Search form

IMAMAT 11

Rubia-rubia si la pantangen ras si pantangen

(Ul. 14:3-21)

1Ibereken TUHAN man Musa ras man Harun peraturen-peraturen si tersurat i teruh enda 2guna bangsa Israel. Banci ipanndu rubia-rubia daraten, 3si erbelah silu-silu tapak-tapakna tapi petegeti. 4-6Tapi unta, landak, kelinci la banci ipanndu. Rubia-rubia enda pantangen, amin gia ia petegeti tapi la erbelah silu-silu tapak-tapakna. 7Babi ola pan; e pantangen, amin pe erbelah silu-siluna tapi la petegeti. 8Ola pan rubia-rubia enda ndai, ola kuit pe bangkena, sabap pantangen.

9Kerina jenis nurung si ersirip ras ersisik banci ipanndu, 10tapi si nggeluh i bas lau, si la ersirip ras la ersisik, la banci ipan. 11Rubia-rubia e pantangen. La banci ipan ras ikuitndu pe bangkena. 12La banci ipanndu si nggeluh i bas lau si la ersirip ras ersisik.

13-19Perik-perik si tersena arah teruh enda la banci ipanndu e me: kuliki, buk, rajawali, liat-liat; kuliki gara, kuliki mbiring, kak; perik unta; perik lawit, ondan, enggang, mbelibes, mburman, bengkik.

20Kerina serangga si erkabeng pantangen, 21seakatan si banci lompat. 22Jenis labang ras kurung banci ipanndu. 23Tapi kerina jenis serangga si deban si kitik, si erkabeng dingen nggarang, pantangen.

24-28Ise ngkuit bangke rubia-rubia si la erbelah silu-siluna si la petegeti, dingen si ngkuit rubia-rubia si empat nahena, si erdalan alu tapak-tapak nahena, ia lanai bersih seh karaben. Kalak si maba bangke enda ndai arus icucina pakenna, tapi ia la bersih seh karaben. 29-30Kasa kai si sebangsa ras menci bage pe lobar arus ipantangken. 31Ise si ngkuitca ntah ngkuit bangkena, ia lanai bersih seh karaben. 32Adi bangkena ndabuh ntah ku kai-kai saja, si idabuhina ndai pe enggo kena pantang, subuk si idabuhina e kayu, uis, kulit, guni, ntah kai gia kegunanna. Barang si bage arus icebukken ku bas lau tapi tetap denga la bersih seh karaben. 33Adi ndabuh ia ku bas kudin taneh, kai isi kudin taneh e enggo pantang kerina, janah kudin taneh e pe arus ipecahken. 34Kerina pangan, adi enggo kena lau si ituangken i bas kudin ndai nari e pe enggo pantang. Bage pe kai gia inemen si lit i bas kudin ndai, e pe enggo pantang. 35Kerina si idabuhi bangke ndai enggo jadi pantangen; adi barang e daliken ntah anglo si ibahan i bas taneh nari, la banci lang ipecahken. 36Tapi adi sumur ntah ulu lau ia tetap la pantang amin gia kena bangke-bangke pantangen e. 37Ntah bangke kai gia si pantangen ndabuh ku benih si nandangi ierdangken, benih e labo pantang. 38Tapi adi benih ndai sangana ireme i bas lau, kenca bage idabuhi bangke si pantang ndai, benih ndai enggo pantang.

39Adi mate rubia-rubia si banci ipan, ise si ngkuit bangkena ia enggo lanai bersih ngayak ben. 40Janah ise si man bangke ndai, arus icucina pakenna, tapi tetap denga ia la bersih seh ben. Kalak si maba bangke ndai, arus nuci pakenna, tapi tetap nge ia la bersih ngayak ben.

41La banci ipanndu rubia-rubia si kitik-kitik si erdalan i babo taneh, 42subuk si nggarang si dagingna kena taneh ntah lang, ntah si melala nahena. 43Ola pemelket bandu alu man rubia-rubia enda ndai. 44Aku kap TUHAN, Dibatandu. Arus ijagandu kebadianndu, erkiteken Aku badia. 45Aku kap TUHAN si naruhken kam ndarat i taneh Mesir nari, gelah Aku banci jadi Dibatandu. Arus maka kam badia, erkiteken Aku badia.

46Enda me peraturen kerna rubia-rubia ras perik-perik, kerna asa kai si nggeluh i bas lau, ras kerina si muit i taneh. 47Arus maka metenget kam mbedaken rubia-rubia si la pantang rikutken aturen agama, apai si pantang; apai si banci ipan janah apai si la banci ipan.

Pustaka Si Badia

Pustaka Si Badia, Today's Batak Karo Version © 2003, Indonesian Bible Society – Lembaga Alkitab Indonesia More Info | Version Index