Search form

BILANGEN 24

1Genduari enggo ieteh Bilham maka sura-sura TUHAN gelah ipasu-pasuna bangsa Israel. E maka lanai idaramina tanda i bas Dibata nari, bagi si ibahanna ope denga si e. Itulihkenna ku gurun pasir, 2idahna bangsa Israel erkemah rikutken suku-sukuna. Kesah Dibata ngkuasai Bilham, 3jenari ibelaskenna nubuat enda,

“Pedah si isehken Bilham anak Beor,

perkatan kalak si terang pengenehenna,

4si ngasup megiken kai si ikataken Dibata,

asum tunduh, tapi medak matangku,

kuidah sada pengenehenen i bas Dibata si la ersibar kuasaNa nari.

5Mejile kal kemah-kemah Israel,

6desken barisen batang tualah,

ntah pe peken i tepi lau,

desken batang sisal si isuan TUHAN,

ntah pe batang cemara i tepi lau.

7Cukup udan ibereken man bana

janah banci ia nuan-nuan i bas jumana alu lau si cukup.

Rajana belinen pagi asa Agak,

kerajanna tuhu-tuhu mbelang.

8Ibaba Dibata ia ndarat i Mesir nari,

Ia jine erperang guna bangsa e

desken sada jenggi si merawa.

Itelenna musuh-musuhna,

iripukkenna tulanna, ipenggelkenna anak panahna.

9Bangsa e desken sada singa si merawa,

adi medem ia, ise pe la pang si ngingetisa.

Ise si masu-masu Israel ia ipasu-pasu kap,

janah ise si numpahi Israel kena sumpah kap.”

10Ipekibul Balak tinju-tinjuna perban rawana jenari nina man Bilham, “Kudilo kam gelah numpahi musuhku, tapi kepeken enggo telu kali ia ipasu-pasundu genduari. 11Genduari mulihlah kam! Enggo kupadanken mereken upah man bandu, tapi la kam daten sabap TUHAN si ngambatisa.”

12Erjabap Bilham nina, “Enggo kukataken mbarenda man persuruhenndu si njumpai aku maka 13aminna gia iberekenndu man bangku kerina pirak ras emas si lit i bas istanandu, la banci kusimbak perentah TUHAN alu erbahan kai pe bagi ateku ngena. Kai isuruh TUHAN e ngenca kukataken.”

Nubuat Bilham si pendungina

14Nina Bilham man Balak, “Genduari mulih ateku ku bangsangku, tapi ope denga aku lawes, kupersingeti lebe kerna kai denggo si ibahan bangsa Israel man bangsandu.” 15Kenca bage ibelaskenna nubuat enda,

“Pedah si isehken Bilham anak Beor

perkatan i bas kalak si terang pengenehenna,

16si ngasup megiken kai si ikataken Dibata,

asum aku tunduh, tapi medak matangku,

kuidah sada pengenehenen i bas Dibata

si la ersibar kuasaNa nari.

17Kupernehen ku bas wari-wari si nandangi reh,

jenari kuidah bangsa Israel.

Sekalak raja, bagi sada bintang si terang,

keke i bas bangsa e.

Bagi sada bintang si erbinar reh ia i bas Israel nari,

ipekpekna seh luka peminpin-peminpin Moap,

idampeskenna ku taneh kalak si merawa ras meganjang rukur.

18Italukenna musuhna i Edom,

ibuatna tanehna jadi sikerajangenna,

i bas si e Israel tetap menang.

19Iperjaki bangsa Israel ia kerina,

imasapkenna seh keri.”

20Kenca bage i bas pengenehenna iidah Bilham kalak Amalek, jenari ibelaskenna nubuat enda,

“Amalek e me kap sada negara si kuatna,

tapi kedungenna negara e pe bene seh rasa lalap.”

21I bas pengenehenna idahsa kalak Keni, jenari ibelaskenna nubuat enda,

Inganndu tuhu-tuhu nteguh,

aman desken asar perik-perik i bas lingling si meganjang.

22Tapi kam pe o kalak Keni, la banci la ikernepken,

ibuat kalak Assur me kam jadi tabanen.

23Tole ibelasken Bilham nubuat enda,

“Ise ndia bangsa si pulung arah Utara enda?

24Reh me musuh erlayar i Kiprus nari;

italukenna Assur ras Eber,

tapi ia pe, seh ka nge waktuna bene rasa lalap.”

25Kenca bage ersikap minter Bilham jenari mulih ia ku kutana, janah iterusken Balak perdalanenna.

Pustaka Si Badia

Pustaka Si Badia, Today's Batak Karo Version © 2003, Indonesian Bible Society – Lembaga Alkitab Indonesia More Info | Version Index