Search form

NKÔLAN 4

1Ane Môze a nga yalan a jô na: Momo ba ye bo te buni ma a baa ye ke vôʼôlô tyiñe jam, amu ba ye jô na: Nti a nji ke yené e be wo. 2Ane Nti a nga jô Môze na: Jé ô bili e wo le? Ane Môze a nga yalane na: Ntum. 3Ane Nti a nga jô nye na: Wuʼa wô si, ane a nga wua ntume si, wô ve veñesane nyo; ane Môze a nga mate ôsu ya nyo éte. 4Nde Nti a nga jô Môze na: Same e wo wôé a bi je ôkot; ane a nga same wo wé a bi je: Nde é nga bulan bo *ntum e wo wé été. 5Nalé ba ye buni na Nti, e Zambe bʼésaa bap, e Zambe Abraham, Yizak a Yakob, a nga yené e be wo. 6Ane Nti a nga beta jô nye na: Some wo wôé e tôé jôé, ane a nga some wo wé e tôé jé; ane a nga vaa wô a ô lôô wo wé ô ntoo *zam ne nyaññ, éfumulu ane sut. 7Ane a nga jô na: Some wo wôé e tôé, ane a nga some wo wé e tôé, a beta vaa wô a ô lôô ô nga bulane bo ane minsône mié. 8A ye bo na nge be bo te buni wo a nge ba ye bo te wôk amu ndem ôsu, ba ye buni amu ndeme baa. 9Nge ba bo te buni mendem mana mebaé, a bo fe te wôʼô tyiñe jôé, wo ye nyoñe mendim ya ôsôé a sôé me e *nkôte si: Mendim mete ma ye veñesane metyi.

10Ane Môze a nga jô Nti na: Ôé a Nti! Me nji bo môt a ne ôyem éveves, a jame te e nji taté ma angôʼé, nge ôjan, nge ke nté ane ô kobôô mbo ésaé wôé, amu anyu a ôyeme viam bi ne adit. 11Ane Nti a nga jô nye na: Za a nga ve môt anyu? Za a toé môt mvuk nge ndok, za a bo nye na a yen nge tabe ndim, ye sa ma Nti? 12Kele ñhe éyoñe ji amu bia anyu dôé bi ne nsamba, a ma ye yeʼele wo e jam wo yiane kobô.

13Ane Môze a nga jô na: Ôé a Nti! Ma yeʼelane wo na lôme nkobô te a môt wo kômbô lôm. 14Ane Nti a nga yaa Môze a jô nye na: Ye monyoñ Aron, mone lévit a nji bo? Ma yeme na a ye kobô tyiʼibi. E nye fe le a zu tôbane wo. Eyoñ a ye yene wo a ye dañe vak. 15Wo ye kobô nye a futi mejô ma anyu dé; bia anyu dé a éndôé bia ye bo nsamba; a ma ye yeʼele mia e jam mia yiane bo. 16A ye kobô bôt e señe jôé; nye a ye bo anyu dôé a wo ye bo nye ane *zambe. 17Nyoñe ntume wu e wo wôé été ñwô te wo ye bo wô bitua bi mam.

Môze a bulane Ejipte

(Nk 2:15-23; Mt 2:20-21; Nk 18:1-5)

18Ane Môze a nga bulan e be Yétrô ntyi wé a jô nye na: Me nga zu bulan e be bobejañe bam be ne Ejipte a yen nge be ngenan be vee. Ane Yétrô a nga jô nye na: Kele *mvoʼé. 19Ane Nti a nga jô Môze valé a ngenan Madian na: Kelek a bulan Ejipte, amu bôt bese be nga jeñe ényiñe jôé be wuya. 20Ane Môze a nga nyoñ e minga wé a bone bé; ane a nga toé be éjakase yôp; nde a nga bulane Ejipte. Ane Môze a nga nyoñe fe ntume Zambe e wo wé été. 21Ane Nti a nga jô Môze na éyoñ wo ye kôlô a bulan Ejipte, ô simesaʼan bitua bi mam bise me nga ve e wo wôé ngule ya bo, a ô boʼo bie asu Faraoñ; ve ma ma ye bo nleme wé ntip, a a ye bo te suu bôt. 22A wo ye jô Faraoñ na avale di nde Nti a jô na: Israél a ne ntôle mone wom. 23Ma jô wo na suʼu mone wom ane a ye bo ma ésaé. Ve nge wo bene suu nye, ma ye wôé mone wôé, e ntôle mone wôé. 24A nga bo na e vôm be nga bômbô *zen, Nti a nga wua nye mo nyô a kômbô wôé nye. 25Ane Séfôra a nga nyoñ akoʼo señ a tyiʼi mone wé atyel. Ane a nga nambe mebo me Môze a atyele te a jô na: Ô ne ma nnôme metyi. 26Amu nsuan Nti a nga suu Môze nde Séfôra a nga jô Môze na: Ô ne ma nnôma metyi amu ntyiʼan atyel. 27Ane Nti a nga jô Aron na: Kele tôbane Môze e *nkôte si. Ane a nga ke a tôbane Môze e nkôle Zambe a wubane nye. 28Ane Môze a nga kate Aron mejô mese Nti a nga kalane nye a mendem mese a nga bendé nye. 29Nalé Môze ba Aron be nga ke a sulane bemvendé bese ya Israél. 30Ane Aron a nga kate mejô mese Nti a nga kobô Môze a bo fe mendem e mise me bôt bese. 31Nde ayoñ ese e nga buni. Ane be nga nyoñ foé na Nti a zuya jome bôte ya Israél a naa a yeneya fe éngôngole jap: ane be nga kumbu si a kañe nye.

Bible en langue Bulu

© LʼAlliance Biblique du Cameroun, 2007

More Info | Version Index