Search form

NKÔLAN 11

Awu mintô mi biôm

(Eza 19:1-16; Yb 9:4; Nk 12:29-39)

1Ane Nti a nga jô Môze na: Ma zu lôme ébubua ja suʼulan e be Faraoñ a Ejipte, éyoñe te a ye suʼulane suu mia. Eyoñ a ye suu mia mi ke, a ye titan titane mia mi kôlô va. 2Kobôʼô bôte na, fam ése é sili nyô ba je be too biôm bi ne mboon a silba a bi bi ne mboon a mvot; avale te fe minga ase a sili nyô ba nye be too. 3Nti a nga bo na bôte ya Israél be yene *mvam e be bôte ya Ejipte. Bebo bisaé be Faraoñ a bôte bese ya Ejipte be nga bo na, Môze a bi ésemé abui Ejipte.

4Ane Môze a nga jô na: Avale di nde a jôya: Bebé e zañe alu, ma ye nyiin Ejipte été; 5A mintôle mise e mebialé, mia ye wu e si ya Ejipte, ataté wu Faraoñ a too éto njôô, a kui wu mbo ésaé minga a saé mevôm ba koʼo bidi, a mi mise ya mimbam betit. 6Beta miñyôn mia ye bo e si ya Ejipte ése: Nalé a ngenan te tame boban, a nalé aa ye ke beta boban. 7Ve e be bôte ya Israél, teke toʼo ve mvu jia ja ye bôm nge môt, nge tit, ndemben mi yem nkandan Zambe a ve e zañe Ejipte a Israél. 8Eyoñe te bebo bisaé bôé bese ba ye zu kute meboñ asu dam a jô na: Kelek, wo a bôte bôé ba tôñe wo. Mvuse ya valé nje ma ye kôlô. Ane Môze a nga kôlô e *nda Faraoñ a beta ayoñ ase e *nlem.

9Ane Nti a nga jô Môze na: Faraoñ aa ye ke vôʼôlô mia, ndemben bibubua bi mam biam bia ye bo abui e si Ejipte. 10Ane Môze ba Aron be nga bo bitua bi mam bite asu be Faraoñ. Nti a nga ve nleme Faraoñ ntip, a nji suu bôte ya Israél be kôlô e si jé.

Bible en langue Bulu

© LʼAlliance Biblique du Cameroun, 2007

More Info | Version Index