Search form

NKÔLAN 17

Israél a kobô menyiñ e Refidim

(Nlb 20:1-13; Sam 78:15-16; 114: 7-8)

1Ane nsamba bôt ôse ya Israél ô nga kôlô e *nkôte si ya Sin avale Nti a nga bendé nkôlane wop; ane be nga vule minkan e vôm ba loone na Refidim; mendim bôt be ne nyu me mbe momo. 2Ane bôt be nga wôman Môze a jô na: Vaʼa bia mendime ya nyu. Môze a nga yalane be na: Amu jé mia ve ma bijô, amu jé mia veʼele Nti? 3Valé ate évé é lateya bôt, ane be nga kobô menyiñ a wosane Môze be jôʼô na: Amu jé ô nga soo bia Ejipte na ô mane wôé bia a évé, mamien, bone bam a mimbam biyeme miam? 4Ane Môze a nga yône be Nti a jô na: Ma ye bo jé mfaʼa bôte ba? Amu a liʼiya tyôtyoé na be lume ma *mekok. 5Ane Nti a nga jô Môze na: Señesaʼane bôt ôsu a nyoñe bemvendé ya Israél; nyoñe fe *ntum, wu ô nga bibi wô beta ôsôé a wo ye ke ôsu. 6Me nyô, me tele wo ôsu akôm Hôréb yôp, wo ye bibi akôm a mendim ma ye vam été éyoñe te bôt ba ye nyu. Ane Môze a nga bo nalé e mise bemvendé ya Israél. 7Ane a nga yôlé vôm ate na Masa ba Mériba, amu bôte ya Israél be nga wôman a amu be nga veʼele Nti be jôʼô na: Ye Nti a ne ézezañ jangan ye momo?

Bôt ya Amalék ba zu wosan Israél

(Dt 25:17-19; 1 S 15; 1 Minkte 4:42-43)

8Ane Amalék a nga zu wosane Israél e Refidim. 9Ane Môze a nga jô Yasua na: Tobôk bia bôt; a akiti ma ye tebe abôbône nkô, ntume Zambe e wo. 10Ane Yasua a nga bo aval ane Môze a nga jô nye. Môze, Aron a Ur be nga bete abôbône nkô. 11Eyoñ Môze a nga bete wo yôp, Israél nye a nga dañe ngu; éyoñ a sili wo si, Amalék nye a nga dañe ngu. 12Eyoñe mo me Môze me nga tek, ane be nga nyoñe akok a bôé nye de si, ane a nga tabe de yôp. Aron ba Ur be nga suʼu nye mo, wua éfase ji a nyô mbok éfase ji; ane mo mé me nga yem a kui éyoñ jôb e nga dim. 13Ane Yasua a nga dañe Amalék a bôte bé a meyo me nkpwaté mekôn. 14Ane Nti a nga jô Môze na: Tiliʼi mam mete e kalate été a kate Yasua na: Ma ye tyame ôsimesane ôse be ne ngul ya simesan Amalék e jôbe si va. 15Ane Môze a nga lôñe ataʼa metunaʼa vôm ate a yôlé nye jôé na: Nti a ne nlinga bita wom. 16Ane a nga jô na: Amu wo ô betebaneya yôb a wosane éto njôane Nti, nde Nti a ye wosane Amalék akekui miaé mise.

Bible en langue Bulu

© LʼAlliance Biblique du Cameroun, 2007

More Info | Version Index