Search form

NKÔLAN 19

Israél a kui nkôle Sinayi

(Dt 5:2; 4:10-12; 33:2-3; Hé 12:18-24)

1E metataʼa ya ngone lale ya nkôlane wob ya Ejipte, Israél a nga kui môse te *nkôte si ya Sinayi. 2Nkôlane ya Refidim, ane be nga kui e *nkôte si ba loone Sinayi a vule minkane valé zôsôôô a nkô.

3Ane Môze a nga bete be Zambe; nde Nti a nga loone nye e nkôle yôb a jô nye na: Avale di nde wo ye kobô *nda Yakob a kate bôte ya Israél na: 4Miabebien mi nga yene jam me nga bo Ejipte, ane me nga beʼe mia e mefabe me ndôé a zuu mia e be mamien. 5Ajô te, nge mia ye tuʼa vôʼôlô tyiñe jam, a baʼale élate jam, mia ye bo ayoñe dame mamien ézezañe *meyoñ mese été, amu si ése é ne énjam. 6Mia ye bo mfaʼa wom ayoñ betuni, mfufub ayoñ.

7Ane Môze a nga sis e nkôle si a loone bemvendé bese ya ayoñ, a kate be mejô mese aval ane Nti a nga bendé nye. 8Ane bôte bese be nga yalane tyiñe jia na: Bia ye bo mam mese Nti a jôya bia na bi bo; ane Môze a nga bulane ke kate Nti mam mese bôt be nga jô. 9Ane Nti a nga jô Môze na: Ô lôô ma ye zu e be wo e dibi *nkut été, nalé bôt ba ye wôk éyoñ ma ye kobô wo, a tabe wo ndi biyoñ bise. Ane Môze a nga bulane ke kate Nti mam mese bôt be nga jô.

10Ane Nti a nga jô Môze na: Kele be bôt a tune be e môse wu a akiti; be sôbe mengômesane map. 11Be tabe nkômesan asu môse lale, amu Nti a ye sis bôte bese be lôô a mis. 12Wo ye ve bôte bese minné mbômaʼan vôm ase ô jôʼô be na: Tabaʼan ntyel ya bete nkô nge nambe éwom ya été: Amu môt ase a ye nambe nkô a ye foʼo wôéban. 13Ba ye bo te nambe nye a mo, ve ba ye lume nye *mekok, nge na ba ye lume nye akoñ, toʼo a ne tit nge môt, a ye bo te nyiñ. Eyoñ toñ nlaʼa nnôm ntômba ja ye loñeban, ba ye bet e nkôle yôp.

14Ane Môze a nga sise nkôle si a ke mfaʼa bôt be mbe; ane a nga tune be, a ane be nga sôbe mengômesane map. 15E nde ñhe a nga jô bôte na: Tabaʼane nkôman den melu mela, môt a boʼo te subu minga éziñ bebé.

16E môse lale mametyé, ndume mveñ, zoʼoyañ a afibe *nkut bi nga bo a yiane nkô; ane tyiñe toñ é nga wôʼé ngul abui, a bôte bese be mbe minkan be nga fôʼôban. 17Ane Môze a nga kuli bôte bese atan minkan, be ke tôbane Zambe: Ane be nga tebe e nkôle si. 18Otita ô nga jaé e nkôle Sinayi ôse amu Nti a nga sise wô yôb e nduan été; ôtita te ô nga bet ane wu ya mbeʼe nduan, a nkôl ôse ô nga suʼuban a ngul ése. 19Toñ é nga dañe dañ kobô ngu. Môze a kobôʼô, a Zambe a yalaʼane nye, a *tyiñ é funaʼan zoʼoyañ. 20Avale te Nti a nga sise Nkôle Sinayi yôp, abôbône nkôle yôp, a Môze a nga bet.

21Ane a nga jô Môze na: Sise si a tuʼa lebe bôte na be tabe ntye, amu be za zu bebé vôme Nti a né, a kômbô yen: Abui e za mane wu. 22Nalé fe na, betuni ba yiane subu bebé be Nti be taté tune bebien: Nti a za jiane ngab éziñ ya be be. 23Ane Môze a nga jô Nti na: Bôt be se ngul ya bet nkôle Sinayi amu ô nga tuʼa ve bia ayemé na, bi telé minné e nkô a telé wô étyi. 24Ane Nti a nga jô nye na: Tatéʼé sise si, éyoñe te wo ye suʼulane bet mia Aron; ve betuni ya ayoñ be boʼo te jeñe na be bet a zu vôme Nti a né, amu a za jiane bôte bevoʼo ya minsamba miap. 25Ane Môze a nga sise vôme bôt be nga too a kobô be.

Bible en langue Bulu

© LʼAlliance Biblique du Cameroun, 2007

More Info | Version Index