Search form

NKÔLAN 36

1Ane Betsalél, Ohôlôap a mintyetyeñ mi bôt mise Nti a nga mane ve fek a atyeñ ya kôme biôm asu nkañan a vôm ane étyi be nga taté na ba bo ésaé avalʼése Nti a nga bendé.

2Ane Môze a nga loone Betsalél, Ohôliab a mintyetyeñ mise Nti a nga mane futi atyeñ minlem, ba bese be nga bili nkômban ya ve minlem miab e mboon ésaé. 3Ane be nga nyoñe mimvean mise Israél a nga soo mie mo me Môze asu ésaé ya vôm ya nkañan a ne étyi. Tyé ése be nga zu ve Môze mimvean ane *nlem wo kômbô. 4Ane mintyetyeñ mise mi mbe mi boʼo ésaé ya vôm ane étyi mi nga kôlô, môt ase ésaé jé, 5a jô Môze na: Bôt ba soo biôm abui a lôte abime da siliban asu ésaé Nti a nga bendé. 6Ane Môze a nga ve *tyiñ minkan mise na: Môt éziñ, too fam nge minga, a boʼo te beta saé asu mimvean ya vôm a ne étyi. Nde be nga telé bôt be bo te beta soo mimvean. 7Biôm bise be nga kômesan bi mbe abim da yian a beté ôdoʼé mfaʼa ya bisaé bise bi nga yiane boban.

Nlôñan tabernakel

(Nk 26:1-30; Ef 2:20-22)

8Ane mintyetyeñ mi bôt mise mi mbe na mia bo ésaé, mi nga lôñe *tabernakel a besandé bindélé awôm be too nya ndomboo a ne ntiñan, be nga belan biyé bi ne blum, mfô a évele, besérafeñ be too ntiñan été. 9Nté ya sandé ase ô too menyiʼi me mo mewôm mebaé a muam, a ndam é too menyiʼi me mo menyin; besandé bese be mbe nté a ndam avale da. 10Ane be nga late betan ya été wua a nyô mbok. 11Ane be nga bo mekôta nkoñ ya sandé a suʼulan nlatan besandé ôsu, avale te fe be nga bo nkoñ ya sandé a suʼulan nlatan be sandé baa. 12Be nga bo mekôta mewôm metan e sandé ôsu, a bo fe mefe mewôm metan nkoñ ya sandé a suʼulan nlatan be sandé baa. Mekôta mete me mbe me tôbaʼan mana a ma mevok. 13Ane be nga bo akob mvot mewôm metan, a tiñeti besandé nyôna a nyô mbok akob ete: Nde *tabernakel a nga boban jôm jia.

14Ane be nga loé besandé mimvot bikela be bo *nda éndélé e *tabernakel yôp; avale besandé te be nga loé be awôm a wua. 15Nté sandé ase ô too menyiʼi me mo mewôm mela, ndam ke menyiʼi me mo menyin; besandé bese be mbe nté a ndam avale da. 16Be nga late besandé betan ya été jôm jia, a late ba bevoʼo besaman jôm jia. 17Be nga bo mekôta mewôm metan nkoñ ya sandé a suʼulan nlatan ôsu, a bo fe mefe mewôm metan e nkoñ ya sandé a suʼulan nlatan besandé baa. 18Ane be nga bo akobe mvot mewôm metan, mfaʼa ya late *nda éndélé na é bo jôm jia. 19Be nga dib *nda éndélé a bikôb beyôm mintômba nduban évele, a buti fe andil a bikôbe betit bia dañe afip.

20Be nga bo mebam asu tabernakel; mebam mete me mbe mboon a asé, me tele tetele. 21Nté ya abam ese ô mbe menyiʼi me mo awôm; ndam ke anyiʼi wo da a étun. 22Abam ese é nga bili ayemaʼa abaé, wua bebé a wu ôvok; mebam mese ya *tabernakel me mbe nalé. 23Be nga bo mebam mewôm mebaé mfaʼa ya nké. 24Be nga bo fe metin me silba mewôm menyin e mebam mewôm mebaé si abam ese metine mebaé asu ayemaʼa abaé dé. 25Be nga bo fe mebam mewôm mebaé asu éfase baa ya *tabernakel, éfase ya akôé, 26nalé fe metin me silba mewôm menyin map, abam ese metin mebaé. 27Be nga bo mebam mesaman éfase jôb da dim. 28Abuʼu *tabernakel ese e nga bili mebam mebaé; 29me too mbaʼatan a taté si a élondo jia é late me nya nlatane mfaʼa ya yôp, be nga bo nalé mebam mebaé mese e mekuʼu mebaé. 30Mebam mese me mbe muam, a metin me silba map, nalé ane na metin awôm a mesaman, abam ese metin mebaé. 31Be nga bo betyengane betan a élé asé asu éfase jia ya *tabernakel, 32a betyengane betan asu mebam ya éfase baa ya *tabernakel, a betyengane befe betan asu mebam ya éfase *tabernakel ya mvus mfaʼa jôb da dim; 33ane be nga bo fe tyengane ya zañe *tabernakel a taté nté wua mebam ya akuʼu di akui di avok. 34Be nga yañe mebam a mvot, be bo fe bilondo biab a mvot mfaʼa ya some be tyengane, betyengane bete be too fe nyañan a mvot.

35Be nga kôm éyé ja kandé *tabernakel nyôle blum, mfô, évele a nya ndomboo ntiñan abeñ. 36Be nga bo mekôn me asé menyin asu éyé te be mane fe yañe me a mvot, be futi fe akobe mvot été, be mane nyemé metin me silba e mekôn mete si. 37Be nga tyelé éyé é too blum, mfô, évele a nyaa ndomboo ntiñan anyiine *mbé ya *nda éndélé; é mbe éyé é ne ve ntiñan. 38Be nga kôme mekôn metan ya éndélé te a akob dap, be yañe fe soʼo mekôn a mendé ya été a mvot ve metin metan bap me mbe mboon a mvot.

Bible en langue Bulu

© LʼAlliance Biblique du Cameroun, 2007

More Info | Version Index