Search form

KALATE METATAʼA 12

Abram: nkuane wé e Kanaan

(Met 11:31-32; Mm 7:2-5; Hé 11:8-9)

1Nti a nga jô Abram na: Kôlôʼô si jôé, vôm ô nga bialé, *nda bôt ésoo, a ke mfaʼa si ma ye liti wo. 2Ma ye bo wo beta ayoñe bôt, a ma ye botane wo; ma ye nene jôé dôé.

Boʼo ñhe anjeñe bibotan

3Ma ye botane ba ba ye botane wo,

ma ye yoʼé nyô a ye yoʼé wo.

Menda me bôte mese ya si nyô

ma ye botebane be wo.

4Abram a nga ke avale Nti a nga jô nye de, a Lot a nga ke baa nye. 5Abram a nga bili mimbu 75 éyoñ a nga kôlô Harañ. Abram a nga nyoñe minga wé Sarayi a Lot mone monyañ, a akum ése be nga bili a bebo bisaé be nga bi Harañ. Be nga kôlô asu ya ke e si ya Kanaan. Ane ñhe be nga kui Kanaan. 6Abram a nga dañe si éte a kui vôme ba loone Sikem a kui élône ya Môré. Bekananééñ be mbe be too si éte. 7Nti a nga yené be Abram a jô na: Ma ye ve mvoñe bôte jôé *si nyô. Abram a nga lôñe Nti ataʼa metunaʼa e vôm a nga yené be nye ate. 8Wôna a nga vaa minkane mié valé asu ya ke minkô mfaʼa jôbe da tôô Bétél; a nga lame *nda éndelé jé e zañe jôbe da dime Bétél a di da tôô Ayi. A nga lôñ ataʼa metunaʼa valé asu Nti a a nga loone jôé dé. 9Abram a nga beta taté dulu, a kelek mfaʼa ya Négéb.

Abram a kôlô Kanaan a ke Ejipte

(Met 20:1-11; Sam 105:13-15)

10E mfumbale zaé a nga kui Kanaan a Abram a nga siliki Ejipte asu ya tabe wé. 11Eyoñ a ntoo bebé ya kui Ejipte, a nga jô Sarayi minga wé na: Ma yeme na ô ne abeñe minga. 12Eyoñe bôte yʼEjipte ba ye yene wo, ba ye jô na: E minga wé le! Wôna ba ye wôé ma a ba ye liʼi wo vevee. 13Wo ye jô na: Ô ne ma kal, nalé ate ba ye yeme belane ma amu wo, a amu wo e nde ma ye nyiñ. 14Eyoñ Abram a nga kui Ejipte, bôte yʼEjipte be nga yene na minga a mbe étua abeñ. 15Bebo bisaé be Faraoñ be fe be nga yene nye a seʼe nye e be Faraoñ; ane minga a nga keeban e ndaa Faraoñ. 16Mfaʼa Abram, be nga belane nye mvaé amu nye; a Abram a nga nyoñe mimbame mi bone a beta biyem, bijakas, bebo bisaé be ne befam a ba be ne binga, bone bijakas a bekamel. 17Ve Nti a nga bibi Faraoñ a *nda jé a beta bibubua amu ajô Sarayi, e minga Abram.

18Eyoñe te Faraoñ a nga loon Abram a jô nye na: Jé nje ô nga bo ma ji? Amu jé ô nga bo te kate me na a ne minga wôé? 19Amu jé ô nga jô na: Kale jame le? Ajô te me nga nyoñe nye a bo minga wom. Eyoñe ji e minga wôé nyô, nyoñe nye a kelek!

20Faraoñ a nga bendé bôte bé na be suu nye a ke, nye a e minga wé, a biôme bise bi mbe émbié.

Bible en langue Bulu

© LʼAlliance Biblique du Cameroun, 2007

More Info | Version Index