Search form

NKÔLAN 24

Mboone élat

(2 Mink 15:11-15; Yas 24:22-27; Hé 9:18-23)

1Zambe a nga jô Môze na: Betek e be Nti, womien a Aron, Nadab a Abihu a bôte mewôme zamgbwa ya bemvendé ya Israél a mia ye kute meboñe si ôyap. 2Môze nye étam a ye subu bebé e be Nti, bôte bevok ba ye bo te subu a ékôan bôt ja ye bo te bete be nye. 3Ane Môze a nga zu kate bôt mejô mese Nti a nga jô. A mintyiʼane mise. Ane bôte bese be nga yalane tyiñe jia na: Mejô mese Nti a kobôya, bia ye bo me. 4Ane Môze a nga tili nkobô Nti ôse; a nga kôlô si ndibe tyé, a lôñe ataʼa metunaʼa e nkôle si, a telé mekôn awôm a mebaé asu meyoñe awôm a mebaé ya Israél. 5Ane a nga lôme bisoé biziñ ya bôte ya Israél be ve mimvean mi ne ngumba, a tyiʼi fe beyôm benyak asu njeñan ya jeñe *mvoʼé a nlatane ngbwa a Zambe. 6Ane Môze a nga nyoñe éfase metyi jia a futi me befandé été; ngabe fok nje a nga miame ataʼa metunaʼa yôp. 7Ane a nga nyoñe kalate élat a lañe nye bôt, ane be nga jô na: Bia ye bo mam mese Nti a jôya a bia ye bo mewôk. 8Ane Môze a nga nyoñe metyi a miame me bôte nyô a jô na: Yenane a metyi ya élate Nti a boya a mia e mbôkaʼa ya mejô mana mese yôp.

9Ane Môze ba Aron be nga bet a Nadab a Abihu a mewôme zamgbwale ya bemvendé ya Israél. 10Ane be nga yene e Zambe Israél: E mebo mé si éfunan ane jôm é ne mboon a akoʼo da ngemban abui ba loone safir, éfunane fe ane yôp éyoñ é ne mfubane wé été. 11A nji ke same wo wé mfaʼa benyabôtô ya Israél. Ane be nga bi ôsmesan éziñ ya Zambe: nde be nga di a nyu.

12Ane Nti a nga jô Môze na: Bete be ma, nkôle yôp, a tabe valé: Ma ye ve wo bifase *mekok, *atiñ a abendé me nga tili na ô yeʼele be. 13Ane Môze a nga kôlô si ba Yasua, nyô a nga volô bo nye ésaé; ane Môze a nga bete nkôle Zambe. 14Nde a nga jô bemvendé na: Yangaʼane bia va, akekui bia ye beta zu koone mia. Mia be Aron a Ur mi ne vôme wua, nge môt éziñ a bili jam da sili nkôman, éyoñe te mia yene be. 15Ane Môze a nga bete nkôle yôp, ane *nkut ô nga yandane nkô. 16Ane étôtoʼo Nti é nga tabe e nkôle Sinayi yôp, a *nkut ô nga yandane wô tañe melu mesaman; e môse zamgbwale, Nti a nga loone Môze nsum *nkut été. 17Etôtoʼo Nti é nga yené e mise bôte ya Israél abôbône nkôl ane nduan ja yôñ. 18Nde Môze a nyiine nsum *nkut été a bete nkôle yôp. Môze a nga tabe nkôle yôb tañe môse mewôm menyin a melu mewôm menyin.

Bible en langue Bulu

© LʼAlliance Biblique du Cameroun, 2007

More Info | Version Index