Search form

NKÔLAN 5

Môze ba Aron be tele asu be njô bôt vʼEjipte

(Nk 3:18-19; 6:9-12; 2 Mink 32:13-19; Mm 14:22)

1Eyoñ é lôteya, ane Môze ba Aron be nga zu a jô Faraoñ na: Nti, e Zamba Israél a jô na: Suʼu e bôte bam be ke kañe ma a abôk e fé été. 2Ane Faraoñ a nga jô na: Za a ne Nti e nyô ma yiane vôʼôlô e tyiñe jé a suu Israél? Me nji yeme Nti, nalé fe na ma ye bo te suu Israél. 3Ane be nga yalane na: Zambe Beébre a nga yené e be bia. Bia yeʼelane wo na: Suʼu bia bi ke e fé été e nté dulu melu mela, bi tyiʼi Nti, e Zambe wongan biôm, a za bibi bia a ébubua ôkon éziñ nge ke nkpwaté mekôn. 4Ane njô bôte yʼEjipte a nga jô be na: A Môze a Aron amu jé mia vaa bôt e bisaé biap? Kelan bisaé bienan! 5Ane Faraoñ a nga jô na: Tame yen, éyoñ bôt be ntoo abui e *si nyô ana, éyoñe te mia kômbô na be tabe si te beta bo bisaé biap. 6Amôs ôte ôbien Faraoñ a nga bendé bivet bisaé, bi bi bôte yʼEjipte a bi bôte ya Israél a bendé be na: 7Mia ye bo te beta kôane bôt bikumba biloʼo ya bibi brik avale mi nga bo biyoñ ya mvus; bebien be kelek a kôane bie. 8Ve mia ye yemete be be ke ôsu a bo abime brik be nga taté bo be boʼok; mia ye bo te séʼé tañ éte amu be ne minleles a amu ajô te ba yôn a jô na: Bi tame ke tyiʼi Zambe wongane biôm! 9Be betéʼé bôte bete adite bisaé, éyoñe te ba ye bi jame ya bo a bo te beta nyoñe ngab e nkobô minsose wu. 10Nalé ate bivete bise, bi ne anen a bi bi ne tyôtyoé bi nga ke a jô bôte na: Avale di Faraoñ a jô na: Ma ye bo te beta ve mia bikumba bilok. 11Miabebien kela jeñan biloʼo bite e vôm mi ne nguleya yene bie, amu ba ye bo te séʼé abime ésaé mia yiane bo toʼo na ve mon abim. 12Ane bôte ya Israél be nga mialan e si ése ya Ejipte a nyoñ bikum minkendeʼe bilok éjiane mimbom bikumba bilok asu ya bibi brik. 13Ane bivet bi nga tindi be be mane ésaé ya *môs ôse avale fe ane éyoñ be nga belan bikumba bilok. 14Be nga bôm toʼo na bivet bi mbe bôte ya Israél mbie bi mbe bôte ya Ejipte be nga telé na bi jôô bôte ya Israél be jôʼô na: Amu jé angôʼé mi nji bo abime brik be nga tiñeti mia na mi bo avale mi nga taté boʼo mi boʼok? 15Ane bivet bi mbe bôte ya Israél be nga ke soman de e be Faraoñ a jô na: Amu jé wo tibili bebo bisaé bôé avale di? 16Be nji beta ve bebo bisaé bôé bikumba bilok, ve ba jô bia na: Bibaʼan brik! Ajô te ba bôm bebo bisaé bôé, a bôte ya ayoñ dôé mbe be ne mekua. 17Ane Faraoñ a nga yalane na: Mi ne minleles! Amu ajô te mia jô na zaʼan bi ke ve Nti mimvean! 18Eyoñe ji bulaʼan ésaé jenan; ba ye bo te ve mia bikumba bilok, ve mia ye bibi abime brik e ne mia ntiñetane na mi bibi.

19Bivet bi mbe bôte ya Israél bi nga yene njôane wuna na mia ye bo te séʼé e tañe brik mia ve *môs ôse zene ya veñesane be be bo bingôngol. 20Eyoñ be kôlôya be Faraoñ, ane be nga beta ke koone Môze ba Aron e vôm be mbe be yangeʼe be. 21Ane be nga jô be na: Nti émien a fombôʼô mia a tyiʼi mia ajô, amu mi boya bia bi yené e mbia be biôm e mise me Faraoñ a bebo bisaé bé. 22Ane Môze a nga bulan e be Nti a jô nye na: A Nti! Amu jé ô boya ayoñe di *abé! Amu jé ô nga lôme ma? 23Amu nté ane me nga zu e be Faraoñ a kobô nye, a jôé dôé, a ke ke ôsu a bo e bôte ba *abé: ve wo ô nji kôté e bôte bôé.

Bible en langue Bulu

© LʼAlliance Biblique du Cameroun, 2007

More Info | Version Index