Search form

NKÔLAN 20

Metiñ awôm

(Dt 5:2-22; Mt 5:17-48; 22:35-40; Rm 13:8-10; Yo 1:17; Dt 5:22-31)

1Ane Nti a nga kobô mam mana mese a jô na: 2Me ne Nti e Zambe wôé, nyô a nga bo wo ô kôlô Ejipte *nda belo: 3Te bi bezambe befe ôsu viam. 4Wo ye bo te bi jôm é ne nkpwelan nge bi éveʼelaʼa ya jôm ése é ne yôp été nge *si nyô si, nge mendim me ne e si nyôna si; 5Te kute bie meboñe si nge kañe bie, amu me ne Nti e Zambe wôé, nyô a ne *aban, nyô a ve *bon melep amu *abé bʼésaa bap, akekui miaé lale nge miaé nyini ya ba ba vini ma, 6ma mvamane fe betoyini ya ba ba nyeʼe ma a baʼale metiñe mam. 7Wo ye bo te tote jôé Nti étotetoté, amu Nti a nji yene môt te bijô, nye a tote jôé dé étotetoté. 8Simesaʼane môse *sabat a telé wô étyi. 9Wo ye saé tañe môse minsaman a bo bisaé biôé bise. 10Ve wu zamgbwale ô ne môse awoʼon mfaʼa Nti e Zambe wôé. Te bo avale ésaé éziñ *môs ôte, toʼo womien toʼo monafame wôé, toʼo mona minga wôé, toʼo mbo ésaé wôé a ne minga, toʼo nyô a ne fam, toʼo biyeme biôé, toʼo beyeñe bôé be too nlame wôé. 11Amu Nti a nga té yôb a si a mañ a biôm bise bi ne été môse misaman; e môse zamgbwale a nga woʼon. Ajô te Nti, a nga botane môse *sabat a telé wô étyi. 12Seméʼé ésoo ba nyua, nalé ate wo ye tabe melu abui e si Nti Zambe wôé a ve wo. 13Te wôé môt. 14Te bo *mejian. 15Te wup. 16Te bôte môt ajô. 17Te nyamete *nda môt mia nye mi too, nge nyamete minga wé, nge mbo ésaé wé a ne fam, nge nyô a ne minga, nge éjakase jé nge jôme éziñ jé éfe ése.

18Bôte bese be nga yene mindum mi mveñ, zoʼoyañ, tyiñe toñ a nkô ô nga kui ôtita. Eyoñ bôt be nga yene mam mete, ane be nga fôʼôban a tebe ôyap. 19Ane be nga jô Môze na: Womien kobôʼô bia, ve te kañese na Zambe a kobô bia, bi za mane wu. 20Ane Môze a nga jô bôte na: Te koone woñ, amu Zambe a nga zu na a veʼele mia, nalé mia ye ko nye woñ a saʼale *abé. 21Bôt be mbe be tele ôyap, ve Môze a nga subu nkute bebé, e vôme Zambe a nga too.

Atiñ asu ataʼa metunaʼa

(Dt 27:5-7; Mt 18:20)

22Ane Nti a nga jô Môze na: Wo ye kobô bôte ya Israél na, mi nga yen ane me nga kobô mia me too e yôb été. 23Mia ye bo te bi bezambe be ne mboon a silba nge mvot e fefele jam, mia ye bo teke veʼele bi be. 24Wo ye lôñe ma ataʼa metunaʼa a tyia e vôm wo ye ve ma mimvean mi ne ngumba, nalé fe mimvean ya ve Zambe akéva a late nye ngbwa: Beta mbam a mone mbame biyeme wôé; e vôm wo simesane jôé dam, ma ye zu e be wo a botane wo. 25Nge wo lôñe ataʼa metunaʼa a *mekok, wo ye bo te lôñe a *mekok me ne mbaan, amu éyoñ wo ba mekoʼo mete a bivôle biôé, wo ndaman étyi jap (nge na wo ve me mvin). 26Wo ye bo te bet ataʼa metunaʼa dam a étune *zen, be za yene soé jôé.

Bible en langue Bulu

© LʼAlliance Biblique du Cameroun, 2007

More Info | Version Index