Search form

NKÔLAN 30

Ataʼa metunaʼa ya mimbon mi ne mbamba menyum

(Nk 37:25-28; Nli 8:3-4)

1Wo ye lôñe atak asu mimbon mi ne mbamba menyum, wo ye lôñe de a asé; 2nté wo ye bo anyiʼi wo da a ndame jé anyiʼi wo da: Nalé a ne na minté mise mia ye bo abime da; ve nkôñ ya yôb ñwô wo ye bo menyiʼi me mo mebaé. Ataʼa te a minlaʼa mié bia ye bo jôme jia. 3Wo ye yañe de a mvot ja dañe *mfuban, ataté mfaʼa ya yôp, e mefefele ya été mbômaʼane a kui minlaʼa ya été, wo ye fe bo nkôngô mvot mbômaʼane. 4E nkôngô mvot si, wo ye bo bilondo bibaé e mekuʼu mebaé. Wo ye bo bie li a li mfaʼa ya some mimbôñ ya beʼe ataʼa metunaʼa. 5Wo ye bo mimbôñ a asé a yañe mie a mvot. 6Wo ye telé de ôsu ya éndelé ja solé éwolo élat: Vôm ate ma ye bo me tôbaʼane wo. 7Tyé ése, Aron a ye diʼi mbon ô ne mbamba menyum été yôb éyoñ a kôme belambe. 8Aron a ye fe diʼi mbon ô ne mbamba menyum e zañe ngôʼé ébaé éyoñ a ye kôme belambe. Mbon ô ne mbamba menyume te wo ye yôñ éyoñ ése asu Nti e miaé mienan mise. 9Mia ye bo te ve mimbon mife mia nyum nge mvean ba diʼi ngumba ataʼa metunaʼa yôp, nge mvean ôfe, a mia ye bo te miame jôm éziñ ataʼa metunaʼa yôp. 10Aron a ye tune ataʼa metunaʼa éyoñe jia mbu; a ye tune de a miame metyi me tit é nga veban amu njamane mam *abé e minlaʼa yʼété yôp, nalé a ye boban mfefé mbu ôse ataté miaé wu a kui wu ôvok, amu ataʼa te e nga vebane be ma a ba ye semé de ane jôm ja dañe étyi asu Nti.

Abendé ya élañe bôt

(Nk 38:25-28; 2 Mink 24:5-14; 1 Pi 1:18-19)

11Ane Nti a nga kobô Môze a jô nye na: 12Eyoñ wo ye lañe bôte ya Israél, môt ase ya été a ye yaʼane ma *toya mfaʼa ya kamane ényiñe jé ane ébubua éziñ ja ye bo te kui be mia éyoñ ya élañe bôt. 13E fame ése ja yiane lañeban ja ye ve nsañ moné ô ne adit étune sikel, be tôñe e sikel ba belane je e *nda é ne étyi été, nye a ne begéra mewôm mebaé; étune sikel ja ye nyoñeban mfaʼa Nti. 14E môt ase a ye lañeban ataté mimbu mewôm mebaé a ke ôsu, a ye ve mvean wo nyoñeban asu Nti. 15Nkukum wo ye bo te yaʼan a lôte abime da yian, a tañe *nzôzoé ja ye bo te sise si ya abime da yian, e ne na étun sikel e mfaʼa tañ ja nyoñeban asu Nti: nalé ba ye kamane ényiñe jap. 16Tañe moné ése bôte ya Israél ba ye ve mfaʼa ya kamane ényiñe jap, wo ye belane je asu *nda éndelé bisulan. Da ye bo jam ya simesan e be bôte ya Israél mfaʼa ya kamane binyiñe biab asu Nti.

Fandé mewoban asu ntuneban

(Nk 38:8; Sam 26:6; 1 Tim 2:8; Hé 10:22)

17Ane Nti a nga kobô Môze a jô na: 18Wo ye kôme fandé mvot asu mewobane ya ntunan; wo ye telé nye e zañe *nda bisulan a ataʼa metunaʼa a wo ye futi mendim été. 19Aron a bone bé ba ye belane mendim mete mfaʼa ya sôbe mo mab a mebo map. 20Eyoñe ba ye nyiin *nda éndelé ya bisulan, ba ye woban mendim mete, nalé ba ye bo te wu; avale te fe éyoñ ba ye subu bebé ataʼa metunaʼa na be bo ésaé a diʼi mimvean mia diʼibane nduan asu Nti, 21Ba ye sôbe mo a mebo map; nalé ba ye bo te wu. Mvinda nyô ja ye bo nyô ya nnôm éto mfaʼa Aron a mvoñe bôte jé a miaé mise.

Mbon ô ne étyi a ôlobinda

(Nk 37:29; 40:9-16)

22Ane Nti a nga kobô Môze a jô na: 23Nyoñe bityitaʼa bia dañe abeñ; nkone mir besikel mintet mitan, nkone sinamôm besikel mintet mibaé a mewôm metan, nkaé ô ne mbamba menyum besikel mintet mibaé a mewôm mebaé; 24mvut ya élé ba loone na kas, besikel mintet mitan, avale ane ôveʼe ba belan wô e *nda ya étyi ô né, ô laté a lita mbon ôlive ésaman. 25Môt a yeme kôme beôlobinda a ye mane bundan biôm bite bise a kôme mbon ô ne étyi ba ye belane wô mfaʼa ya telé bôt e bito.

26Wo ye woʼo mbon ôte *nda éndelé bisulan a éwolo élat, 27Tebele a biôm mebelan bié bise, ébi bifufub a biôm mebelan bié bise, ataʼa metunaʼa beôlobinda, 28ataʼa mimvean mi ne ngumba a biôm mebelane bié, fandé a jôm a tele été. 29Wo ye telé biôm bite étyi a bia ye dañ étyi; jôm ése ja ye bie nambe, ja ye teléban étyi. 30Wo ye woʼo Aron a bobefame bé mbon; wo ye telé be étyi be bo ma ésaé betuni.

31Wo ye kobô bôt ya Israél na: Mbone wu ô ne wu ya étyi ba woʼo bôt e miaé mienan mise. 32Ba ye bo te woʼo wô nyôl môt éziñ, a mia ye bo te kôme ôfe ô too avale te; ô ne étyi a mia ye baʼale wô étyi nalé. 33Môt ase a ye kôme ôfe avale te, nge woʼo wô nneñ, a ye tyiʼiban zañe ya bôte bé.

34Ane Nti a nga kobô Môze na: Nyoñe bityitaʼa bi: Nataf, ôniks, galbanum, bityitaʼa a ôtu ô ne ékekeb mengab abime da. 35Wo ye nyoñe biôm bite a kôme ôlobinda ya diʼi, nkôman avale nkôme beôlobinda a ne kôm; ôlobinda ate a ye bi nku a too fe *mfuban a étyi. 36Ngabe jia ja ye kômban ndub é too ôkekep, ba ye belane je *nda éndelé bisulan, ôsu ya éwolo é ne étyi, vôm ma ye telé na bia wo bi tôban. Mia ye semé étyi ya nkômane jôme wu. 37Ba ye bo te kôme avale ôlobinda te mfaʼa mebelane menan. Ve mia ye telé nye étyi asu dam. 38Môt a ye bo mfe a funaʼan nye ényum, a ye tyiʼiban e zañe bôte bé.

Bible en langue Bulu

© LʼAlliance Biblique du Cameroun, 2007

More Info | Version Index