Search form

BILANGEN 20

Kejadin i Kades

(Kel. 17:1-7)

1I bas bulan si pemena kerina perpulungen Israel seh i bas taneh si mesawang, Sin gelarna, jenari ibahanna inganna erkemah i Kades. I je me Miriam mate ras ikuburken.

2La lit lau i bas inganna erkemah e, e maka pulung bangsa e ngkeleweti Musa ras Harun. 3Janahna jungut-jungut nina, “Ulin kin min mbarenda kami mate i lebe-lebe Kemah TUHAN radu ras teman-teman kami kalak Israel. 4Engkai maka kami ndarat ku taneh si mesawang enda? Ntah gelah kami mate ras asuh-asuhen kami kin atendu? 5Engkai maka ibabandu kami ndarat i Mesir nari ku bas ingan si mesera enda? Kai pe la lit turah i jenda. La lit gandum, la lit buah ara, la lit buah anggur, la lit buah galiman. Lebih asa si e, lau pe la lit man inemen!” 6Lawes Musa ras Harun i bas jelma si nterem e nari, jenari tedis ia i bas dalan bengket ku Kemah e. Erjimpuh ia duana, ayona seh ku taneh, jenari sinalsal terang TUHAN teridah man bana.

7Nina TUHAN man Musa, 8“Buatlah ciken si lit i lebe-lebe Peti Perpadanen, jenari pepulung kam ras Harun bangsa e kerina. I lebe-lebena kerina ngeranalah kam kempak batu si ah, gelah reh lau ergeruhguh i bas nari. Alu dalan si enda iberekenndu lau man bangsa e i bas batu nari, man inemenna ras man asuh-asuhenna.” 9Lawes Musa, ibuatna ciken ndai sue ras si enggo ikataken TUHAN.

10Ipepulung Musa ras Harun kerina perpulungen i lebe-lebe batu e, jenari nina Musa, “Begiken, o kam si tukang berontak! Terpaksa kin ipedarat kami man bandu lau i bas batu enda nari?” 11Kenca bage iangkat Musa ciken ndai, ipaluna batu e dua kali alu ciken e, jenari mbincar me lau mbelin ergeruhguh ndarat, e maka kerina bangsa e ras asuh-asuhen minem.

12Tapi irawai TUHAN Musa ras Harun nina, “Erkite-kiteken la cukup kinitekenndu ernalem i bas kuasangKu si badia i lebe-lebe bangsa Israel, e maka la banci babandu ia bengket ku negeri si enggo Kupadanken e.”

13Enda jadi i Meriba, ingan kalak Israel jungut-jungut man TUHAN, i je icidahkenNa man bangsa e maka Ia badia.

La ipelepas raja Edom kalak Israel mentas

14Isuruh Musa piga-piga kalak persuruhen i Kades nari njumpai raja Edom. Nina persuruhen ndai, “Berita enda e me i bas kade-kadendu nari, i bas suku-suku kalak Israel. Enggo itehndu kuga kiniseran si enggo inanami kami, 15kuga nini-nini kami lawes ku Mesir, i ja kami ndekah tading. Seh kal jahatna perbahanen kalak Mesir man nini-nini kami bage pe man kami. 16E maka nderkuh kami man TUHAN mindo penampat. IdengkehkenNa penderkuh kami jenari isuruhNa sada malekat si maba kami ndarat i bas Mesir nari. Genduari kami i Kades, sada kuta i bas perbalengen daerahndu. 17Ngarap kami gelah iberendu kami mentas arah tanehndu. Kami ras asuh-asuhen kami labo pagi nilah i bas dalan e nari ntah pe lawes ku bas jumandu ntah ku bas peken anggurndu, janah labo inem kami lau sumurndu. Kami tetap i bas dalan si mbelin seh kami enggo ndarat i bas daerahndu nari.”

18Tapi erjabap kalak Edom nina, “La ibere kami kam mentas arah negeri kami. Adi icubakenndu kin, la banci la reh kami ndarat, maka iserang kami kam.”

19Nina bangsa Israel, “Tetap nge kami arah dalan si mbelin, janah adi iinem kami, ntah iinem asuh-asuhen kami laundu, igalari kami gia pagi. Mentas saja ngenca ate kami.” 20Iulihi kalak Edom sekali nari nina, “La ibere kami!” Jenari ndarat ia alu tentera si megegeh, guna merang kalak Israel. 21Erkite-kiteken la ibere kalak Edom kalak Israel mentas arah daerahna, nilah kalak Israel jenari lawes ia arah dalan si deban.

Harun mate

22Kerina perpulungen Israel berkat i Kades nari jenari seh ia i Deleng Hor, 23i perbalengen Edom. I je nina TUHAN man Musa ras Harun. 24“Harun labo bengket ku bas negeri si enggo Kupadanken merekenca man bangsa Israel; mate ia sabap duana kam ngelawan perentahKu i Meriba. 25Babalah Harun ras anakna Eleasar nangkih ku Deleng Hor, 26jenari tangtangilah jubah-jubah keimamen Harun i je, pakeken kempak Eleasar. I je me Harun mate.” 27Ibahan Musa bagi si enggo iperentahken TUHAN. Lawes ia teluna ku das Deleng Hor, janah kerina perpulungen e natapsa. 28E maka itangtangi Musa kerina jubah-jubah keimamen Harun, jenari ipakekenna kempak Eleasar. I das deleng e mate Harun, jenari Musa ras Eleasar mulihken ku teruh. 29Kenca iteh perpulungen e kerina maka Harun enggo mate, itangisina ia telu puluh wari dekahna.

Pustaka Si Badia

Pustaka Si Badia, Today's Batak Karo Version © 2003, Indonesian Bible Society – Lembaga Alkitab Indonesia More Info | Version Index