Search form

BILANGEN 25

Bangsa Israel i Peor

1Asum bangsa Israel erkemah i Sitim, dilaki kalak Israel enggo mulai erlua-lua ras diberu-diberu bangsa Moap si i je. 2Iundang diberu-diberu enda ia ku bas pesta-pesta agamana, i ja dibata Moap isembah. Ipan kalak Israel pangan kalak e janah isembahna dibatana, 3Baal Peor, e maka nembeh ate TUHAN kempak ia kerina. 4Jenari ikatakenNa man Musa nina, “Tangkap kerina peminpin-peminpin kalak Israel, jenari, tandana Aku ipatuhi, bunuh ia i lebe-lebe jelma si nterem, gelah kenca e lanai Aku merawa kempak bangsa e.”

5E maka nina Musa man kerina petugas-petugas, “Sekalak-sekalak kam arus munuh tep-tep kalak si i bas sukundu si enggo jadi kalak si ersembah man Baal Peor.”

6Lit sekalak Israel ibabana sekalak diberu bangsa Midian ku bas kemahna terang-terangen iidah Musa ras kerina perpulungen. Asum e Musa ras bangsa Israel sangana tangis-tangis i bas dalan bengket ku Kemah Perjumpan. 7Tupung Pinehas, anak Eleasar ntah kempu Imam Harun, ngidah si enda, keke ia minter jenari itadingkenna perpulungen e. Ibuatna sada lembing, 8iikutina dilaki ras diberu ndai ku bas kemah e, jenari ipantemkenna lembing ndai seh telpus duana. Alu bagenda penakit si enggo ngkenai ras munuh nterem kalak Israel minter ipengadi, 9tapi enggo lit sempat mate dua puluh empat ribu kalak.

10Nina TUHAN man Musa, 11“Erkite-kiteken kai si enggo ibahan Pinehas, lanai ateKu nembeh man bangsa Israel. La ipelepasna ise pe ersembah man dibata si deban seakatan man bangKu, janah em sabapna maka la ia Kulesapken ibahan rawangKu. 12E maka katakenlah man bana maka ateKu erbahan sada perpadanen ras ia si tetap seh rasa lalap. 13Ia ras kesusurenna enggo itetapken alu nteguh jadi imam, sabap la ipelepasna lit kalak Israel nembah man dibata-dibata si deban janah isehkenna pengalemi dosa man bangsa e.”

14Gelar kalak Israel si ibunuh ras diberu kalak Midian ndai e me kap Simri anak Salu, kepala terpuk keluarga suku Simeon. 15Gelar diberu ndai Kosbi anak Sur. Ia sekalak pengulu i bas terpuk-terpuk si sada nini i bas kalak Midian.

16Iperentahken TUHAN man Musa nina, 17“Ayak-ayak kerina kalak Midian jenari kernepken lah ia, 18erkite-kiteken kejahaten si ibahanna man bandu asum itipuna kam i Peor, ras erkite-kiteken Kosbi, si ibunuh tupung lit penakit si ngkenai nterem jelma i Peor.”

Pustaka Si Badia

Pustaka Si Badia, Today's Batak Karo Version © 2003, Indonesian Bible Society – Lembaga Alkitab Indonesia More Info | Version Index