Search form

NKÔLAN 22

1Nge ba bi ñwuwub ô tube mfin a wôé wô, awu dé te da ye bo te bijô e be môt éziñ, 2ve nge be nga wôé wô a koone na jôb e tôôya, bôt be nga wôé wô ba ye beʼe mekua ya awu dé. Ñwuwup wo ye yaʼane tañ, ve nge ô nji bi jôm, ba ye kuane wô amu wube wé; 3Nge jôm ô nga wup, nnôm nyak, éjakas nge mone ntômba é ngenan é vee, e mo mé, maʼane mé ma ye bo biyoñ bibaé.

4Nge môt a zametane mam afube éziñ été, nge ke afube mindiʼi mi woon, nge lôme mbame biyeme wé ô ke di bidi éza afup, môt ate a ye yaʼan a mbamba bibuma, bi ya nya afubu a bi ya afube mindiʼi mi woon.

5Nge nduan ja yôñ e sas biteñ, a mimbom mi nlisi nge nyô a ngenan nge afub ebien a bia mane dik, môt a nga boʼé nduan éte a ye yaʼan éjian ya biôm bite. 6Nge môt éziñ a ve nyô mboʼo moné nge biôm bife na a baʼale nye bie, biôm bite ve wuban e *nda môt a baʼale bie, nge ñwuwube te wo yené, wo ye yaʼane maʼan biyoñ bibaé. 7Nge be nji yene ñwuwube te, môt a ne *nda biôm bia te wuban a ye subu asu Zambe a jô tyiñe yôb na: A nji same wo wé a nyoñ éza akum.

8Nge jam éziñ ya mvô e fombôʼô nyak, éjakas, mone ntômba, ngômesan nge jôm éziñ é ne njañan, da ye yené na e ne bebela, ajô ya mengam mebaé mete da ye kui asu be Zambe; nyô Zambe a ye ve mekua a ye yaʼan nyô mbok maʼan biyoñ bibaé. 9Nge môt éziñ a ve nyô mboʼo été éjakas, nnôme nyak, mone ntômba nge éyem éfe, a éyeme te ja wu nge buʼi abo, nge nyoñebane bilanda môt teke yen, 10bôte bete bebaé ba ye kalane jôé Nti: nyô a nga baʼale éyem a ye jô tyiñe yôbe na: A nji same wo wé a nyoñ éza akum; mmiene éyem a ye kañese ngana éte a môt a te kane je a ye bo teke yaʼane tañ. 11Ve nge éyem é nga wuban e *nda jé été, a ye yaʼane mie éyeme tañ. 12Nge ñyôyoʼo tit éziñ ya afan ñwô ô nga nyabe éyeme te mefus, môt a nga bili je été a ye soo mefuse ya été ane ngaa ya te bijô wôé, a a ye bo teke yaʼane tañ.

13Nge môt a kôlé môt éyem, je ve buʼi abo nge wu mie éyeme e mo, môt a nga kôlé a ye yaʼane tañ. 14Nge jame te da boban mie éyeme a too, môt a nga kôlé a ye bo te yaʼane tañeya éjian. Nge be nga yôé éyem a tañ, tañ éte ja yian.

Esemé mfaʼa Zambe a môta binam

(Dt 22:28-29; Lv 20:27; Dt 18:10-14; Sam 10:14-18; Rm 13:1-7; Mink 3:9-11)

15Nge fam éziñ ja won éndune ngon é ngenan teke *atiñ aluk a jôʼôbô je, a ye yaʼane nsuba éndune ngone te é nga yiane yaʼane na a ke aluk a luʼu fe je é bo e minga wé. 16Nge ésaa ngon a bene ve nye ngo jé, a ye yaʼane moné tañe nsuba é ne ntyiʼan asu bindun bengon.

17Wo ye bo te nyii ngbwengbwele minga.

18Ba ye wôé e môt ase a jôʼôbô a éyem.

19Nyô a tyiʼi bezambe befe biyem, vengevenge ve Nti étam, a ye foʼo wôéban. 20Wo ye bo te diane *ntabe nge tibili wô; amu mia fe mi mbe mintabe si ya Ejipte.

21Mia ye bo te tibili nkus nge monenyui. 22Amu nge wo tibili be a be ke be yône be ma, ma yem ane ma ye wôʼô miñyône miap. 23Ayoʼo dam da ye yôñ, a ma ye wôé mia a nkpwaté mekôn; binga benan ba ye liʼi minkus a bone benan ke bobenyui. 24Nge wo kôlé môte ya bôte bam moné, nge éngôngole môt mia je mi too, te bo nsé memvôla wé, a wo ye bo te sili nye tañ a nseñge. 25Nge wo nyoñ e môte mbok alôʼô éban, wo ye bulane nye de jôb é ngenan te dim; 26amu nje étam ja volô nye avep, nje étam ja buti ékôbe jé; nge nalé momo a ye bômbô vé? A nge a yône be ma, ma ye wôʼô nye amu ma me ne nyô a wôʼô nye mintaé. 27Wo ye bo te yoʼé Zambe nge tote bifia meta bia wosane njô bôte ya ayoñe dôé.

28Wo ye bo te tyendé éyoñe wo yiane ve ma ngabe jôé ya woon, a mbon wo yiane ve ma. Wo ye ve ma ntôle ya bobefame bôé. 29Avale te fe wo ye bo mfaʼa ya mimbame biyeme miôé, ataté mi mi ne anen a kui mi mi ne tyôtyoé. Ntôl ôse wo ye tabe e fefele nyia tañe melu zamgbwa; e môse muam, wo ye ve me wô.

30Mia ye bo bôt be ne étyi mfaʼa wom. Mia ye bo te di mbilize tit ya mefup: mia ye wua wô bemvu.

Bible en langue Bulu

© LʼAlliance Biblique du Cameroun, 2007

More Info | Version Index