Search form

NKÔLAN 7

1Ane Nti a nga jô Môze na: Tame yen me boya wo ane *zambe éziñ mfaʼa Faraoñ, a Aron, monyoñ, a ye bo *nkulu mejô wôé. 2Wo ye jô mam mese ma ye bendé, a Aron, monyoñ, a ye baʼalane me e be Faraoñ, nalé a ye suu bôte ya Israél be kôlô si jé. 3A ma ye bo e nleme Faraoñ ntip, a ma ye bo mendem a bitua bi mam biam Ejipte. 4Faraoñ a ye bo teke wôʼô mia. Ma ye same wo wom Ejipte a ma ye bo na minsamba miam, e bôte bam, Israél, be kôlô Ejipte a ngule beta mintyiʼan mejô. 5Bôte ya Ejipte ba ye yeme na me ne Nti éyoñ ma ye same wo wom Ejipte a vaa bôte ya Israél ézezañ jap. 6Ane Môze ba Aron be nga bo ane Nti a nga bendé be: nalé be nga bo. 7Môze a nga too mimbu mewôme muam a Aron mimbu mewôme muam a mila éyoñ be nga kobô Faraoñ. 8Ane Nti a nga jô Môze ba Aron na 9nge Faraoñ a kobô mia a jô mia na: Boʼone étua jam! Wo ye jô Aron na: Nyoñe *ntum a wua wô ôsu Faraoñ a wo ye veñesane nyo. 10Ane Môze a Aron be nga zu e be Faraoñ, nde be nga bo ane Nti a nga bendé be. Ane Aron a nga wua ntume ôsu Faraoñ a bebo bisaé bé: Ane ô nga veñesane nyo. 11Ane Faraoñ a nga loone beyeme mam, mingbwengbwee a bebo mesimba ya Ejipte: ane be fe be nga bo ane Môze ba Aron be nga bo, ve be belaʼane mezen me ne ndimba a ayaé ya yem e be bôte bese. 12Ane be nga wua mintume miab e si, mi ve veñesane benyo. Ve ntume Aron ô nga mane mine émiap. 13Ve nleme Faraoñ ô nga bo ntip, teke vôʼôlô be avale Nti a nga jô.

Mendim ma veñesane metyi

(Sam 105:26-29. Nli 8:8-9; 16:3-6; Yo 2:7-11)

14Ane Nti a nga jô Môze na: Nleme Faraoñ ô ne ntip, a nji kômbô suu bôt; 15kele e be Faraoñ mametyé amu ô lôô a ye kui a ke ôsôé; éyoñe te wo ye ke tôbane nye nsaʼa ôsôé ô bili fe *ntum ô nga veñesane nyo e mo. 16Eyoñe te ñhe wo ye jô nye na: Nti, e Zamba Beébre a lômeya ma e be wo a jôʼô na: Suu bôte bam be ke bo ma ésaé e fé été; ve wo, akui éyoñe ji, ô nji vôʼôlô ma. 17Avale di nde Nti a jô na: E zene nyô nje wo ye yeme na me ne Nti, ô lôô ma ye bibi mendim ya ôsôé a *ntum me bili mo, a ma ye veñesane metyi. 18E kos é ne ôsôé ja ye wu, a ôsôé wo ye nyum *abé, a bôte ya Ejipte ba ye bo te fe ngul ya nyu mendim ya ôsôé. 19Ane Nti a nga jô Môze na: Jôʼô Aron na, nyoñe ntume wôé a same wo wôé e mendim ya Ejipte: Ataté atôñ mendime dap, e mimbale ya beta ôsôé wop, e bitam bi kose biab akui e mevale mendim mese yôp: mese ma ye veñesane metyi. Metyi ma ye yiane si ése ya Ejipte akui bilabaʼa bi ne mboon a bilé nge a *mekok. 20Ane Môze ba Aron be nga bo ane Nti a nga bendé be. Aron a nga bete *ntum a bibi mendim me mbe ôsôé e mise me Faraoñ a bebo bisaé bé; ane mendim ya ôsôé me nga veñesan metyi. 21E kos é mbe e mendim ya ôsôé é nga wu, a ôsôé ôbien ô nga nyum *abé, bôte ya Ejipte be nji bo ngul ya beta nyu mendim ya été, a metyi me nga yiane si ése ya Ejipte. 22Ve bebo mesimba ya Ejipte be nga bo fe avale te, be belaʼan mezene mab me ne ndimba a ayaé ya yem e be bôt bese. Ane nleme Faraoñ ô nga bo ntip: a nji vôʼôlô be avale ane njôane Nti ô mbe. 23Ane Faraoñ a nga bulane e *nda jé a bo teke nyoñe jame te ngap. 24Ane bôte bese ya Ejipte be nga faʼa menjeñ mendim ya nyu e mefôla ya beta ôsôé wop, amu be nji bo ngule ya beta nyu mendim ya beta ôsôé ate. 25Eyoñ Nti a maneya ndaman beta ôsôé ate, mingum mi *môs mila mi nga beta lôt.

Minkongo

(Sam 105:30; Nli 16:13)

26Ane Nti a nga jô Môze na: Kele e be Faraoñ a jô nye na, suʼu e bôte bam be ke a bo ma ésaé. 27Nge ô bo te suu be, ma ye bo na minkongo mi yiane si jôé ése. 28E beta ôsôé wônan a ye jaé a minkongo, mia ye bet a nyiine e *nda jôé, étune *nda jôé wo bômbô a énoñe jôé, e *nda bebo bisaé a e be bôte bôé, a mevôm ba yame belet a e beta befandé ba fuʼu avut. 29Minkongo mia ye bete wo nyô, e nyôle bôte bôé a e nyôle bebo bisaé bôé.

Bible en langue Bulu

© LʼAlliance Biblique du Cameroun, 2007

More Info | Version Index