Search form

NKÔLAN 8

1Ane Nti a nga jô Môze na: Jôʼô Aron na, same e wo wôé ô bili *ntum asôé yôp, e mimbale mi beta ôsôé, e bitam bi kos, a bo na minkongo mi bet e si ya Ejipte. 2Ane Aron a nga same e wo wé e mendime ya Ejipte; ane minkongo mi nga bet a yiane si ése ya Ejipte. 3Ane bebo mesimba be nga bo fe avale te a mezene mab me ne ndimba a ayaé ya yem e be bôte bese; ane be nga bo na minkongo mi bet e si ya Ejipte. 4Nde Faraoñ a nga loone Môze ba Aron a jô be na: Yeʼelane Nti na a vaa minkongo be ma e be bôte bam, éyoñe te ma ye suu bôte na be ke tyiʼi Nti biôm. 5Ane Môze a nga jô Faraoñ na: Njô bôt a nyoñe duma! Eyoñ évé wo kômbô na me yeʼelane ajô dôé? Ajô bebo bisaé bôé a di bôte bôé na Nti a vaa minkongo be wo a menda môé? Mia ye liʼi foʼo ve e beta ôsôé wônan. 6Faraoñ a nga yalane na: Akiti. Môze nye na: Ane wo sili, nalé a ye boban, ajô te wo ye yeme na teke jôm é ne veʼan Nti, e Zambe wongan. 7Minkongo mia ye kôlô e be wo a menda môé, e be bebo bisaé bôé a e bôte bôé mia ye liʼi foʼo ve e beta ôsôé wônan. 8Ane Môze ba Aron be nga kôlô be Faraoñ. Ane Môze a nga yôn e be Nti ajô minkongo a nga zuu de ayaa e be Faraoñ. 9Ane Nti a nga bo ane Môze a nga sili nye; nde minkongo mi nga mane wu e menda été a e minseñ, a mefup. 10Ane be nga kôane mie mevis: Nde ényum é nga yiane ngume si. 11Ve éyoñ Faraoñ a biya awoʼon, a nga bo nleme wé ntib a bo te vôʼôlô Môze ba Aron avale Nti a nga jô.

Binyônyoñ

(Sam 105:31; 2TI 3:8-9)

12Ane Nti a nga jô Môze na; jôʼô Aron na: Same ntume wôé a bibi mbuluʼu ya si; mbuluʼu te wo ye veñesane binyônyoñ e si ése ya Ejipte. 13Nde be nga bo nalé: Môze a nga same wo wé ô bili *ntum a bibi wô e mbuluʼu ya si: Ane mbuluk ô nga veñesane binyônyoñ a yandane e nyôle bôt a betit, Mbuluʼu ôse ya si ô nga veñesane binyônyoñ e si ése ya Ejipte. 14Bebo mesimba be nga belane mezene mab mese ya ndimba na be bo binyônyoñ, ve be nji bo ngul ya bo nalé. Binyônyoñ bi nga bebe bôt a betite nyô. 15Ane bebo mesimba be nga jô Faraoñ na: A ne ônyu Zambe! Ve nleme Faraoñ ô nga bo ntip a bo te vôʼôlô Môze ba Aron.

Minlo mi ne nsu

(Sam 105:31)

16Ane Nti a nga jô Môze na: Kôlôʼô si, e ndibe tyé, ô ke e be Faraoñ éyoñ a ye kui atane na a ke ôsôé, wo ye jô nye na: Avale di nde Nti a jô na: Suʼu e bôte bam be ke bo mʼésaé. 17Nge ô bo te suu e bôte bam, ma ye lôme minlo mi ne nsu mi wosane wo, bebo bisaé bôé, e bôte bôé a menda môé; menda me bôte ya Ejipte ma ye jaé a minlo nalé fe si ya e vôm be too. 18Ve *môs ôte nselan wo ye boban e Gôzen vôm bôte bam be too: Valé a ye bo teke minlo, ndemben wo ye yeme na ma, Nti, me ne ézezañ ya si éte. 19Ma ye futi nkandan wo kôté e zañ bôte bam a e bôte bôé. Ndem éte ja ye yené akiti. 20Ane Nti a nga bo nalé: minsôm minlo mi ne nsu mi nga nyiin e *nda Faraoñ e nyô bebo bisaé bé a si ése ya Ejipte: ane si é nga jaé a minlo. 21Ane Faraoñ a nga loone Môze ba Aron a jô na: Kela tyiʼane biyem asu e Zambe wônane *si nyô été. 22Ane Môze a nga yalane na: Nalé a nji bo mvaé: amu bia ye tyiʼi Nti e Zambe wongan biyem mbie bôte ya Ejipte ba vini; ye ba ye bo te lume bia *mekok? 23Bia ke fé été nté dulu melu mela a tyiʼi Nti e Zambe wongan biyem avale ese a ye jô bia. 24Ane Faraoñ a nga jô na: Ma ye suu mia mi ke tyiʼi Nti e Zambe wônan biyem e fé été. Ve da mia ye bo te ke ôyap. Yeʼelan ajô dam. 25Ane Môze a nga yalane na: Ô lôô ma kui atane ya e *nda jôé a ma ye yeʼelane Nti. Akiti minlo mia ye kôlô e be Faraoñ, e be bebo bisaé bé a e be bôte bé. Ve Faraoñ a boʼo teke ôsu a beta duʼu bia a bene suu bôt be ke tyiʼi Nti biyem. 26Ane Môze a nga kôlô e be Faraoñ a yeʼelane Nti. 27Ane Nti a nga bo aval ane nkobô Môze ô mbe: Minlo mi nga kôlô e be Faraoñ e be bebo bisaé bé a e be bôte bé. Teke wua ô nga liʼi. 28Ve éyoñe te fe, Faraoñ a nga beta bo *nlem ntib a bo te suu bôte bete.

Bible en langue Bulu

© LʼAlliance Biblique du Cameroun, 2007

More Info | Version Index