Search form

IMAMAT 17

Kebadian dareh

1Iperentahken TUHAN man Musa 2gelah iberekenna man Harun ras anak-anakna bage pe man kerina bangsa Israel peraturen-peraturen si tersena i jenda. 3-4Kalak Israel si nggeleh lembu, biri-biri, ntah kambing, jadi persembahen man TUHAN i ja gia, seakatan i lebe-lebe pintun Kemah Perjumpan e, enggo ilanggarna undang-undang. Ia enggo ngamburken dareh, e maka lanai ia ikira jadi bangsa Dibata. 5Perentah enda ertina e me, maka kalak Israel arus mpersembahken man TUHAN asuh-asuhen si biasana igelehna i mbalmbal. Genduari arus ibabana e man imam ku pintun Kemah Perjumpan, gelah igelehna jadi persembahen persadan. 6Imam arus ngamburken dareh e ku empatna dingding batar-batar persembahen i pintun Kemah e, ras bage pe nutung tabeh-tabehna gelah ndarat bau si merim iakap TUHAN. 7Bangsa Israel lanai banci enggeleh asuh-asuhenna i mbalmbal, jadi persembahen man begu kambing. Erkiteken perbahanen si bage tandana la erkemalangen man TUHAN kap. Arus maka iikutken bangsa Israel peraturen enda seh rasa lalap.

8Subuk bangsa Israel bage pe bangsa si deban si tading ras kalak enda, si mpersembahken persembahen tutungen ntah persembahen si debanna 9man TUHAN amin i japa pe seakatan i pintun Kemah Perjumpan, kalak si bage lanai ia ikira jadi bangsa Dibata.

10Subuk bangsa Israel, bage pe bangsa si deban si tading ras ia, ise si man daging si lit denga darehna, TUHAN jadi imbangna janah lanai ia ikira jadi bangsaNa. 11Asa kai si nggeluh, kegeluhenna lit i bas darehna, janah e me sabapna maka iperentahken TUHAN maka kerina dareh iamburken ku das batar-batar guna ngalemi dosa-dosa bangsa e. Dareh erkiteken e me kegeluhen, nangtangi dosa kap. 12E me sabapna maka ikataken TUHAN man bangsa Israel, maka subuk ia bage pe bangsa si deban si tading ras ia, la banci man daging si lit denga darehna.

13Subuk bangsa Israel, bage pe bangsa si deban si tading ras ia, si ndat rubia-rubia ntah perik si la pantangen i bas perburun arus iamburkenna darehna janah itamburina alu taneh. 14Kerina si nggeluh kegeluhenna lit i bas darehna, janah e me sabapna maka ikataken TUHAN man bangsa Israel, maka la banci ipan bangsa e daging kai pe si lit denga darehna, janah kalak si manca lanai ia ikira jadi bangsaNa.

15Subuk kalak Israel bage pe kalak si deban si tading ras kalak enda, adi ipanna daging bangke rubia-rubia subuk si mate bana ntah si ibunuh rubia-rubia si meliar, arus maka icucina pakenna, jenari ridi tapi arus itimaina lebe ben maka ia enggo bersih rikutken aturen agama. 16Adi la bage ibahanna, la banci lang itanggungna akibatna.

Pustaka Si Badia

Pustaka Si Badia, Today's Batak Karo Version © 2003, Indonesian Bible Society – Lembaga Alkitab Indonesia More Info | Version Index