Search form

NKÔLAN 16

Menyiñ bôte ya Israél: abem, manna; Sabat

(Nlb 11:4; Dt 8:2-3,16; Né 9:15-20, 21; Sam 78:23-35; Yo 6:30-36,48-58; Fil 4:19)

1Ane nsamba bôt ôse ya Israél ô nga kôlô Elim a kui e *nkôte si ba loone na Sin, e zañ Elim a nkôle Sinayi e ngone baa ya nkôlane wob ya Ejipte é too melu awôm a metan. 2Ane nsamba bôt ôse ya Israél ô nga kobô Môze ba Aron *abé e *nkôte si. 3Ane bôte ya Israél be nga jô be na: Ngoʼé nge Zambe a too ke ye kañese na, wo Nti ô wôé bia Ejipte, éyoñ bi nga too e fefele mevieʼe me tit, éyoñ bi mbe bi jaʼa belet abime ya jaé! Amu mi nga zuu bia e *nkôte si na nsamba bôt wu ôse bi wu a zaé.

4Ane Nti a nga jô na: Ma zu noo mia belet é soʼo yôp. Bôt ba ye kui atan a ba ye toʼé je, *môs ane *môs, abime da yian, nalé ma ye veʼele be a yen nge ba ye wulu ane atiñe dam e né, nge momo. 5E môse saman, éyoñ ba ye yam abime ba te soo de, ba ye teme na e ntoo mebime mebaé, a lôte abime ya mimôs mivoʼo mise.

6Ane Môze ba Aron be nga jô bôte ya Israél ase na: Ngôʼé ya den mia ye yeme na Nti nye a nga vaa mia Ejipte. 7A mametyé mia ye yene étôtoʼo Nti, amu a wôʼôya menyiñ menan ma wosane nye; amu na bi ne beza, ane mi ne kobô menyiñ ma wosane bia? 8Ane Môze a nga jô na: Ngôʼé ya den Nti a ye ve mia tite ya di, a mametyé a ye ve mia belet abim mia ye di a jaé; Nti a wôʼôya menyiñ menan mi nga kobô me wosaʼane nye; amu bia bi ne beza? Menyiñ menan me nji wosane bia ve wosane Nti.

9Ane Môze a nga jô Aron na: Jôʼô nsamba bôt ôse ya Israél na subaʼan bebé asu Nti, amu a wôʼôya menyiñ menan. 10A nga bo na, Aron a kobôʼô ékôane bôte ya Israél, ane be nga fombô mfaʼa ya *nkôte si a yene étôtoʼo Nti é zaʼa *nkut été.

11Ane Nti a nga kobô Môze a jô na: 12Me wôʼôya menyiñ me bôte ya Israél, kobôʼô be na: E zañe ngôʼé ébaé mia ye di tit, a mametyé mia ye jaé a belet; a mia ye yeme na me ne Nti, e Zambe wônan.

13Mamengôʼé ane akpwal e nga bet a yiane minkane mise; a mametyé be nga yene élok mbômaʼane minkan. 14Eyoñ éloʼo te é maneya, be nga yene si njalan a jôm éziñ é too ane bone mefes é funaʼan metaʼa. 15Ane bôte ya Israél be nga fombô a môt ase a nga sili nyô mboʼo na: Man hu, e ne na, jé ji? Amu be nji yem jé nje jôme te é mbe. Ane Môze a nga jô be na e belet Nti a ve mia le na mi di. 16Avale di nde Nti a nga bendé na: Nyoñan, môt ase, abim a ne di; môt ase jate jia, abime bôte bese be né; môt ase a ye nyoñ abime da yiane tañ bôt é ne *nda jé. 17Ane bôte ya Israél be nga bo nalé, ane be nga kôan, bôt bevok, a lôte abime e mbe ntiñetan, a ba bevok be nga sise si ya abim e mbe ntiñetan. 18E menda été, be nga suʼulane vek a ôvek ba loone na ômer. E môt ase a nga kôan alôte abim e mbe ntiñetan, a nji nyoñ a abet, a nyô a nga kôan a sise si ya abim e mbe ntiñetan, e bôt bevok be nji ke nyoñ a dañe nye; môt ase a nga nyoñ vʼabime bidi da yiane nye. 19Ane Môze a nga jô be na môt a boʼo te naane bikaʼaé. 20Ve be nga bo te vôʼôlô Môze; bevok be nga naane bikaʼaé, ane bitum bi nga bo été, nde bi nga mane ndaman. Ane Môze a nga yaa bôte bete. 21Metyé mese môt ase a nga kôane abime da yiane bidi bié; éyoñ ayôñe vian e kuiya, *manna ate a mbe a mane nyemé.

22E môse saman, be nga kôan abim da yiane ndian *môs mibaé, e ne na bʼômer bebaé. Bivet bise ya nsamba bi nga zu kate de Môze. 23A Môze a nga jô be na: Nalé ate Nti a nga jô. Akiti e ne môse abôk, mfufub Nti; yamane jôm mia yiane yam, a toʼotô jôm mia yiane toʼotô, abime da buk, jôkaʼane de a kui mametyé. 24Ane be nga jôʼé de a kui mametyé avale Môze a nga bendé; abim e nga buʼu te e nji ke ndaman, nge bo bitum. 25Ane Môze a nga jô na: Jaʼane de e môse wu, amu e môse wu ô ne môse *sabat e mfaʼa Nti; nge mia ke fé den mia ye bo te yene jôm. 26Mia ye kôane *manna tañe môse misaman, ve môse zamgbwale ô ne môse *sabat, mia ye bo te yene jôm.

27E môse zamgbwale bôt bʼéziñ be nga kui atane na ba ke kôane *manna, ve be nji yene jôm. 28Ane Nti a nga jô Môze na: A kui éyoñ évé mia ye bene baʼale mebendé a metiñe mam. 29Yenane na Nti a veya mia awoʼon, amu ajô te a veya mia bidi asu môse mibaé, e môse saman môt ase a tabeʼe e vôm a né, môt éziñ a boʼo te kôlô e vôme wé e môse zamgbwale. 30Ane bôt be nga semé *sabat, nalé a ne na e môse zamgbwale.

31Ane *nda bôt Israél é nga yôlé bidi bite jôé na *manna, a funaʼane fese korianda, éfumulu a *zam anyu ane begatô be wôé.

32Ane Môze a nga jô na: Avale di nde Nti a bendé na, mi baʼale ômer *manna wua asu miaé mi bôte mienan mia zu, ane miaé mia ye yene belet me nga ve mia mi di e *nkôte si, éyoñ me nga vaa mia mi kôlô Ejipte. 33Ane Môze a nga jô Aron na: Nyoñe éwolo a futi ômer *manna wua, a bôé éwolo te asu Nti, ane ba ye baʼale *manna ate asu miaé mi bôte mienan mia zu. 34Avale Nti a nga bendé Môze, Aron a nga bôé éwolo *manna te ôsu mekoʼo metiñ ya élat mfaʼa ya baʼale je.

35Bôte ya Israél be nga di *manna tañ mimbu mewôm menyin, akekui éyoñ be nga kui vôme bôt be too; be nga di *manna akekui éyoñ be nga kui nné si ya Kanaan. 36Ômer wua a ne *ngab awômô ya ôveʼe ba loone éfa.

Bible en langue Bulu

© LʼAlliance Biblique du Cameroun, 2007

More Info | Version Index