Search form

BILANGEN 5

Kerna kalak si la bersih

1Nina TUHAN man Musa, 2“Perentahken man bangsa Israel gelah ipelawesna i bas ingan erkemah e nari asa kai kalak si kena penakit kulit ntah pe kalak si ndaraten nehteh i bas kulana nari, bage pe kalak si la bersih erkiteken idegesna kalak mate. 3Kerina kalak si bage la bersih rikutken peraturen agama; e maka suruhlah ia ndarat, gelah ola ibahanna keliamen ingan erkemah e, sabap i je Aku ringan ras bangsangKu.” 4Ipatuhi bangsa Israel kata TUHAN, e maka ipelawesna kerina kalak si la bersih e i bas ingan erkemah e nari.

Kerna nggalar erkite-kiteken perbahanen si salah

5Ibereken TUHAN man Musa 6pengajaren guna bangsa Israel bagi si arah teruh enda. Adi lit kalak si nimbak TUHAN, janah ibahanna salah man kalak sideban, 7arus iakukenna dosana, jenari dem igalarina tebus dosana e, tambah seperlimana man kalak inganna ersalah ndai. 8Tapi adi kalak inganna ersalah ndai enggo mate janah la lit keluargana si ndeher si banci ngaloken tebus dosa e, e maka tebus e iendesken man TUHAN guna imam. Galar tebus dosa enda e me jadi tambahen bajar biri-biri si ipake i bas acara pembersihen man kalak si ersalah e. 9Bage pe tep-tep sumbangen si tertentu si ipersembahken bangsa Israel man TUHAN, enda jadi sikerajangen imam ingan kalak nehken sumbangen e. 10Tep-tep persembahen si isehken man sekalak imam, jadi sikerajangenna.

Kerna perbulangenna si curiga man ndeharana

11TUHAN nuruh Musa 12-14nehken pengajaren bagi si tersinget i jenda man bangsa Israel. Banci jadi sekalak dilaki curiga man ndeharana; iakapna ndeharana e lanai setia man bana. Iakapna ndeharana enggo erbahan lagu la mehuli ras dilaki si deban. Tapi banci jadi perbulangenna ndai ragu-ragu denga, sabap ndeharana njaga rahasia perbahanenna. Saksi pe la lit, janah ia la pernah terdat ngelakoken si e. Ntah pe banci jadi sekalak perbulangen curiga man ndeharana, aminna gia ndeharana e tetap nge setia man bana. 15Adi kune jadi si apai gia bagi si enda, perbulangen e arus maba ndeharana ngadap imam alu maba persembahen si iperluken e me kap sada kilo tepung gandum. Tapi la banci icurcurkenna ku je minak saitun ntah pe namaken kumenen si merim, sabap enda kap sada persembahen sekalak perbulangen si curiga, guna encidahken apai si benar.

16Diberu e la banci la ibaba imam ngadap TUHAN, alu nuruh ia tedis i lebe batar-batar. 17Kenca bage imam ngilingken lau si badia ku bas sada mangkuk si ibahan i bas taneh nari, jenari ibuatna sitik taneh si lit i bas lante Kemah Perjumpan, jenari itamakenna taneh e ku bas lau ndai gelah jadi pagit. 18Kenca bage isarsarkenna buk diberu ndai, janah itamakenna tepung persembahen ndai ku bas tan diberu e. Imam arus njemak mangkuk si isin lau si pagit ndai, si maba sumpah. 19Jenari imam arus nuruh diberu ndai ngueken sumpah si ibelasken imam nina, “Adi tuhu kam langa erlua-lua, labo kam isakiti sumpah si ibaba lau enda. 20Tapi adi enggo kam erlua-lua, 21TUHAN lah si njadiken gelarndu jadi sumpah i tengah-tengah bangsandu. Ialah si erbahanca benana pahandu jadi kesip janah beltekndu busungen. 22Lau si inemndu endalah mahanca maka beltekndu busungen janah benana pahandu jadi kesip.” Diberu ndai arus ngaloi nina, “Adi ersalah aku ibahan TUHAN lah bage.”

23Kenca bage imam nuratken sumpah enda jenari tulisen e iburihi imam seh masap i bas lau si pagit si lit i bas mangkuk ndai. 24Ope denga isuruhna diberu ndai minem lau e, si banci mahanca pagit akapna ibahan suina, 25imam arus muat tepung persembahen ndai i bas tan diberu ndai nari. Itatangna alu tanna guna mpersembahkenca man TUHAN, jenari itamakenna ku bas batar-batar. 26Kenca bage ibuat imam tepung ndai sengkerauk jadi sada tanda persembahen jenari itutungna i babo batar-batar. Kedungenna, arus isuruhna diberu ndai minem lau si pagit e. 27Adi enggo kin ia erlua-lua, la banci la pagit iakapna ibahan lau ndai perbahan suina, beltekna busungen janah kesip benana pahana. Gelarna isumpahi i tengah-tengah bangsana. 28Tapi adi la ia ersalah, ia la sakit janah banci ia mupus anak.

29-30Enda me undang-undang kerna sekalak dilaki si cemburu janah ncurigai ndeharana enggo erlua-lua. Diberu ndai arus isuruh tedis i lebe-lebe batar-batar, janah imam ngelakoken acara enda. 31Perbulangen ndai la ersalah, tapi diberu e, adi ersalah kin ia, la banci la ngenanami kiniseran erkiteken si e.

Pustaka Si Badia

Pustaka Si Badia, Today's Batak Karo Version © 2003, Indonesian Bible Society – Lembaga Alkitab Indonesia More Info | Version Index