Search form

NKÔLAN 3

Ntut wo yôñ ve te dik

(Mm 7:30-34; Am 7:14-15; Dt 32:3)

1Melu mete Môze a baʼaleʼe mbam biyem ntyi wé Yétrô, *ntuni ya Madian, ane a nga ke a wulu afan a kui Hôréb, nkôle Zambe. a 2Ane *éngele Nti a nga yené e be nye e nkabaʼa nduan été, ézezañ ntut. A nga yen a kame na ntut ô yôñôk ve te dik. 3Nde Môze a nga jô na: Me tame ke e fefele *zen a subu bebé a yene e beta jame nyô na ntut wo bo te dik ve ô yôñôk. 4Eyoñ Nti a nga yen ane a subu, ane a nga loone nye ézezañ ntut a jô na: A Môze! A Môze! Môze na: Me nyô! 5Nti na: Te subu bebé va, vaʼa fe bikôndé e mebo môé, amu e vôm ô tele le a ne si ya étyi. 6Ane a nga jô na: Me ne e Zambe ésaa wôé, a nyô Abraham, Yizak a Yakob. Ane Môze a nga solé asu dé amu a nga ko woñ ya fombô Zambe. 7Ane Nti a nga jô na: Me yeneya foʼo e beta njuk ayoñ dam da tôbane de Ejipte me wôʼôya fe ñyône wob amu ba ba tibili be a amu ma yem njuʼu wop. 8A me siseya na me kôté be e mo me bôte ya Ejipte a vaa be si éte, a kee be si é ne mvaé a anen, e si menyañ a wôé bia len, e si Beamorééñ, Beférézieñ, Behévieñ a Beyébuzieñ. 9Ô lôô ñyôn bôte ya Israél ô kuiya e be ma, a naa me yeneya étibelaʼa bôte ya Ejipte ba tibili be. 10Ajô te éyoñ ji zaʼak me lôme wo e be Faraoñ ô bo ayoñ Israél dam na e kôlô Ejipte. 11Ane Môze a nga jô Zambe na: Me ne za ane me ne ke e be Faraoñ a vaa Israél Ejipte? 12Ane Zambe a nga jô nye na: Bia wo bia ye bo nsamba a e ndeme jam e mfaʼa wôé nje nyôna na éyoñ ô boya ayoñ dam e kôlô Ejipte, mia ye kañe ma e nkôle wu yôp. 13Ane Môze a nga jô Zambe na: Ô lôô ma ye ke e be bôte ya Israél a jô be na e Zamba bʼésaa benan a lômeya ma e be mia. Ba ye sili me na: E jôé dé é ne za? Ma ye yalane be aya? 14Ane Zambe a nga yalane nye na: Me ne e nyô me né. A nga jô fe na: Avale di nde wo ye jô Israél na: E Nyô me né a lômeya ma e be mia. 15Zambe a nga beta fe jô Môze na: Avale di wo ye jô Israél na: Nti, e Zambe bʼésaa benan, e ZambʼAbraham, Yizak a Yakob a lômeya ma e be mia: E jôé dam nde le a kui e nnôm éto, a jôé dame éte nde ba ye loone ma a kui miaé mi bôt mise. 16Kelek a sulane bemvendé ya Israél a jô be na: Nti, e Zamba bʼésaa benan, e ZambʼAbraham, Yizak a Yakob a nga yené e be ma a jô na: Me zuya foʼo jome mia a yene e jam bôte ya Ejipte ba bo mia. 17A me jôya na: Ma ye bo mia mi kôlô Ejipte e vôm mi too e minjuʼu été, a kee mia e si Bekananééñ, Behétieñ, Beamorééñ, Beférézieñ a Beyébuzieñ, e si menyañ a wôé bia len. 18Ba ye vôʼôlô e tyiñe jôé a wo ye ke a bemvendé ya Israél e be njô bôte ya Ejipte, a mia ye jô nye na: Nti, Zamba Beébre a nga yené e be bia: ajô te éyoñe ji bia yeʼelane wo na ô suu bia bi ke e dulu afan été nté dulu melu mela, wôna bia ye tyiʼi Nti e Zambe wongan mimvean ba diʼi e nduan. 19Ma yeme na njô bôte ya Ejipte a ye bo te suu mia toʼo na wo ô ne ngul ô ne. 20Ma ye same e wo wom a bôm Ejipte a bitua bi mam ma ye bo ézezañ jé. Eyoñe te a ye suʼulane suu mia mi ke. 21Ma ye bo na ayoñ dam e yene *mvam e be bôte ya Ejipte; éyoñ mia ke mia ye bo te kee mo zesé. 22Minga ase a ye sili nyô a ne nye bebé a nyô a too e *nda jé biôm bi ne mboon a silba a bi bi ne mboon a mvot, nalé fe mengômesan mme mia ye jalé bobefam a bobebinga benan, a mia ye nyoñe biôm bite e be bôte ya Ejipte.

Bible en langue Bulu

© LʼAlliance Biblique du Cameroun, 2007

More Info | Version Index