Search form

NKÔLAN 21

Metiñ ma fombô ajô alo

(Yer 34:8-17; Dt 21:10-14)

1Mintyiʼan wo ye liti be e mie mi: 2Eyoñ wo ye kuse *ôlo ô too mone Hébre, a ye saé tañe mimbu misaman, ve mbu zamgbwale, a ye kôlô fili teke yaʼane jôm. 3Nge a nga so étam, a ye fe kôlô étam. Nge a nga so a bili minga, ba nga ba ye kôlô bebaane. 4Nge masa wé nye a nga luʼu nye minga a biaé nye bobefam a bobebinga, minga a bone bé ba ye bo biôm bi masa, a *ôlo ôbien wo ye kôlô étam. 5Nge *ôlo wo yemete na: Ma nyeʼe masa wom, nalé fe e minga wom a bone bam, me nji kômbô kôlô, 6éyoñe te masa wé a ye zuu nye bebé e be Zambe, a kele fe nye bebé évin nge akône *mbé, éyoñe te masa a ye tube nye alo a jôm é ne nsoñ, éyoñe te a ye saane masa wé ngum nté ényiñ. 7Eyoñe fam ja ye kuane monaminga wé ane *ôlo, a ye bo te kôlô avale alo da kôlô. 8Nge masa wé a nga kuse nye, a nji yene nye mvaé, masa ate a ye bo na a kôtéban avô; ve a nji bi ngul ya kuane nye e be bikuu, amu a nji wulu nye ane e ne zôsôôô. 9Nge a luʼu nye e monafame wé, a ye belane nye ane metiñ ya nkeane bengon meluk ô né. 10Nge a nyoñe minga mfe, a ye bo te séʼé nge bidi, nge ngômesan, nge mam mese ya ma yiane aluʼu minga ôsu. 11Nge a nji bo nye e mam melale ma, minga ate a ne ngul ya kôlô teke yaʼane jôm, teke ve moné.

Metiñ ma fombô bibôm a meveñ

(Dt 21:18-21; Lv 14:17-22; Met 9:5-6)

12Môt a bôm e môte mbok akekui a wu, ba ye foʼo wôé nye.

13Nge a nji bôé nye ékolé ôbaʼa ôsu, ve Zambe émien nye a veya nye nye, ma ye telé wo vôm a ne nguleya ke sobô.

14Ve nge môt a vañe wôé môte mbok ndimba, toʼo a tele ataʼa metunaʼa dame yôp, wo ye vaa nye a wôé nye.

15Môt a bibi ésaa nge nyia a ye wôéban.

16Môt a wube môt a kuane nye nge baʼale nye e mo mé, a ye wôéban.

17Môt a yoʼé ésaa nge nyia, a ye wôéban.

18Eyoñ bôt bebaé ba wôman, nge wua ya été a lume nyô mboʼo akok nge bibi nye ékuta, ve nye teke wu, ve nalé a boʼo nye na a bômbô si, 19nge a ne ngul ya beta kôlô si a wulu atan a *ntum, môt a nga bibi nye a ye kôlô teke étom, ve a ye tuni nye amu ntelan a nga telé nye ésaé. Nalé fe na a ye saé nye akekui a ntoo *mvoʼé. 20Nge môt a bibi *ôlo vié a *ntum, toʼo *ôlo te ô ne fam nge minga a be wu nye mo, a yiane tôban akunaʼa. 21Ve nge môse wua nge mibaé mia lôt *ôlo ôte teke wu, wo ye bo te kuneban amu ô ne e moné wé.

22Nge befam ba luman, be jimbi mbubume minga, wô ve biaé teke mbia jam mfe, ba ye yaʼane aleman nnôme minga ate a ye yete be; ba ye yaʼane nye aval ane bekum ba ye jô. 23Ve nge jam e ne *abé da kui, éyoñe te ényiñ ja ye tañe ényiñ, 24nalé fe dis da ye tañe dis, asôñ da ye tañe asôñ, wo wo ye tañe wo, abo da ye tañe abo, 25ndiʼan wo ye tañe ndiʼan, aveñ da ye tañe aveñ a nlun wo ye tañe nlun.

26Nge môt a bibi e dis *ôlo vié, toʼo ô ne fam nge minga, a dise te e tui, môt ate a ye suu *ôlo te ô ke fili, nalé a ne maʼane ya dise dé. 27Nge a koé asôñe *ôlo ô ne fam nge minga, a ye suu wô fili, nalé a ne maʼan ya asôñe dé. 28Nge nnôme nyak a jii fam nge minga nlak wôna fam nge minga ate a wu, ba ye lume nnôme nyaʼa ate *mekok a ba ye di minsône mié a môt a ne nye a ye bo teke étom. 29Ve nge nnôme nyaʼa ate a tameya zu a lume bôte minlak, be kate fe môt a ne nye nalé, ve nye teke baʼale nye, ba ye lume nye *mekok nge a wôé fam nge minga, ba ye wôé môt a ne nye. 30Nge môt a ne nye a ne ntindane ya yaʼan aleman mfaʼa ya kôté ényiñe jé a ye ve tañ ése é ne nye ntindane ya ve. 31Nge nyak ja jimbi mona fam nge mona minga, avale bi yeneya mvus, nne fe ba ye wulu ajô te nalé. 32Nge nyak ja jimbi *ôlo ô too fam nge minga, ba ye yaʼane môt a ne *ôlo te tañe besikel be silba mewôm mela, éyoñe te fe ba lume nnôme nyak ate *mekok. 33Nge môt éziñ a ye liʼi mfaʼan anjeñ ô yoo, nge na môt a ye faʼa anjeñ te buti de, wôna nnôme nyak nge éjakas bi kpwele été, 34miene anjeñ a ye yaʼan miene éyem ja te ku anjeñ moné éjiane ya éyem, a émien a ye nyoñe mbim éyeme te.

35Nge nnôme nyaʼa môt éziñ a jii nnôm nyaʼa e môte mbok minlak a wôé nye, bôte bete ba ye kuane nnôme nyak a vee a kabane moné; avale te fe ba ye kabane nnôme nyak a ne ñwuan. 36Ve nge nnôme nyak a te wôé nyô mbok a tame zu a bo nalé, môt a ne nye te baʼale nye, môt a ne nye a ye yaʼan nnôme nyak a vee éjiane nyô a nga wu.

Metiñ ma nambe ndamane biôm

(Nk 20:15; 2 Sam 12:1-6; Za 5:3-4; Lv 6:2-7)

37Nge môt éziñ a wub nnôme nyak nge mone ntômba, nge a tyiʼi nye *tyiñ nge kuane nye, nnôme nyaʼa wua a ye yaʼane betan a bone biyem benyin señe mone ntômba.

Bible en langue Bulu

© LʼAlliance Biblique du Cameroun, 2007

More Info | Version Index