Search form

IMAMAT 18

Persadan kula si ilarang

1Ikataken TUHAN man Musa, 2gelah ipesehna man bangsa Israel bagenda, “Aku kap TUHAN Dibatandu. 3Ola ikut-ikut perbahanen bangsa Mesir, inganndu tading ndube, ntah pe perbahanen bangsa Kanaan, ku ja kam Kubaba genduari.

4Ikutken lah pedah-pedahKu, dalanken lah perentah-perentahKu. Aku kap TUHAN Dibatandu. 5Ikutken lah pedah-pedah ras perentah-perentah si Kubereken man bandu; adi bage perbahanndu, tentu selamat geluhndu. Aku kap TUHAN.”

6Ibereken TUHAN peraturen-peraturen enda: Ola kam ersada kula ras keluargandu. 7Ola ijurukenndu bapandu alu kam ersada kula ras nandendu. Ola ijurukenndu nandendu jine. 8Ola ijurukenndu bapandu alu kam ersada kula ras ndeharana si deban. 9Ola kam ersada kula ras turangndu ntah pe ras turangndu si ibaba nande ngudandu, subuk ia ipebelin sada rumah ras kam ntah lang.

10Ola kam ersada kula ras kempundu si diberu; sabap e njuruken dirindu jine. 11Ola kam ersada kula ras turangndu sada bapa pedauh nande, sabap ia pe turangndu kap. 12-13Ola kam ersada kula ras bibindu, subuk ia turang bapandu ntah senina nandendu. 14Ola kam ersada kula ras ndehara senina bapandu, sabap ia pe nandendu kap. 15Ola kam ersada kula ras ndehara anakndu 16ntah ras ndehara seninandu. 17Ola kam ersada kula ras anak ntah kempu diberu si enggo kam ersada kula ras; banci jadi lit hubungen darehna ras kam, janah si e perbahanen si la tengka. 18Ola iempoindu senina ndeharandu jadi tambah ndeharandu, adi ndeharandu e nggeluh denga.

19Ola kam ersada kula ras diberu si sangana nguda bulanna, sabap ia la bersih rikutken aturen agama.

20Ola kam ersada kula ras diberu kalak, sabap e erbahanca kam la bersih. 21Ola sada pe endesken anak-anakndu guna ipersembahken man Dewa Molekh, sabap perbahanen si bage njuruken man gelar Dibata, TUHAN e. 22Ola lit dilaki ersada kula ras dilaki; ciga ate Dibata si bage. 23Ola lit dilaki ntah diberu ersada kula ras asuh-asuhen, sabap perbahanen si la tengka e seh kal melketna.

24Ola ipemelketndu bandu alu perbahanen si la bersih enda, sabap bage me perbahanen kalak perbegu si erbahanca ia la bersih. Bage me kap perbahanen kalak perbegu si ngiani taneh si lit i lebe-lebendu, janah ia ipelawes TUHAN, gelah banci kam bengket. 25Perbahanen kalak erbahanca maka taneh e la bersih, e maka iukum TUHAN taneh e, janah ibahanNa maka iutahken taneh e bangsa si tading i je. 26-27Ilakokenna kerina perbahanen si ciga ate e, e maka negeri e lanai bersih. Tapi kam la banci bage. Kerina kam, subuk kalak Israel, ntah pe kalak asing, arus make undang-undang ras perentah TUHAN. 28Alu bage maka la kam iutahken taneh e bagi iutahkenna kalak perbegu si ngianisa ope denga kam. 29Ietehndu maka ise si ngelakoken apai gia perbahanen si ciga ate, lanai ia ikira jadi bangsa Dibata.

30E maka nina TUHAN, “Patuh lah man perentah-perentahKu, ola usih perbahanen kalak si tading i negeri e ope denga kam. Ola ipemelketndu bandu alu ngelakoken perbahanen-perbahanen enda ndai: Aku kap TUHAN Dibatandu.”

Pustaka Si Badia

Pustaka Si Badia, Today's Batak Karo Version © 2003, Indonesian Bible Society – Lembaga Alkitab Indonesia More Info | Version Index