Search form

NKÔLAN 25

Nlôñane Tabernakel a mebendé ya été

(Nk 35:4-35)

1Ane Nti a nga kobô Môze na: 2Kobôʼô bôte ya Israél na: Be vaa mvean ya ékañaʼa wom. Mia ye vaa wô e be môt ase *nlem ô ne ésôs. 3Mvean mia ye vaa e be môt ase ñwô wu: Silba a mvot; 4biyé bi ne blum, mfô a évele, abeñe biyé bi léñ a mimvot bikela; 5bikôb beyôm mintômba nduban évele, a bikôbe bi beta betit ya mañ bi ne afip, mebam mʼasé. 6Mbon asu belambe, alobinda da nyume mvaé asu mbon ba woʼo bôt éyoñ ba telé be bito a asu bityitaʼa bia nyume mvaé; 7mekoʼo me ôniks a mefe asu ya futi me e mimbot betuni ba jaé be loʼone mie na éfôd péktôral. 8Ba ye kôme ma vôm a ne étyi a ma ye tabe ézezañe jap. 9Mia ye wulu mam mese aval ane éveʼela *tabernakel é né a aval ane éveʼela ya biôm mebelan bise ya été ma ye liti wo é né.

Ewolo, Tebele, ébi bifufup

(Nk 37:1-16; Dt 10:1-5; Lv 24:5-9)

10Ba ye bo éwolo a asé; nté ya été wo ye bo menyiʼi me mo mebaé a étun, ndam anyiʼi wo da a étun, nkôñ anyiʼi wo da a étun. 11Ba ye yañe nya mvotô mfaʼa ya été a atan, a futi fe nkôngô mvot mbômaʼan mekuʼu mese. 12Wo ye kôme bilondo bi mvot binyin asu éwolo éte a futi fe bie mekuʼu menyin ya été: Bibaé li a bibaé li. 13Wo ye kôme mimbôñ mibaé a asé a yañe mie mvot. 14Wo ye some mimbôñ mite e bilondo ya mefefele mʼéwolo, mmie ba ye bo be bekeʼe mie éwolo. 15Mimbôñ mia ye tabe e bilondo ya éwolo été; a ba ye bo te vaa mie été. 16Wo ye futi bifase mekoʼo metiñ bibaé ma ye ve wo éwolo été. 17Wo ye kôme abam a nya mvotô nté ô too menyiʼi me mo mebaé a étun, ndam anyiʼi wo da a étun. 18Wo ye bo biveʼela bibaé ya beéngele ba loone Bekerubim a mvot e mekuʼu mebaé ya abame di; wo ye bo bie a mvot é ne mbiban, 19kérubim wua akuʼu di a nyô mbok akuʼu avok; mia ye bo Bekerubim ba jôme jia, nlatan a mekuʼu mebaé ya abam. 20Bekerubim ba ye same mefabe mab e yôp, mefabe mete me butiʼi abam a Bekerubim bebiene ke be lôane mesu; mesu mab ma ye fombô abam. 21Wo ye nyoñe abam a telé de éwolo yôb a futi mekoʼo metiñ ma ye kee wo éwolo été. 22Ma ye tôbane wo abame yôp, e zañe Bekerubim bebaé be tele éwolo metiñe yôp; ma ye kobô wo, nalé ma ye ve wo mebendé mam mese asu bôte ya Israél. 23Wo ye fe kôme tebele a asé: nté wé binyiʼa bi mo bibaé, ndame jé ényiʼa wo jia a étun. 24Wo ye yañe tebele ate a nya mvotô mbômaʼane. 25Wo ye bômane nye a ntem alen a yañe fe mvot e nkôngô ntemba alene te mbômaʼane. 26Wo ye lui bilondo bi mvot binyin a futi bie e mekuʼu menyin ma tôbane a mekône menyin ma tôban a tebele. 27Bilondo bia ye bo bebé a ntemb alen ô ne mbômaʼane tebele, a ba ye some mimbôñ été mfaʼa ya volô mbeʼane tebele. 28Wo ye bo mimbôñ a asé a yañe mie a mvot, mia ye volô mfaʼa ya beʼe tebele; 29Wo ye kôme bone bisua bié a bilaé bié a mekobe minlaʼa mé, a bidoʼo bisua bié; biôm bite bia ye volô mfaʼa mimvean mi woon a wo ye bo bie a nya mvotô. 30Wo ye bôôé mimmaman mi fembé mi ne ndem ya *mvoʼé e zañe Zambe a bôte bé e tebele yôp, a mia ye bômbô éyoñ ése ôsu viam.

31Wo ye bo ébi bifufup a nyaa mvotô: Ja ye boban a mvot é ne mbiban. Biôm bise ya été bia ye bo nlatane jôme jia: tin, nkuk, bikpwas, bibuma a mesam. 32Mintyaé misaman mia ye bembe je nkuk: mila éfase ji a milale mivok éfase évok. 33Ntyaé ôse ô beʼe bikpwase bilaa bi too éveʼela ane amande, ékpwas ése é bili bibuma a mesam. Ntyaé ôvok ô bili bikpwas bilaa éveʼela ane amande bibuma a mesam bi too été. Avale te da ye bo mfaʼa mintyaé misaman mia ye bembe ébi bifufup. 34E tine ya ébi bifufup, bilaé bia ye bo binyin, éveʼela ane amande, *élaé é bili bibuma bié a mesame mé. 35Ebuma ja ye tyebe e mibaé ya mintyaé mi ne bifufube si; a ébuma évok e mintyaé mibaé mivoʼo si. Nalé a ne na e mintyaé misaman mia so mfaʼa ébi bifufube si. 36Meton a mintyaé bia ye bo nlatane jôme jia, jia te é too mboon a mvot é ne mbiban, nya mvotô. 37Wo ye bo belambe zamgbwale ya été; wo ye futi belambe bete na be faé mfaʼa ya asu. 38Menjo ma tyiʼi nsañ lambe vôm ô maneya dik a e bone bisua asub da kutane été bia ye boban a nya mvotô. 39Ba ye belane kili gram mewôm mela a ényin (talañ), mfaʼa ya kôme ébi bifufup a biôm mebelane bié bise.

40Fombôʼô a tôñ éveʼela é litebaneya be wo e nkôle yôp.

Bible en langue Bulu

© LʼAlliance Biblique du Cameroun, 2007

More Info | Version Index