Search form

NKÔLAN 37

Nkôman éwolo, tebele a ébi bifufup

(Nk 25:10-40; Hé 9:3-5; Nb 10:33-36; Lv 24:5-9; Nl 11:12-20; 4:5)

1Ane Betsalél a nga kôme éwolo a asé, nté ô too menyiʼi me mo mebaé a étun, ndam ke anyiʼi wo da a étun. 2Ane a nga yañe je atan a été a mvot a ne mfuban; nde fe a nga bo nkôngô mvot mbômaʼane mekuʼu mese. 3Nde a nga nyemé bilondo binyin ya futi mekuʼu menyin ya été, éfase ése bilondo bibaé. 4Ane a nga bo mimbôñ mi asé a yañ mie mvot. 5Ane a nga some mimbôñ mite e bilondo e mekuʼu ya éwolo mfaʼa ya beʼe je. 6Ane a nga bo ébutaʼa éwolo a mvot a dañe mfuban; ébutaʼa te é too nté menyiʼi me mo mebaé a étun a ndam anyiʼi wo da a étun. 7Ane a nga bo besérafeñ bebaé a mvot e mekuʼu mebaé ya ébutaʼa; a nga bo be a mvot ane mbiban; 8Sérafeñ wua éfase ji a nyô mbok, éfase évok; a nga bo besérafeñ nlatan a mekuʼu mebaé ya ébutaʼa. 9Besérafeñ be same mefabe mabe yôp, be butiʼi ébutaʼa a mefabe mete be lôane fe mesu. Mesu Besérafeñ me mbe me lôô ébutaʼa.

10A nga kôme tebele a asé; nté ô too menyiʼi me mo mebaé, ndam anyiʼi wo da a nkôñe yôp anyiʼi wo da a étun. 11A nga yañe je a mvot a dañe *mfuban a bo fe nkôngô mvot mbômaʼane. 12A nga bo filim mbômaʼane été a bo fe nkôngô été a mvot mbômaʼane filim. 13Ane a nga nyemé bilondo bi mvot binyin asu tebele a futi bie mekuʼu menyin ma tôban a mebo menyin. 14Bilondo bi mbe bebé filim, mimbôñ mi tulaʼan été mfaʼa mbeʼan tebele. 15A nga kôme mimbôñ mite a asé a mane fe yañe mie mvot; mi nga volô mbeʼan tebele. 16Ane a nga kôme biôm ya belan bie tebele: Bisua, bilaé mevale mebaé a mekob minlak asu nsôban mo a mebo: Biôm bite bi nga boban a mvot.

17A nga bo ébi bifufub a mvot ane *mfuban a too mbiban; abo, nkuk, bilaé, bibuma a mesam mé bi too mboon jôme jia. 18Ebi bifufub te é bili mintyaé misaman, milal éfase ji milale mivok éfase ji. 19Ntyaé ôse ô bili bilaé bilaa éyekaʼa ane ébuma mvin, bibuma a mesam me too été; mintyaé misaman mise mi nga tii ébi bifufup mi mbe avale te. 20Nkuʼu ébi bifufub ô nga bili bilaé binyin éyekaʼa ane ébuma mvin, bibuma a mesam me too été. 21Mintyaé misaman mi nga beme nkuk ébi bifufub mi mbe mbaʼatan mibaé mibaé, ébuma é too mbaʼatan ôse si. 22Bibuma a mintyaé mi ébi bifufub bi too jôme jia; ase mboon a mvot a ne mbiban a *mfuban. 23Belambe bé zamgbwa, menjo mé a bikutan asup bié bi too mboon a mvot a ne *mfuban. 24Be nga belan bekiligram be mvot a ne *mfuban mewôm mela mfaʼa ya kôme ébi bifufub a biôm mebelan bié bise.

Nlôñan ataʼa metunaʼa bʼôlobinda

(Nk 30:1-10; 22-38; Nl 8:3-4)

25Ane a nga lôñe ataʼa metunaʼa bʼôlobinda a asé; nté ô too anyiʼi wo da, ndam fe anyiʼi wo da; ataʼa metunaʼa ate a mbe abime da nté a ndam, ve ôyabe yôp ô mbe menyiʼi me mo mela. A nga futi minlak mekuʼu menyin; minlak a ataʼa metunaʼa bi too jôm jia. 26A nga yañe nye a mvot a ne *mfuban mfaʼa ya yôp, e mefefel, mbômaʼane a minlak, ane fe a nga bo nkôngô mvot mbômaʼan. 27A nga bo bilondo bibaé e nkôngô mvot si éfase ya li a li, a futi fe bilondo mevôme mevok mfaʼa ya some mimbôñ ya beʼe ataʼa metunaʼa. 28Nde a nga kôme mimbôñ mite a asé a dube mie a mvot.

29Ane a nga kôme fe mbon ô ne étyi ba woʼo bôt éyoñ ba telé be bito, nalé fe ôlobinda a nyume mvaé, a too *mfuban, nkôman avale ntyetyeñ nkôm be ôlobinda a ne kôm.

Bible en langue Bulu

© LʼAlliance Biblique du Cameroun, 2007

More Info | Version Index