Search form

NKÔLAN 32

Eveʼela nyak mboon a mvot

(Sam 106:19-22; 1Bb 12:26-33; Dt 9:15-17; 9:20-21; Nb 25)

1Eyoñe bôt be yeneya na Môze a boya te jiʼa bulan e nkôle si, ane be nga sulane vôm Aron a nga too a jô nye na: Kôlôʼô si a bo bia bezambe ba ye wulu ôsu viangan, amu Môze, nyô a nga bo na bi bet a kôlô Ejipte; bi nji yem jam e kuiya be nye. 2Nde Aron a nga jô be na: Vaʼane bimvônga bi mvot bi ne binga benan melo, a bobefam benan a bobebinga benan, a zuane ma bie. 3Ane bôte bese be nga vaa bimvônga bi mvot bi nga too be melo a zu ve bie Aron. 4Ane a nga nyoñe mvot mo map, a nga nyemé nye nduan a kôme mone nyak. Nde be nga jô na: A Israél! Tame yene bezambe be nga soo bia Ejipte. 5Eyoñ Aron a nga yene jame di ane a nga lôñe ataʼa metunaʼa ôsu vié a yôtane na: A akiti, abôk da ye bo mfaʼa duma Nti. 6Tyé kpwaa, be nga kôlô si ndibe ntyé, a ve mimvean mi ne mingumba, a liti mimvean ya nlatane ngbwa. Ane bôt be nga tabe si a di a nyu; ane be nga kôlô si a bo mevak.

7Ane Nti a nga jô Môze na: Boʼo avôle ya sis, amu bôt ô nga soo be Ejipte be boya nsem.

8Be jiʼaya liʼi *zen me nga liti be; be boya bebien mone nyak a mvot é ne nyeman, be kuteya meboñ si ôsu vié, a be veya mimvean, a be jôya na: A Israél! Tame yen bezambe be nga soo wo Ejipte. 9Nde Nti a nga jô Môze na: Me lôô na bôte ba be ne bôt be ne melo abui. 10Eyoñ ji jôkéʼé ma! Ayaa dam da ye yôñe be be, a ma zu mane jiane be; ve ma ye bo wo beta ayoñe bôt.

11Ane Môze a nga yeʼelane Nti, Zambe wé, a jô na: Amu jé ayaa dôé, a Nti, da ye yôñe nyôle bôte bôé, mbe ô nga soo be Ejipte a beta ngul ése, a wo ô ne éwôlô? 12Amu bôte ya Ejipte ba ye jô na, a nga vaa be na be tôbane bidim, na a mane wôé be e minkô, a mane jiane be *si nyô? Bulaʼan mvus mfaʼa ya ayaa dôé, jôbaʼan bidim ya bôte bôé! 13Simesaʼan Abraham, Izak a Israél, bebo bisaé bôé, mbe ô nga kane ngana be womiene na, ma ye fôle mvoñe jenan ane ateté ya yôp, ma ye ve mvoñ jenan si nje me nga kobô na, ja ye bo énjab nnôm éto. 14Nde Nti a nga jôban bidim a nga kobô na a ye bibi bôte bé.

15Ane Môze a nga bulane nkôle si a bili bifase mekoʼo mo, bi too ntilan mekuʼu mebaane li a li. 16Bifase mekoʼo bite bi mbe ésaé Zambe, a ntilan ô mbe fe wu Zambe nkpwelan. 17Yasua a nga wôʼô *tyiñ bôt be mbe be yôtaʼan, nde a nga jô Môze na: Ma wôʼô zôʼé bita e minkan. 18Môze na: A nji bo zôʼé jia ya ndañan nge nyô ya ñwuane ébôm: Ma wôʼô ve jia. 19Eyoñ be nga kui minkan, nde be nga yene mone nyak a *mebôk. Ane ayaa Môze e nga yôñ; nde a nga wua mekoʼo a nga bili si a bôé me nkôle si. 20Ane a nga nyoñ mone nyak be nga bo, a diʼi nye nduan, ndub ya été, a nga miam je mendim a nyuu me bôt ya Israél.

21Ane Môze a nga jô Aron na: Bôte ba be boya wo jé ane wo titi be abime adite mbeʼe *abé dina bitu? 22Ane Aron a nga yalane na: Ayaa Nti wom e boʼo te yôñ! Womien wo yem bôte ba, asimesane dap e luu kom ése ve mboon *abé. 23Ba te jô me na: Boʼo bia bezambe ba wulu bia; amu Môze, môt a nga soo bia Ejipte, bi nji fe yem jam e kuiya be nye. 24Nde ma te jô be na bôt be bili mvot be ve ma je! Nde ba te ve ma je; ane ma te wua je nduan, ateme na mone nyak nye a nga vame nduan été.

25Môze a nga yene na bôt be nyiineya nzametan été, a Aron a nga jôʼé be nzametane été a kui na, be ntoo zesé biôm e mise besiñe bap. 26Ane Môze a nga tebe *mbé minkan a jô na: Ba bese be ne ngame Nti be zaʼa be ma! Ane mvôʼô Lévi bese be nga sulan fefele jé. 27Ane a nga jô be na: Avale di nde Nti, Zambe ya Israél a jô na: Môt ase ya be mia a nyoñe nkpwaté mekôn, éyoñe te mia ye wulu minkan mise ataté *mbé wu a kui wu ôvok, môt ase a wôék monyañ, mvôé jé, évuvumane jé. 28Ane mvôʼô Lévi be nga bo ane Môze a nga bendé be; *môs ôte bôt be nga wu bebé bôt toyini éla. 29Ane Môze a nga jô na, vaʼane miabebiene den be Nti, môt ase, toʼo a ve monafam wé nge monyañe wé, nalé a ye botane mia den.

Meyeʼelan me Môze

(Sam 99:68; Dt 9:18-20; 25:29; Jc 5:16)

30Tyé kpwaa, Môze a nga jô bôte na: Mi boya beta nsem. Eyoñ ji ma zu bet be Nti, éyoñ éziñ ma zu bo na Zambe *a jamé minsem mienan. 31Môze a nga bulan be Nti a jô na: Bôte ba be boya nsem ô ne anen, be boya bebien bezambe be mvot. 32Ajô te jaméʼé be nsem wob éyoñe ji! Nge nalé momo, ma yeʼelan wo, tyame jôé dam e kalate ô maneya tili. 33Ane Nti a nga jô Môze na: Nyô a bo nsem wo wosane ma nye ma ye vaa jôé kalate wom. 34Kele éyoñ ji a wulu bôt a kui be vôm me nga jô wo nye, si ya ntiñetan. O lôô éngele wom a ye wulu ôsu viôé. Ve *môs ya ayaa dam, ma ye yaa be amu nsem wop. 35Ane Nti a nga bibi bôt, amu be nga bo mone nyak nye Aron a nga kôm.

Bible en langue Bulu

© LʼAlliance Biblique du Cameroun, 2007

More Info | Version Index