Search form

NKÔLAN 23

1Wo ye bo te miase foé é ne minsos. Wo ye bo te volô mbia be bôt nge bo ngaa wob a ne minsos. 2Wo ye bo te tôñ ôndula bôt mfaʼa ya bo *abé, nalé fe teke ngam é ne ékotekot amu na bôt abui be ne ngame éte a tyame nyiʼane mejô ô ne zôsôôô. 3Te vañe volô *nzôzoé môt éyoñ ya ntyiʼane mejô. 4Eyoñ wo ye tôbane nnôme nyak nsiñe wôé, nge éjakase jé é jañeya fé, wo ye soo nye bie. 5Nge wo yene éjakase môt a vini wo é nga ye wu a adite mbeʼe, a *nlem wo bo wo minsitik ya volô je, te lôt, ve volô nsiñe wôé na éjakase éte é beta tebe *mvoʼé a mebo mé. 6Te tibi zôsôôô a yiane *nzôzoé éyoñ ya ntyiʼane ajô dé. 7Wo ye tabe ntyel ya kobô bikotekote mejô. Wo ye bo te bo na nyô a ne te bijô a zôsôôa môt be wu; amu mbia môt a ye bo te yené zôsôôô e mise mam. 8Wo ye bo te nyoñe éboteze; amu biboteze bia bo bôt ba yeme fas ndim a viti bifia bezôsôôô be bôt.

9Wo ye bo te tibili ntabe; miabebien mia yem avale *ntabe a yen éyoñ ba tibili nye: amu mia fe mi mbe mintabe e Ejipte.

Metiñ ya mimbu mi ne ntelan étyi a mebôk

(Lv 25:18-22; Dt 5:13-15)

10Wo ye saé éfuse si ése mimbu misaman a kôane bibuma ya été. 11Ve mbu zamgbwale wo ye ve je awoʼon é tabe a ébien; minzôzoé ya bôte bôé mia ye di a betite ya fé fe ba ye di *mebukaʼa. Nalé fe wo ye bo afube mindiʼi mi woon dôé a di beôlivié. 12Wo ye bo ésaé jôé tañe môse misaman, e wu zamgbwale, wo ye semé *sabat, nalé ate nnôme nyaʼa wôé a éjakase jôé bia ye bi awoʼon, nalé ate fe mona fame mbo ésaé minga wôé a *ntabe ba ye bo ne vebe.

13Mia ye tabe ntyel mfaʼa ya mam mese me maneya jô mia ma, a mia ye bo te kee minleme mienan na, mi simesane jôé azezambe afe; jame te e boʼo te kui anyu dôé.

14Mbu ôse, biyoñ bilaa, wo ye jeme abôk amu ma. 15Wo ye baʼale abôʼô mimmaman mi belet mi ne te mvusan. Wo ye di mimmaman mi belet mi ne te mvusan éyoñ me nga tiñeti wo, e ngon ba loone Abib, tañe melu zamgbwa, avale me nga bendé wo, amu ngon éte nje ô nga kôlô je Ejipte; a môt a ye bo te tebe asu dam mo zesé.

16Wo ye fe baʼale abôʼô nkôane bidi, a di ya *bembômô ya ésaé jôé, *bembômô ya biôm ô nga bé e mefup; nalé fe abôʼô ya mvaane bidi amané mbu, éyoñ wo ye nyoñe ébuma ya ésaé jôé e mefup. 17Biyoñ bilaa mbu, bôte bôé bese ba ye zu asu be Nti, e Zambe wônan. 18Wo ye bo te ve mveane wom ba tyik fufulu a belet é ne mvusan nsamba wua, a avoñ ya éyem ba te tyik asu abôʼô dam ba ye bo te baʼale de akui mametyé. 19Wo ye zuu *bembômô ya bibuma bi ôsu bia taté wume si jôé e *nda Nyô a too nnôm éto.

Wo ye bo te yame mon ékela e menyañ me nyia été

Ngakaʼa ya nyiin e Kanaan

(Eza 63:9-10; Nk 34:11-16)

20Ma ma lôme Engele wom ôsu viôé na, a baʼale wo e *zen a kui wo e vôm me nga kôm. 21Tabeʼe ntyel asu dé, wôʼô nye; te bo nye na a wôʼô ôlun, amu a ye bo te jamé *abé denan: Amu jôé dam e ne be nye. 22Ve nge wo bo nye mewôk, a nge wo bo jam ese ma ye jô wo, ma ye bo nsiñ ya besiñe bôé, a ntebe yate ya ba be tele wo ngame yat. 23Engele wom a ye wulu ôsu viôé a kee wo e be Beamorééñ, Behétieñ, Beférézieñ, Bekananééñ, Behévieñ a Beyébuzieñ, a ma ye mane jiane be.

24Wo ye bo te vitibi si ôsu ya azezambe dap, a wo ye bo te saane be; wo ye bo te bo ane ba bo, ve wo ye sôʼôlô be si a buʼu mekône mab bitun. 25Mia ye bo Nti e Zambe wônan bisaé: a ye botane fembé jenan a mendime menan, a ma ye vaa ôkon ézezañe jôé. 26E si jôé, teke minga éziñ abum da ye vas, a teke minga a ye bo nkôkôm: ma ye fe bo na ô nyiñ ayap.

27Nkoon ya ko ma woñ wo ye kee wo ôsu; ma ye jañele feʼe ya *meyoñ mese me ne vôm wo ye ke, a ma ye bo na besiñe bôé bese be mate asu dôé. 28Ma ye lôme beta memvam ôsu viôé a mme ma ye titane wo Bekananééñ, Behévieñ a Behétieñ be ke wo ôyap. 29Ve ma ye bo te titane be be ke wo ôyab mbu wua, si é za liʼi bilik a mbia betit ya afan be za fôé a wosane wo. 30Ve ma ye titane be ôteʼetek be ke wo ôyab akekui wo ye bo ngule ya mane nyoñe si.

31Ma ye telé nné wôé ataté évele mañ a kui mañ Befilisteñ, a ataté *nkôte si a kui ôsôé: amu ma ye ve bôte be too si éte e mo menan a wo ye titane be ôsu viôé. 32Wo ye bo te bo élat a be nge a azezambe dap. 33Ba ye bo te tabe si jôé, be za bo wo na ô bo *abé a wosane ma: amu nge wo ye bo azezambe dabe bisaé, jame te da ye bo ôlam mfaʼa wôé.

Bible en langue Bulu

© LʼAlliance Biblique du Cameroun, 2007

More Info | Version Index