Search form

NKÔLAN 31

Ntelan bebo bisaé

(Nk 35:30; 36:3; Ef 4:11-12; 1 Ko 12:7)

1Ane Nti a nga kobô Môze a jô nye na: 2Ô lôô, me nga loone Besalél mona Uri, mona Ur ya *nda bôte Yuda a jôé dé. 3Me nga jalé nye a nsisime Zambe, wu ya fek, wu ya atyeñ a ñyemane mam ya yeme bo bisaé bi atyeñ mevale mese, 4mfaʼa ya bôndé mefek ya bo bisaé bia sili atyeñ, mfaʼa ya saé mvot, silba a bidima *mekok, 5mfaʼa ya kpwelé *mekok a bilé a bo mevale bisaé mese. 6Me nga ve nye Ohôliab, mona Ahisamak ya *nda bôte Dan, a bo mvolô wé. Me maneya futi fek e minlem mi bôt be ne atyeñ na, be bo ésaé ése me maneya liti wo. 7Nda éndelé bisulan, éwolo élat, ébutaʼa ya éwolo a biôm bise bi ne je yôb a biôme mebelan bise ya *nda éndelé: 8Tebele a biôm mebelane bié, ébi bifufup é ne mboon a mvot é ne *mfuban a biôm mebelan bié bise, ataʼa metunaʼa beôlobinda, 9ataʼa mimvean mi ne ngumba, fandé a jôm a bete yôp; 10minjaé mi ne ngumba aval, minjaé mi ne étyi asu Aron, minjaé asu *bon ba bo ésaé vôm a ne étyi; 11mbon ba woʼo bôt ba telé, a ôlobinda a ne menyum mfaʼa ya kôme vôm a ne étyi.

Sabat

(Nk 20:8-11; Met 2:1-3; Yer 17:21-27)

12Ane Nti a nga kobô Môze a jô nye na: 13Wo, kobôʼô bôte ya Israél a jô be na: E ne foʼo na, mia ye baʼale besabat bam amu da ye bo ndem e zañe jenan a ma, e miaé mienan mise, nalé bôt ba ye yeme na me ne Nti, nyô a telé mia étyi. 14Mia ye baʼale *sabat, amu a ye bo étyi mfaʼa wônan. Môt ase a ye ndaman étyi jé nye a ye wôéban; môt ase a ye bo ésaé éziñ *môs ôte, a ye tyiʼiban e zañe bôte bé. 15Esaé ja ye boban tañe môse misaman; ve môse zamgbwale ô ne *sabat, *môs abôk, ntelan étyi mfaʼa Nti. Môt ase a ye bo ésaé éziñ môse *sabat a ye wôéban. 16Bôte ya Israél ba ye baʼale sabat; miaé mise mia ye jeme abôʼô *sabat ane élat ya nnôm éto. 17Jam di da ye bo ndem ja ye tabe nnôm éto e zañe jam a bôte ya Israél; amu Nti a nga té yôb a si môse misaman, ve môse zamgbwale ñwô a nga telé ésaé jé a woʼon.

Mekoʼo metiñ

(Dt 9:9-11; Nk 34:1-4,28)

18Eyoñe Nti a nga mane kobô Môze e nkôle Sinayi ane a nga kalane nye bifase mekoʼo bibaé, bifase *mekok ntilan a ônyu Zambe ôbien.

Bible en langue Bulu

© LʼAlliance Biblique du Cameroun, 2007

More Info | Version Index