukur gandum kalak enda ipepulung Jusup kerina, jenari ibabana ku istana raja. 15Kenca kerina duit i Mesir ras i Kanaan enggo keri itukurken nakan, rehen me kalak Mesir ndahi Jusup nina, “Bereken pangan man kami! Ola pelepas kami mate. Sampatilah, sabap sen kami enggo keri.”

16Nina Jusup ngaloi, “Adi enggo keri senndu, baba asuh-asuhenndu ku jenda. Aku mereken panganndu ganti asuh-asuhen e.” 17E maka ibaba kalak enda me kerina asuh-asuhenna man Jusup, janah ibereken Jusup pangan man bana ganti kuda, biri-biri, kambing, lembu ras kelede kalak enda. I bas tahun e iberekenna nakan man kalak enda, ganti kerina asuh-asuhenna.

18Kenca lepas tahun si e, reh ka kalak enda ndahi Jusup nina, “La kami erbuni-buni man bandu, o Tuan, maka duit kami enggo keri kerina dingen asuh-asuhen kami enggo jadi si kerajangenndu. Lanai lit kai pe si man berenken kami bandu, seakatan diri kami ras taneh kami. 19Ola pelepas kami mate. Sampati lah! Ola pediat juma kami terulang. Tukurlah kami ras taneh kami jadi ganti pangan. Jadi budak raja gia kami, janah taneh kami pe raja gia empuna. Bere min kami pangan gelah ola kami mate, ras pe benih gelah banci kami merdang i juma kami.”

20Itukuri Jusup kerina taneh i Mesir jadi erta raja. Tep-tep kalak Mesir terpaksa ndayaken tanehna perban kelihen e lanai teralang kelekna. Erkiteken si e kerina taneh i Mesir enggo jadi si kerajangen raja.

21Kerina rayat Mesir enggo jadi budak ibahan Jusup. 22Taneh imam-imam nari ngenca la itukurna. Imam-imam e la perlu ndayaken tanehna perban ibereken raja nge gajina asa cukupna. 23Nina Jusup man rayat, “Itehndu maka kam ras tanehndu enggo kutukur jadi sikerajangen raja. Enda dage benih gelah merdang kam i jumandu. 24Adi enggo rani arus iberekenndu seperlimana man raja. Si lebihna banci ipakendu jadi benih ras man panganndu ras keluargandu.”

25Nina kalak enda ngaloi, “Enggo iselamatkenndu geluh kami; mehuli kal perbahanenndu man kami, Tuan, e maka genduari jadi suruh-suruhen raja kami.” 26Erkiteken si e ibahan Jusup sada undang-undang i taneh Mesir maka seperlima i bas ulih juma arus ibereken man raja. Seh genduari undang-undang e erdalan denga. Taneh imam-imam ngenca la jadi erta raja.

Pemindon Jakup si perpudina

27Kalak Israel ringan i Mesir i daerah Gosen. Enggo bayak ia, janah anak-anakna pe enggo seh kal teremna. 28Dekahna Jakup ringan i Mesir lit sepuluh pitu tahun, seh maka umurna pe enggo lit seratus empat puluh pitu tahun. 29Kenca paksa kematenna enggo erdeherna, idilona anakna Jusup nina, “Tamaken tanndu kelang-kelang pahangku gelah ersumpah kam la engkuburken aku i Mesir enda. 30Ateku gelah aku ikuburken i bas kuburen niningku. Pindahken lah aku i Mesir enda nari, jenari kuburken lah aku i bas inganna ikuburken.”

Nina Jusup njabapsa, “Kulakoken bagi ikatakenndu.”

31Nina Jakup, “Ersumpah kam dage maka bage nge pagi ibahanndu.” E maka ersumpah Jusup, janah Jakup ertoto ngataken bujur i das ingan medemna.

Pustaka Si Badia

Pustaka Si Badia, Today's Batak Karo Version © 2003, Indonesian Bible Society – Lembaga Alkitab Indonesia More Info | Version Index