Search form

NKÔLAN 26

Avale Tabernakel a yiane boban

(Nk 36:8-38; Hé 6:19-20; 10:19-22; Nli 21:3)

1Wo ye kôme *tabernakel a ndam bindelé awôm; bindelé bite bi too nya ndombo a too ntiñan a mvosane nsinga, bindelé bite bi too menyôl mevale mela: blum, mfô a évele. Wo ye tiñ Bekerubim e bindelé bite yôp, ntiñane te ô too wu ntyetyeñ mbo ésaé. 2Nté éndelé ôse wo ye bo menyiʼi me mo mewôm mebaé a mesaman a ndam menyiʼi me mo menyin. Bindelé bite bise bia ye bo abime da. 3Wo ye tiñeti bindelé bitan jôme jia a bi bivoʼo bitan jôme jia. 4Wo ye loé nkoñ ya éndelé ja suʼulan ntiñetane bindelé bitan ya ôsu a éyé é too nyôle blum; 5avale te fe wo ye bo éndelé ja suʼulan ntiñetan bindelé bitan bi baa. Metiñ mete ma ye bo zôsôôô, mana a ma mevok. 6Wo ye bo bibandan bi mvot mewôm metan a late bindelé jia a ji évok a bibandane bite, nalé *tabernakel a ye bo nlatane jôme jia. 7Wo ye bo andile ya *tabernakel a bifuse biyé awôm a jia bi too mboon a mimvot bikela. 8Nté éyé ôse wo ye bo menyiʼi me mo mewôm mela a ndam menyiʼi me mo menyin. Bifuse biyé awôm a jia fe bia ye bo nté a ndam avale da. 9Wo ye late bifuse biyé bitan mfaʼa wua a bisaman mfaʼa mbok; éfuse éyé saman ja ye bo mimbaʼa éfas ja jombô mfine *tabernakel ya nseñ. 10Wo ye bo metiñ me nlokoʼo mewôm metan nkoñ ya éfus éyé ja suʼulan nlatan bifus biyé wua, a metiñ me nlokoʼo mewôm metan nkoñ éfus éyé ya nlatan bifuse biyé bi baa. 11Wo ye bo bibandan bi mvot a futi bie metiñ me nlokoʼo été: nalé wo ye bo *tabernakel a bo jôme jia (mfaʼa ya andil). 12Bindelé ya *nda éndelé bia ye bi éfas éndelé é jombôʼô e mvuse *tabernakel. 13Bitun biyé bia ye bebe e bindelé ya *nda éndelé tañe ényiʼa wo e li a li mfaʼa ya nté; bia ye jombô e mekuʼu mebaé ya *tabernakel mfaʼa ya buti nye. 14Wo ye buti *nda éndelé a bikôbe beyôm mintômba nduban évele: Bikôbe mebañ bia ye bebe bikôbe beyôm mintômba yôp.

15Wo ye bo mebam asu tabernakel; wo ye bo me a asé a telé me tetele. 16Nté ya abam ese wo ye bo menyiʼi me mo awôm. 17Abam ese da ye bi ayemaʼa abaé wua nlatan a wu ôvok; wo ye bo avale da mfaʼa mebam mese ya *tabernakel. 18E mebam mete, asu *tabernakel, mewôm mebaé ma ye fombô mfaʼa ya Négéb, e nké. 19Wo ye bo mekôn me silba mewôm menyin, me tele mebam mewôm mebaé si; mekôn mebaé me tele abam da si mfaʼa ya ayemaʼa abaé ya été; a mekôn mebaé mevok me tele abam avoʼo si mfaʼa ya ayemaʼa ya été. 20Mfaʼa éfase baa ya *tabernakel, nalé a ne na akôé, mebam mewôm mebaé fe, 21a mekôn me silba mewôm menyine map, mekôn mebaé abam ese si. 22Wo ye bo mebam mesaman éfase *tabernakel ya mfaʼa jôb da dim. 23Wo ye bo mebam mebaé mekuʼu me *tabernakel mfaʼa ya mvus; 24Ma ye bo nlatan ataté si a nlatane vôme wua a élondo mfaʼa ya yôp: Nalé ate a ye boban mfaʼa mebam mebaé me tele mekuʼu mebaé. 25Mebam ma ye bo muam a mekôn me silba map: nalé a ne na mekôn awôm a mesaman, mebaé abam ese si. 26Wo ye bo betyengane bibaʼa a élé asé, betan asu mebam me tele akuʼu da ya *tabernakel, 27betyengane betan asu mebam me tele akuʼu avok ya *tabernakel, a betyengane betan asu mebam me ne éfase *tabernakel é ne mvus mfaʼa jôb da dim. 28Tyengane ya zañe mebam a ye téé akuʼu di a kui di avok. 29Wo ye yañe mebam a mvot; a bilondo ba ye somesane betyengane été, wo ye bo bie a mvot a yañe fe betyeñgane bebien a mvot.

30Eyoñ wo ye telé *tabernakel, wo ye tôñe éveʼela be nga liti wo nkôle yôp.

31Endelé é tyele e zañe *nda ja ye bo menyôle mela: Blum. Mfô a évele; éndelé te ja yiane fe bo ndomboo, ntiñan a mvosane minsinga, Bekerubim ba ye kômban a atyeñ, bese be too été. 32Wo ye futi je e mekoñ me asé menyine yôb me too ñyañan a mvot; mekôn mete ma ye bi akob mvot a ma ye bebe mekôn me silba yôp. 33Wo ye futi éndelé ya zañe *nda akobe si a mvuse éndelé te, nne ba ye bôôé éwolo é bili biôm ya élat valé. Endelé te nje ja ye kandé vôm a ne étyi a vôm a dañe étyi. 34Ba ye buti éwolo é ne étyi e vôm a dañe dañ étyi. 35Ba ye telé tebele vôm a ne étyi e *nda akôé a ébeʼe bifufub ja ye tebe é veʼane tebele, mfaʼa ya nké, a kooé na ô teléya tebele mfaʼa yʼakôé.

36Mfaʼa anyiin *nda éndelé é ne étyi, betiñe bindelé ba ye loé éndelé éfe a éfumulu kilisi é ne ngu, mbundan a nsinga ô ne blum, mfô a évele. 37Ba ye bo mekôn metan a asé, be mane yañe me a mvot; nne ba ye yemete éndelé été a mesen me mvot; wo ye lui metiñ me mvot metan asu mekôn mete.

Bible en langue Bulu

© LʼAlliance Biblique du Cameroun, 2007

More Info | Version Index