Search form

BILANGEN 33

Perdalanen i Mesir nari ku Moap

1Cataten si arah teruh enda nuriken gelar-gelar ingan bangsa Israel erkemah kenca itadingkenna Mesir. Berkat ia i Mesir nari ersuku-suku i teruh pinpinen Musa ras Harun. 2Sue ras perentah TUHAN, isuratken Musa gelar tep-tep ingan bangsa Israel erkemah.

3Bangsa Israel nadingken Mesir i bas wari pesepuluh limaken bulan si pemena i bas tahun e, enggo kenca lepas wari Paskah si pemena. I teruh pengkawali TUHAN berkat ia i kuta Ramses nari terang-terangen iidah kalak Mesir, 4sangana ngkuburken anakna sintua si ibunuh TUHAN. Alu erbahan si enda, TUHAN encidahken ukumenNa man dibata-dibata Mesir.

5Berkat kalak Israel i Ramses nari jenari erkemah ia i Sukot. 6Seterusna inganna erkemah e me kap i Etam i tepi gurun pasir. 7I jenari mulihken ia ku Pi-Hahirot, arah Timur Baal Sepon, jenari erkemah ia deherken Mikdol. 8Berkat ia i Pi-Hahirot nari, jenari mentas ia arah tengah-tengah Lawit Merah ku gurun pasir Sur; kenca erdalan telu wari dekahna erkemah ia i Mara. 9I jenari lawes ia ku Elim, i je me ia erkemah, sabap lit i je sepuluh dua ulu lau ras pitu puluh batang kurma.

10Berkat ia i Elim nari jenari erkemah ia deherken Teluk Sues. 11Inganna erkemah seterusna e me kap i gurun pasir Sin. 12Kenca bage erkemah ia i Dopka, 13janah kenca si e i Alus. 14Seterusna i Repidim, i je la lit lau man inemenna.

15-37I Repidim nari seh ku Deleng Hor, ingan erkemah e me kap: i gurun pasir Sinai, Kiberot Hattapa (ntah pe “Kuburen kalak Rangap”), Haserot, Ritma, Rimon Peres, Lipna, Rissa, Kehelata, Deleng Seper, Harada, Makelot, Tahat, Tera, Mitka, Hasmona, Moserot, Bene-Jaakan, Hor-Hagitgat, Jotbata, Aberona, Esiongeber, taneh si mesawang Sin (e me Kades), ras Deleng Hor, i tepi taneh Edom.

38-39Ngikutken perentah TUHAN, Imam Harun nangkih ku das Deleng Hor. I bas umur 123 tahun mate ia i je i bas wari pemena bulan si pelimaken i bas tahun peempat puluhken kenca kalak Israel enggo nadingken Mesir. 40Raja Arat si ringan arah Selatan taneh Kanaan megi maka bangsa Israel enggo reh.

41-49I Deleng Hor nari ku Kendit Moap kalak Israel erkemah i bas ingan-ingan si tersurat arah teruh enda: i Salmona, Punon, Obot, i bas bekas kuta Abarim si enggo runtuh i bas daerah Moap, Dibon-Gat, Almon Dibelataim, Deleng Abarim deherken Deleng Nebo, ras i Kendit Moap arah lepar Lau Jordan petingtang ras Jeriho kelang-kelang Bet-Jesimot ras Baluren Sitim.

Pedah TUHAN man bangsa Israel ope denga ngepari Lau Jordan

50I Kendit Moap i kepar Lau Jordan petingtang ras Jeriho, ibereken TUHAN man Musa 51pedah si tersurat arah teruh enda guna kalak Israel nina, “Adi ikeparindu Lau Jordan ku bas taneh Kanaan, 52la banci la ipelawesndu kerina penduduk negeri e. Runtuhken seh getem kerina gana-gana si ibahan i bas batu ntah pe i bas besi nari bage pe kerina ingan-inganna ersembah. 53Kuasailah taneh e jenari ringanlah kam i je, sabap Kubereken taneh e man bandu. 54Bagi-bagilah taneh e man suku-suku ras terpuk-terpuk Israel alu erbahan tikam tanduk, alu mereken taneh si mbelang man terpuk si nterem jelmana, ras taneh si la mbelang man terpuk si la nterem jelmana. 55Tapi adi la ipelawesndu penduduk taneh e, kalak si tading e denga la banci la ngguluti kam desken rintep i bas matandu ntah pe duri i teruh kikikndu, janah la banci la ilawanna kam rusur. 56Adi la ipelawesndu ia, Kukernepken kam, bagi si enggo Kurencanaken ngkernepken ia.”

Pustaka Si Badia

Pustaka Si Badia, Today's Batak Karo Version © 2003, Indonesian Bible Society – Lembaga Alkitab Indonesia More Info | Version Index