Search form

BILANGEN 29

Persembahen tupung Wari Raya Tahun si Mbaru

(Im. 23:23-25)

1I bas wari si pemena bulan si pepituken kam arus pulung erbahan kebaktin, janah la banci erdahin. I bas wari e terompet-terompet arus iembus. 2Endesken sada persembahen tutungen man TUHAN, si merim iakapNa bauna: sada jenggi lembu si nguda denga, sada bajar biri-biri, ras pitu anak biri-biri bajarna umur sada tahun, kerina si la lit man pandangen. 3Bahan persembahen buah gandum si payo i bas tepung nari si icampur ras minak saitun: telu kilo tepung ras jenggi lembu e, dua kilo ras bajar biri-biri, 4janah sada kilo ras tep-tep anak biri-biri. 5Tole persembahken sada bajar kambing jadi persembahen pengalemi dosa, janah alu bagenda bahan acara pembersihen dosa man bangsa e. 6Persembahkenlah si enda kerina jadi tambahen persembahen tutungen si biasa ibahan i bas wari si pemena tep-tep bulan ras persembahen anggurna, bage pe persembahen tutungen si tep-tep wari ras persembahen buah gandum ras persembahen anggurna. Persembahen-persembahen enda merim bauna iakap TUHAN.

Persembahen tupung Wari Pengalemi Dosa

(Im. 23:26-32)

7Pulunglah erbahan kebaktin i bas wari pesepuluhken bulan si pepituken; i bas wari e kai pe la banci ipanndu janah ola erdahin. 8Bahan persembahen tutungen man TUHAN, si merim iakapNa bauna: sada jenggi lembu si nguda denga, sada bajar biri-biri, ras pitu anak biri-biri bajarna umur sada tahun, kerina si la lit sitik pe man pandangen. 9Bahan persembahen buah gandum si payo i bas tepung nari icampur ras minak saitun: telu kilo tepung ras jenggi lembu e, dua kilo ras bajar biri-biri, 10janah sada kilo ras tep-tep anak biri-biri. 11Tole persembahken sada bajar kambing jadi persembahen pengalemi dosa, tambah-tambah kambing si ipersembahken i bas acara pembersihen dosa man bangsa e, ras persembahen tutungen si tep-tep wari bage pe persembahen buah gandum ras anggurna.

Persembahen tupung Wari Raya Sapo-sapo

(Im. 23:33-44)

12Pulunglah erbahan kebaktin i bas wari pesepuluh limaken bulan si pepituken. Pestakenlah perayan enda guna mereken kemulian man TUHAN pitu wari dekahna, janah ola erdahin. 13I bas wari si pemena enda persembahken persembahen pangan man TUHAN, si merim iakapna bauna: sepuluh telu jenggi lembu nguda denga, dua bajar biri-biri, ras sepuluh empat anak biri-biri bajarna umur sada tahun, kerina si la lit sitik pe man pandangen. 14Bahan persembahen buah gandum si payo i bas tepung nari icampur ras minak saitun: telu kilo tepung ras tep-tep jenggi lembu, dua kilo ras tep-tep bajar biri-biri, 15dingen sada kilo ras tep-tep anak biri-biri. 16Tole persembahken sada bajar kambing jadi sada persembahen pengalemi dosa. Persembahkenlah enda kerina jadi tambahen persembahen tutungen si tep-tep wari bage pe persembahen buah gandum ras persembahen anggurna.

17I bas wari si peduaken persembahken sepuluh dua jenggi lembu si nguda denga, dua bajar biri-biri, ras sepuluh empat anak biri-biri bajarna umur sada tahun, kerina si la lit man pandangenna. 18-19Radu ras si e, persembahken pe kerina persembahen-persembahen si deban si iperluken i bas wari si pemena.

20I bas wari si peteluken persembahken sepuluh sada jenggi lembu si nguda denga, dua bajar biri-biri ras sepuluh empat anak biri-biri bajarna umur sada tahun, kerina si la lit sitik pe man pandangen. 21-22Radu ras si e persembahken pe kerina persembahen si deban si iperluken i bas wari si pemena.

23I bas wari peempatken persembahken sepuluh jenggi lembu nguda, dua bajar biri-biri, ras sepuluh empat anak biri-biri bajarna umur sada tahun, kerina si la lit sitik pe man pandangen. 24-25Radu ras si e, persembahken pe kerina persembahen si deban si iperluken i bas wari si pemena.

26I bas wari si pelimaken persembahken siwah jenggi lembu si nguda, dua bajar biri-biri, ras sepuluh empat anak biri-biri bajarna umur sada tahun, kerina si la lit sitik pe man pandangen. 27-28Radu ras si e, persembahken pe kerina persembahen si deban si iperluken i bas wari si pemena.

29I bas wari peenemken persembahken waluh jenggi lembu nguda, dua bajar biri-biri, ras sepuluh empat anak biri-biri bajarna umur sada tahun, kerina si la lit sitik pe man pandangen. 30-31Radu ras si e, persembahken pe kerina persembahen-persembahen si deban si iperluken i bas wari si pemena.

32I bas wari si pepituken persembahken pitu jenggi lembu nguda, dua bajar biri-biri, ras sepuluh empat anak biri-biri bajarna umur sada tahun. 33-34Radu ras si e, persembahken pe kerina persembahen-persembahen si deban si iperluken i bas wari si pemena.

35I bas wari pewaluhken pulung lah erbahan kebaktin janah la banci erdahin. 36Bahan persembahen tutungen jadi sada persembahen pangan man TUHAN, si merim iakapNa bauna: sada jenggi lembu nguda, sada bajar biri-biri, ras pitu anak biri-biri bajarna umur sada tahun, kerina si la lit sitik pe man pandangen. 37-38Radu ras si e, persembahken pe kerina persembahen si iperluken i bas wari si pemena.

39Enda me peraturen kerna persembahen tutungen, persembahen buah gandum, persembahen anggur, ras persembahen persadan si arus ibahanndu man TUHAN i bas perayan-perayanndu si enggo itentuken. Si enda kerina e me tambahen persembahen-persembahen si iberekenndu i bas nehken padan si ibahanndu man TUHAN ntah pe persembahen-persembahen riah ukur.

40E maka ituriken Musa man bangsa Israel kerina si enggo ipedahken TUHAN man bana.

Pustaka Si Badia

Pustaka Si Badia, Today's Batak Karo Version © 2003, Indonesian Bible Society – Lembaga Alkitab Indonesia More Info | Version Index