Search form

NKÔLAN 6

1Ane Nti a nga jô Môze na: Eyoñe ji wo ye yeme e jam ma ye bo Faraoñ, amu wo ô ne ngu wo ye tindi nye na a suu be a ñwô fe wo ye tindi nye na a titane be.

Nti a yené e be Môze

(Nk 3:13-20; Ez 20:5-9; Dt 32:36)

2Ane Zambe a nga kobô Môze a jô nye na: Me ne Nti, 3me nga yené e be Abraham, Yizak a e be Yakob aval ane e Zambe a bili ngulʼése; ve be nji yeme ma a nya jôé wom nye a ne Nti. 4Me nga bo fe élate jam a be na me ve be e si ba loone Kanaan; si e vôm mi nga lôt abe melu a suʼulan bo mintabe. 5Ajô te me wôʼôya mintat bôte ya Israél a étibelaʼa bôte ya Ejipte ba tibili be: Eyoñe ji me simesaneya élate jam. 6Ajô te kate bôte ya Israél na: Me ne Nti, ma ye kôté mia e ngule bisaé bôte ya Ejipte ba ve mia; ma ye kôté mia a ngule ya e wo wom a mintyiʼan mejô mi ne anen. 7Ma ye nyoñe mia na mi bo e bôte bam. Ma ye bo e Zambe wônan a mia ye yeme na me ne Nti e Zambe wônan, nyô a kôté mia e ngule bisaé bôte ya Ejipte ba ve mia. 8Ma ye bo na mi nyiin e si me nga kalane wo wom na ma ye ve je Abraham, Yizak a Yakob; ma ye ve mia je, ma, Nti, é bo e jôme jenan. 9Nalé ate nye Môze a nga kobô bôte ya Israél: ve be nga bo te vôʼôlô Môze amu ôjejaʼa wob a amu mbia éto belo wop. 10Ane Nti a nga kobô Môze a jô nye na: 11Kelek a kobô Faraoñ njô bôte ya Ejipte na, a suu bôte ya Israél be kôlô e si jé. 12Ane Môze a nga yalan asu be Nti na: Israél a bene wôʼô ma, ngumane ke Faraoñ a ye wôʼô ma aya me too adit anyu? 13Ane Nti a nga kobô Môze ba Aron a ve be mebendé ma fombô Israél a Faraoñ, njô bôte ya Ejipte mfaʼa ya vaa be Ejipte.

Ndan Môze ba Aron

(Met 46:8-11; Nlb 26:5–14:57-62)

14Bivet ya menda me bôte mab e mbie bi: Bone be Ruben e ntôle mone Israél, Enok Paloñ, Etsroñ a Karmi. Menda me Ruben e me le. 15Bone be Siméoñ: Yémuél, Yamin, Ôhad, Yakin, Sôhar a Saül e mone ngone ya Kanaan a nga biaé. Menda me bôt me Siméoñ e me le.

16Biyôlé bi bone be Lévi a menda me bôte mab mbie bi: Gérschon, Kehat a Mérari. Lévi a nga tabe mimbu ntet a mewôm mela a zamgbwa.

17Bone be Gérschon: Libni a Siméyi a menda me bôte map. 18Bone be Kehat: Amram, Yitsehar, Ebroñ a Uziél. Kehat a nga tabe mimbu ntet a mewôm mela a mila. 19Bone be Mérari: Mali a Musi: Menda me bôt me Lévi a memvoñ me bôte mab e mme le. 20Ane Amram a nga luʼu Yôkébéd ésanga wé, nde a nga biaé nye Aron ba Môze. Amram a nga tabe mimbu ntet a mewôm mela a zamgbwa. 21Bone be Yisear: Koré, Néfeg a Zikri. 22Bone be Uziél: Misaél, Elsafan a Sitri. 23Ane Aron a nga luʼu Eliséba, ngone Aminadab a kale Nason a nga biaé nye Nadab, Abihu, Eléazar a Itamar. 24Bone be Koré: Asir, Elkana a Abiasaf; menda me bôte me Koré mme le. 25Ane Eléazar e mone Aron a nga luʼu ngone jia ya bengon be Putiél, nje é nga biaé nye Pinehas. Minlô mi bôte ya mvoñe Lévit aval ane menda me bôte mab me né mmie le. 26Aron ba Môze mbe le Nti a nga jô na: Boʼone na bôte ya Israél be kôlô Ejipte aval ane minsamba miab mi né. 27Mbe bete be nga bo be kobôʼô Faraoñ njô bôte ya Ejipte ajô mvaane bôte ya Israél Ejipte.

Môze a beta ke e be Faraoñ

(Nk 6:6-13; 4:10-17; 3:18-20; 2 Ti 3:8-9)

28Melu Nti a nga kobô Môze Ejipte, 29ane a nga jô nye na: Me ne Nti, kobôʼô Faraoñ njô bôte ya Ejipte e mam mese me kobôya wo. 30Ane Môze a nga yalane asu be Nti na: Me nyô, e môt a ne te yeme nkobô, nne Faraoñ a ye wôʼô ma aya?

Bible en langue Bulu

© LʼAlliance Biblique du Cameroun, 2007

More Info | Version Index