Search form

IMAMAT 1

Persembahen tutungen

1Ilebuh TUHAN Musa i bas Kemah Perjumpan nari, jenari iberekenNa aturen-aturen si tersena enda, 2gelah ipatuhi kalak Israel sanga ia mpersembahken persembahenna.

Ise atena mpersembahken asuh-asuhen, banci ipersembahkenna: lembu, biri-biri, tah pe kambingna. 3Adi atena lembu ipersembahkenna jadi sada persembahen tutungen, arus ipersembahkenna jenggi lembu si mejilena kal. Lembu e arus ipersembahkenna i bas dalan bengket ku bas Kemah Perjumpan, gelah ialoken TUHAN ia. 4Kalak si mpersembahkenca arus ngamparken tanna i babo takal asuh-asuhen e. Alu bage ialoken me persembahen e jadi sada persembahen pengalemi dosa-dosana. 5Lembu e arus igelehna i je, janah imam-imam kesusuren Harun mpersembahken dareh asuh-asuhen e man TUHAN, jenari ncurcurkenca ku empatna dingding batar-batar persembahen si lit i bas dalan bengket ku bas Kemah Perjumpan e. 6Jenari asuh-asuhen e ikuliti kenca bage ilapahi. 7Kenca enggo iatur imam-imam ranting i babo batar-batar ingan persembahen e, janah kenca enggo ipegarana api, 8itamaken lah ku babo api e rubia-rubia si enggo ilapahi ndai, ikut pe takalna, ras tabeh-tabehna. 9Tuka-tuka ras paha si arah pudi rubia-rubia e arus iburihi. Kenca bage maka imam si ngelakoken dahin e nutungi kerina persembahen e i babo batar-batar ndai. Bau persembahen tutungen enda merim iakap TUHAN.

10Adi ipersembahkenna biri-biri ntah kambingna, aruslah bajarna si la lit man pandangen. 11Igelehna lah biri-biri tah kambing e arah Utara batar-batar, kenca bage maka imam-imam kesusuren Harun ncurcurken dareh asuh-asuhen ndai ku empatna dingding batar-batar ingan persembahen e. 12Kenca asuh-asuhen e ilapahi, imam si ngelakoken dahin e namakenca ku babo api, ikut pe takal ras tabeh-tabehna. 13Iburihina tukana ras bitesna e maka ipersembahken imam persembahen e man TUHAN, kerina itutung i babo batar-batar ingan persembahen. Bau persembahen tutungen e merim iakap TUHAN.

14Adi kalak mpersembahken sada perik jadi persembahen tutungen, ipersembahkenna lah ndukur ntah nderapati. 15Si mpersembahkenca i babo batar-batar e me imam. Lebe ipenggelkenna kerahungna, jenari itutungna takalna i babo batar-batar e, tapi darehna iamburkenna i tepi batar-batar e. 16Biruru ras tukana iambekkenna lah kempak matawari pultak batar-batar e, ku ingan abu. 17Kenca bage icaingkenna lah kabengna, tapi ola seh penggel, e maka kerina itutung i babo batar-batar. Bau persembahen tutungen e merim iakap TUHAN.

Pustaka Si Badia

Pustaka Si Badia, Today's Batak Karo Version © 2003, Indonesian Bible Society – Lembaga Alkitab Indonesia More Info | Version Index