Search form

NKÔLAN 34

1Ane Nti a nga jô Môze na: Baa bifas mekoʼo bibaé bi too ane bi ya ôsu: Wôna ma ye tili mejô me mbe bifas ô nga bôé e mimfefé bifas bite yôp. 2Tabeʼe nkôman ndip tyé; éyoñ tyé ja lendé, wo ye bete nkôle Sinayi; wo ye tebʼôsu viam, abôbône nkô. 3Mia môte mfe te betan a môte mfe a boʼo te yené nkôle ôse; nalé fe na toʼo mone mbam nge beta mbam biyem éziñ, a boʼo te di mefôla ya nkôle te.

4Ane Môze a nga ba bifas *mekok ane bi ya ôsu. Môze a nga kôlô si ndib tyé a bete nkôle Sinayi avale Nti a nga bendé nye, ane a nga nyoñe bifase mekoʼo bibaé mo mé.

5Nti ve sise nsum *nkut été, a tebe fefele jé a yôtan jôé Nti. 6Nti ve lôte ôsu vié a kele a yôtane na: Nti! Nti! Zambe a ko éngôngo a liti *mvam, te jiʼa yaa, njalan a mboone mvaé a nyeʼan. 7Nyô a baʼale mboone mvaé wé a kui miaé mi bôt toyini, nyô *a jamé ékop, étom nge nsem, ve a ne jôʼé ve môt ane mekua *melep, a a ve *bon, bendaé a awuabañ *melep amu bikobe bʼésaa!

8Ane Môze a nga vitibi a kute meboñ si. 9Ane a nga jô na: A Nti, me yeneya *mvam be wo, ajô te Nti a wuluʼu ézezañe jangan, amu bi ne bôt be ne *tyiñ ñyemelan; wo ye jamé ékop jangan a nseme wongan, a wo ye nyoñe bia ane ngabe jôé.

Elat a étyi

(Nk 33:12-17; 13:1-16; 2 Ko 3:7-18)

10Nde Nti a nga jô na: O lôô mamien ma bo élat. Ma ye bo bitua bi mam bôte bôé bese be too, avale bitua bi mame te e ngenan te boban *si nyô nge meyoñe mese été; bôte bese ô too été ba ye yene mboone Nti, mboon ya ko woñ bia wo bia ye bo.

11Baʼaleʼe mam mese me maneya bendé wo môse wu. Ma ye titane Be Amoréen, Bekananééñ, Behétieñ, Beférézieñ, Behévieñ a Beyébuzieñ ôsu viôé. 12Tabeʼe ntyel ya bo élat a bôte be too si wo ye nyiin amu nalé a za bo wo mbia ôlam. 13Ve mia ye tyam metaʼa metunaʼa map, a bôé mekôn mekôô mab bitun bibaé a mekôn me Akéra map.

14Wo ye bo te kute meboñ si asu Zambe mfe. Amu Nye a bili jôé na Abane, a ne Zambe a ne *aban.

15Te veʼele bo élat a bôte ya si wo ke amu be za loone wo ô nyoñe ngab bisulane biab ba kañe bengunemelan a di biôm ba tyik asu bengunemelan bete. 16Nalé fe na ô za nyoñe bengone bap asu bobefame bôé, a éyoñe bengone bete ba ye bo *mejian a bezambe bete, ba ye fe dutu bobefam benan na be bo fe *mejian a be.

17Te kômane bezambe a bizan be nga nyemé nduan.

18Wo ye tuʼa baʼale abôʼô belet é ne te mvusan, tañe melu zamgbwa, ane e ne ntelan ngon fôn ja kui mebame na wo ye bo te di belet é ne te mvusan, avale me nga bendé wo, amu ngon fôn ja kui mebam nje ô nga kôlô Ejipte.

19Ntôle ôse ô ne éñwom, avale fe ane nnôme éyem ase a taté bialé mimbam miôé, mone nyak a mone ntômba. 20Wo ye kôté mone éjakas a taté bialé a mone ntômba; nge wo bo te kôté nye wo ye buʼu nye tyiñ; wo ye fe kôté ntôle ya bobefame bôé; a môte éziñ a ye bo te tebe asu dam mo minsoé.

21Wo ye saé môse misaman a semé *sabat e môse zamgbwale; wo ye semé *sabat toʼo éyoñ ya mbéan nge mvaane bidi mefup.

22Wo ye jeme abôʼô besondô be mbômô ya fôn, nalé fe abôʼô nkôane bidi amane mbu. 23Mbu ôse biyoñ bilaa, befam bôé bese ba ye yene asu Nti, Zambe Israél. 24Ma ye titane *meyoñ ôsu viôé a nene minné miôé; môt éziñ a ye bo te nyamete si jôé éyoñ wo bet a tebe asu Nti, Zambe wôé, mbu ôse biyoñ bilaa.

25Wo ye bo te kuli metyi ya tit wo tyiʼi ma a belet é ne mvusan; a mvean ba tyiʼi abôʼô Pak wo ye bo te lendane tyé.

26Wo ye zu ve *bembômô bibuma bi ôsu ya si jôé e *nda Nti, Zambe wôé. Wo ye bo te yame ékela e menyañ me nyia été.

27Nti a nga jô Môze na: Tiliʼi mejô mete; amu ma bo élat zañe jam, a énjôé a Israél avalʼane mejô mete ma jô amu mme me ne tin ya élat ma bo zañe bia wo a Israél. 28Nalé Môze a nga tabe valé tañe melu mewôm menyin a môse mewôm menyin baa Nti. A nji di belet nge nyu mendim. Ane Nti a nga tili awôm bifia ya élat e bifase mekoʼo yôp.

29Ane Môze a nga so nkôle Sinayi: A bili bifase mekoʼo bibaé ya metiñ ya élat mo, éyoñ a nga sis, a nji yeme na ékôp ya asu dé é nga faé amu nlaan a nga laane Nti, 30éyoñ Aron a Israél ase be nga fombô Môze be nga yene ékôp ya asu dé é faék; ane be nga ko woñ ya subu nye bebé. 31Nde Môze a nga loone be; ane Aron a bivet bise ya nsamba be nga zu be nye nde ba be Môze be nga laan. 32Eyoñ minlañ miab mi maneya, ane Israél ase a nga subu nye bebé, nde a nga kalane be mebendé mese Nti a nga ve nye nkôle Sinayi. 33Eyoñ Môze a nga mane kobô be ane a nga solé mvom asu jé a éyañese. 34Eyoñ a mbe a nyiʼin asu Nti na a kobô nye, a mbe a vaʼa éyañese akekui éyoñ a kui atan. Eyoñ a kuiya, a mbe a kateʼe bone bʼIsraél mebendé a te nyoñ. 35Israél a nga fombô asu Môze a yene na ékôp ya asu dé é mbe é faék; ajô te Môze a nga bo a betaʼa jaé éyañese akekui éyoñ a bulane ke kobô Nti.

Bible en langue Bulu

© LʼAlliance Biblique du Cameroun, 2007

More Info | Version Index