Search form

NKÔLAN 28

Mimfufube minjaé

(Lév 8:1-13; Sam 132:9,18)

1Boʼo na monyoñ Aron a subu ma bebé, bone bé be bo ma ésaé betuni; Aron a bone bé: Nadab, Abihu, Eléazar a Itamar. 2Wo ye loé monyoñ Aron mimbot mi ne étyi mfaʼa ya liti nkôñe wé a éjijine jé. 3Wo ye kobô ba bese be ne atyeñ mboone mam mbe me nga jalé a *nsisim ya fek, ba ye loé Aron biôm ya jaé, nalé a ye telébane étyi a bo ésaé *ntuni mfaʼa wom. 4Biôm ba ye loé mbie bi: Ebutaʼa tôé, éfôd, éziñgi, anen alôʼô e too ntiñan, ôzomezome ntôm a ases. Ba ye loé biôm bi ne étyi bite asu monyoñ Aron a bone bé, nalé ba ye bo ésaé betuni asu dam.

5Ba ye nyoñe mvot, nalé fe biyé bi ne nyôle blum, mfô a évele a nya ndombo ntiñan: Mboon ésaé ntyetyeñ; 6Ba ye loé a éfumulu nsinga é ne te téé tyiʼibi, mbundaʼan a blum, mfô a évele, minkoñ ya été mi too ntiñan a minsinga mi mvot. 7Ba ye jaé éfôd a biwoʼo bibaé, nloone minkoñ. 8Bekandé ya éfôd, nloon a minsinga mi ne avale da, ba ye fulane bo jôme jia a éfôd ébien. 9Eyoñe te ba ye nyoñe mekoʼo me ôniks mebaé a kpwele môé me bone be Yakob été; 10môé mesaman akoʼo ôsu, môé mevoʼo mesaman akoʼo baa aval ane mebialé mab me né. 11Mba *mekok nye a ye kpwele môé e mekoʼo mebaé aval ane môt a kpwele sitame wé émien; nye fe a ye yemete bie a biyemete bi mvot bibaé bi ne été. 12Ba ye tyelé mekoʼo mebaé e biwoʼo bi éfôd, mfaʼa ya simesane *meyoñ awôm a mebaé ya Israél; nalé Aron a ye jaé biyôlé biab e bitule bié éyoñ a ne asu éwolo élat, a ma, Nti, ma ye bo te vuane mia. 13Biyemete bibaé bia ye bo mboon a mvot 14a bone bengôkobe bebaé mboon a mvot a dañe *mfuban, mbe wo ye tiñ ane *mfuban, a wo ye tiñeti bone bengôkop be ne ntiñan a biyemete.

15Wo ye bo ébutaʼa tôé asu ntyiʼane mejô a bifumulu minsinga bi ne ntip, mbundaʼane a mi mi ne blum, mfô a évele, minkoñ mi too ntiñan a minsinga mi mvot avale fe e ne éfôd. 16Mfeʼe te wo ye bo mekuʼu mese avale da a mbaʼatan, nté ô too fandane anyu abaé, ndame fe avale te. 17Mfeʼe te wo ye bi abeñ minnoñ mekoʼo me ne édima minyin: Nnoñ ôsu ô bili me avale di: Sardôan, tôpaz, émerôd, akoʼo ese ya été e too da; 18Nnoñe baa ke avale di: Eskabukel, safir, diamañ, akoʼo ese ya été fe e too da; 19nnoñ lale: Ôpal, agat, amétist, akoʼo ese e too da. 20Nnoñ nyini: Krizôlit, ôniks, yaspe, akoʼo ese e too da; ba ye tiñeti mekoʼo mete a biyemete bi mvot biap. 21Ba ye kpwelé jôé éziñ ya bone be Yakob awôm a bebaé akoʼo ese ya été avale ba kpwelé *sitam môt émien; mekoʼo mete ma ye bobane nalé mfaʼa ya simesane *meyoñ awôm a mebaé ya Israél.

22Wo ye bo bone bengôkop be mvot a ne *mfuban ébutaʼa tôé yôp, be too ntiñan ane nko. 23Wo ye fe bo bilondo bi mvot bibaé ébutaʼa tôé, a wo ye futi bilondo bite bibaé e mekuʼu mebaé ya ébutaʼa tôé. 24Wo ye solé minkole mi mvot mite mibaé e bilondo bibaé bi ne mekuʼu ya ébutaʼa tôé; 25a wo ye solé mekuʼu mebaé ya minkole mibaé e biyemete bibaé bi ne e mebaʼa bitule ya éfôd mfaʼa ya ôsu. 26Wo ye beta bo bilondo bi mvot bibaé mbie wo ye futi e mekuʼu mebaé ya ébutaʼa tôé, nkoñ ya été ô too nlatan a éfôd. 27Wo ye kôme bilondo bi mvot bife mbie wo ye futi e mebaʼa bitule ya éfôd si mfaʼa ya ôsu, bebé a élataʼa, e kandé ya éfôde yôp. 28Ba ye yemete ébutaʼa tôé, a bilondo bi éfôde yôb, a nkol ô too blum: alé ébutaʼa tôé ja ye bo e kandé éfôde yôb a nalé ja ye bo te kandéban a éfôd. 29Eyoñ Aron a ye nyiin vôm a ne étyi, a ye beʼe biyôlé bi bôte ya Israél e nleme wé yôp, nkpwelan ébutaʼa tôé ya ntyiʼane mejô yôp: E ne jam ya simesan éyoñ ése asu Nti. 30Wo ye late urim a tumin ébutaʼa tôé ya ntyiʼane mejô yôp, a bia ye bo nleme Arone yôb éyoñ a ye nyiin asu Nti. Nalé Aron a ye jaé ntyiʼane mejô bôte ya Israél éyoñ ése asu Nti.

31Aron a ye jaé éfôd éziñgi yôp; éziñgi te ja ye bo ése évele.

32Tyiñ ya été ja ye tuban ézezañ, a ba ye tiñ *tyiñ mbômaʼan a mimbaʼa minsiñga, ane ba ye tuʼa yemete ézingi te a ane ja ye bo te ngul ya nyabé. 33Ba ye tiñe bibuma bi grenade mbômaʼan ézingi si; bibuma bite bi too blum, mfô a évele. Ezezañ ya bibuma bi, ja ye bi bone mebenge me mvot mbômaʼan; 34Akôlô ya ébuma ô kui mone abeñge, akôlô ya mone abeñge ô beta kui ébuma, nalé a ye bômane éfas ézingi ya si. 35Aron a ye jaé je éyoñ a bo ésaé jé; éduñ bone mebenge ja ye wôʼé éyoñ a nyiin vôm a ne étyi asu Nti, a éyoñ a kui atan, nalé a ye bo te wu.

36Wo ye bo ébaʼa a mvot ja dañe mfuban; wo ye kpwelé été yôb ane ba kpwelé sitame na: Etyi e be Nti. 37Wo ye tyelé ébaʼa te ôzomezome ntôme yôb éfas ya asu. 38Aron a yiane jaé ébaʼa te e mvom asu jé nalé ate a ye jaé bikobe bi nga boban asu biôme bi ne étyi, e bi bone Israél be nga ve a telé étyi; a yiane jaé je asu dé éyoñ ése nalé ate mimveane mite mia ye nyoñebane *mvoʼé e be Nti.

39Wo ye loé alôʼô a éfumulu nsinga é ne abeñ, avale te fe wo ye bo ôzomezome ntôm, a ases da ye bo ntiñan.

40Wo ye loé bone be Aron melôʼô, a bo fe be meses, nalé fe mintôm mfaʼa ya liti nkôñ wob a éjijine jap. 41Avale te nde wo ye jalé monyoñ Aron a bone bé, wo ye woʼo be mbon, a ve be ngu, a telé be étyi, a ba ye bo ma ésaé betuni. 42Wo ye loé be mekuba me ndombo mfaʼa ya solé soé ya menyôle map; mekuba mete ma ye taté angeteñ a kui mebé. 43Aron a bone bé ba ye jaé me éyoñ ba nyiin *nda éndelé ba bo bisulan nge na éyoñ ba subu bebé ataʼa metunaʼa a bo ésaé e vôm a ne étyi: Nde ba ye bo te wu amu nlitane soé wop. Atiñe di e ne di ya biyoñ bise mfaʼa Aron a mvoñ bôte jé.

Bible en langue Bulu

© LʼAlliance Biblique du Cameroun, 2007

More Info | Version Index