Search form

IMAMAT 2

1Adi ipersembahken kalak atena man TUHAN buah sinuan-sinuan si sebangsa ras page, arus maka igilingna lebe jadi tepung. Iilingkenna minak saitun ku tepung e jenari itamakenna kumenen i babona. 2Ibabana e man imam-imam kesusuren Harun. Imam si mpersembahken persembahen e, arus muat tepung e sempukul bage pe minak ras kumenen e kerina, e maka itutungna i das batar-batar, jadi tanda maka kerina enggo ipersembahken man TUHAN. Bau persembahen pangan e merim iakap TUHAN. 3Persembahen pangan si tading ndai jadi sikerajangen imam-imam, janah e seh kal badiana, perban e me bagin i bas pangan si enggo ipersembahken man TUHAN.

4Adi persembahen e, roti si itasakken i bas dapur roti, la banci itama ragi. Roti e banci roti si mekapal si ibahan i bas tepung nari icampur minak saitun, tah pe roti si menipes si isapuken minak saitun ku je.

5Adi persembahen e, cimpa tuang, arus ibahan i bas tepung si icampur minak saitun nari, tapi ola tama ragi. 6Cepik-cepiklah cimpa e, curcurken minak ku babona sanga kam mpersembahkenca jadi persembahen.

7Adi persembahen e, roti si itasakken i bas kudin, arus ibahan i bas tepung ras minak saitun nari. 8Bereken man imam gelah ipersembahkenna man TUHAN i babo batar-batar. 9Ibuat imam sada bagin, jenari itutungna i babo batar-batar tandana enggo ipersembahken kerina man TUHAN. Bau persembahen pangan e merim iakap TUHAN. 10Ibana jadi sikerajangen imam-imam. Si e seh kal badiana, erkiteken e ibuat i bas persembahen si enggo ipersembahken man TUHAN.

11Persembahen pangan si ipersembahkenndu man TUHAN sada pe la banci itama ragi. Ndigan pe la banci itamandu ragi ntah tengguli i bas pangan si ipersembahken man TUHAN. 12Gandum si pemenana iperanindu arus ibabandu jadi persembahen man TUHAN tep-tep tahun, tapi labo guna itutung i das batar-batar. 13Tama sirana tep-tep persembahen pangan, erkiteken sira e tanda perpadanenndu ras Dibata. (Tama siralah tep-tep persembahenndu.) 14Adi ibabandu man TUHAN buah gandum si pemenana jadi persembahen, persembahken lah si enggo isauk ntah pe si enggo ipahpah. 15Curcurken lah minak saitun ku je, kenca bage tamaken kumenen i babona. 16Itutung imam sada bagin pahpah e rikut ras minak ras kerina kumenen e, jadi tanda maka persembahen e, persembahen pangan man TUHAN.

Pustaka Si Badia

Pustaka Si Badia, Today's Batak Karo Version © 2003, Indonesian Bible Society – Lembaga Alkitab Indonesia More Info | Version Index